చిన్న బడ్జెట్‌తో తెరకెక్కి హిందీ బాక్సాఫీస్ వద్ద అనూహ్య విజయాన్ని అందుకున్న చిత్రం ‘హనుమాన్ అంశ్’. కేవలం రూ.2 కోట్ల బడ్జెట్‌తో రూపొందిన ఈ సినిమా వందల కోట్ల వసూళ్లు సాధించి అందరి దృష్టిని ఆకర్షించింది. ఇప్పుడు తెలుగు ప్రేక్షకులను అలరించేందుకు సిద్ధమైంది. అక్టోబర్ 9న థియేటర్లలో విడుదల కానున్న ఈ మూవీ తెలుగు ట్రైలర్‌ను తాజాగా విడుదల చేశారు.
నీమ్ కరోలి బాబా జీవిత కథతో..
ఆధ్యాత్మిక గురువు నీమ్ కరోలి బాబా జీవితాన్ని ఆధారంగా చేసుకుని ‘హనుమాన్ అంశ్’ తెరకెక్కింది. విశాల్ చతుర్వేది దర్శకత్వం వహించిన ఈ చిత్రంలో శోభిత్ శ్రీవాత్సవ ప్రధాన పాత్రలో నటించారు. చందన్ ఆనంద్, పూర్ణిమ తివారి కీలక పాత్రలు పోషించారు. భక్తి, ఆధ్యాత్మికతతో పాటు భావోద్వేగ అంశాలను కలిపి ఈ సినిమాను రూపొందించినట్లు ట్రైలర్ చూస్తే తెలుస్తోంది.
తెలుగు రిలీజ్ వెనుక ఆసక్తికర పరిణామాలు
ఈ సినిమాను తెలుగులో విడుదల చేయాలని దర్శకుడు త్రివిక్రమ్ శ్రీనివాస్ తొలుత ఆసక్తి చూపించినట్లు వార్తలు వచ్చాయి. అయితే చివరి నిమిషంలో ఆయన ఈ ప్రాజెక్ట్ నుంచి తప్పుకున్నట్లు ప్రచారం జరిగింది. అనంతరం ఓవర్సీస్‌లో సినిమాను విడుదల చేసిన హోంబలే ఫిల్మ్స్.. తెలుగు వెర్షన్‌ను కూడా ప్రేక్షకుల ముందుకు తీసుకురావడానికి ముందుకొచ్చింది.
హిందీలో భారీ స్పందన అందుకున్న ‘హనుమాన్ అంశ్’కు తెలుగులో ఎలాంటి ఆదరణ లభిస్తుందనేది ఇప్పుడు ఆసక్తికరంగా మారింది. అక్టోబర్ 9న థియేటర్లలోకి రానున్న ఈ సినిమా తెలుగు ప్రేక్షకులను ఎంతవరకు మెప్పిస్తుందో చూడాలి.