Orange Peel Benefits : సాధారణంగా ఏ పండు తిన్నా దాని తొక్కను పనికిరాదని భావించి పడేస్తుంటాం. కానీ నారింజ విషయంలో మాత్రం తొక్కను అంత తేలిగ్గా పక్కన పెట్టలేం. నారింజ తొక్కలోనూ పలు ప్రయోజనకరమైన సమ్మేళనాలు, పోషకాలు ఉంటాయని నిపుణులు చెబుతున్నారు. మరి నారింజ తొక్కతో కలిగే ప్రయోజనాలేంటి? దాన్ని ఎలా ఉపయోగించవచ్చో తెలుసుకుందాం..
సూపర్ క్లీనర్‌: కిచెన్‌ ప్లాట్‌ఫామ్‌, అద్దాలు, తలుపులు, కిటికీలు వంటి వాటిని శుభ్రం చేసేందుకు నారింజ తొక్కలతో ఇంట్లోనే క్లీనర్‌ తయారు చేసుకోవచ్చు. ఇందుకోసం కొన్ని నారింజ తొక్కలను గాజు సీసాలో వేసి, అవి పూర్తిగా మునిగేలా వెనిగర్‌ పోసి సుమారు రెండు వారాలు ఉంచాలి. ఆ తర్వాత తొక్కలను వడకట్టి, అందులో కొద్దిగా నీరు కలిపి స్ప్రే బాటిల్‌లో పోస్తే క్లీనింగ్‌ కోసం ఉపయోగించుకోవచ్చు.
రూమ్‌ ఫ్రెష్‌నర్‌: ఇంట్లో ఆహ్లాదకరమైన సువాసన రావాలంటే నారింజ తొక్కలను ఉపయోగించవచ్చు. కొన్ని నీళ్లను మరిగించి, అందులో నారింజ తొక్కలతో పాటు దాల్చిన చెక్క, లవంగాలు వేసి కాసేపు మరిగిస్తే ఇంట్లో చక్కని సువాసన వ్యాపిస్తుంది.
కీటకాలు దూరం: మొక్కల చుట్టూ చీమలు, చిన్న కీటకాల బెడద ఉంటే నారింజ తొక్కలను ఉపయోగించవచ్చని కొందరు సూచిస్తారు. తాజా లేదా ఎండిన నారింజ తొక్కలను చిన్న ముక్కలుగా చేసి మొక్క మొదట్లో మట్టిలో స్వల్పంగా కప్పి ఉంచవచ్చు. అయితే ఇది కీటకాలను పూర్తిగా నివారిస్తుందని చెప్పడానికి బలమైన ఆధారాలు లేవు.