తెలంగాణలో ఓటరు జాబితా సమగ్ర సవరణ నేపథ్యంలో ఫారం-7 అంశం ఇప్పుడు చర్చనీయాంశంగా మారింది. ఓటర్ల పేర్లను తొలగించేందుకు నకిలీ ఫారం-7 దరఖాస్తులను ఉపయోగిస్తున్నారన్న ఆరోపణలతో అధికారులు అప్రమత్తమయ్యారు. మరోవైపు, తమకు తెలియకుండానే ఓటు తొలగించేస్తారేమోనన్న ఆందోళన ఓటర్లలోనూ కనిపిస్తోంది.
అయితే, మీ పేరు ఓటరు జాబితాలో ఉందో లేదో తెలుసుకోవడం చాలా సులభం. మీ ఓటు హక్కు ప్రస్తుతం కొనసాగుతోందా? మీ పేరు జాబితాలో ఉందా? అనే విషయాలను ఆన్‌లైన్‌లోనే చెక్ చేసుకోవచ్చు.
అసలు మీ ఓటు హక్కు ఉందో లేదో ఎలా తెలుసుకోవాలి? ఓటరు జాబితాలో మీ పేరును ఎలా చెక్ చేసుకోవాలి? ఆ ప్రక్రియ ఏంటో ఇప్పుడు తెలుసుకుందాం.
తెలంగాణలో కొనసాగుతున్న ఓటరు జాబితా సమగ్ర సవరణ (SIR) ప్రక్రియలో ఫారం-7 అంశం చర్చనీయాంశంగా మారింది. పలు నియోజకవర్గాల్లో ఫారం-7ను దుర్వినియోగం చేసి ఓటర్ల పేర్లను తొలగించేందుకు ప్రయత్నిస్తున్నారంటూ ఫిర్యాదులు రావడంతో అధికారులు అప్రమత్తమయ్యారు.
హైదరాబాద్‌లోని ముషీరాబాద్ నియోజకవర్గం పరిధిలోని 210వ పోలింగ్ కేంద్రానికి చెందిన 31 మంది ఓటర్ల పేర్ల తొలగింపునకు సంబంధించి నకిలీ ఫారం-7 పత్రాలు రూపొందించారన్న ఆరోపణలపై అక్టోబర్ 5న పోలీసులకు ఫిర్యాదు చేసినట్లు సమాచారం. ఈ వ్యవహారంపై కేసు నమోదు చేసి దర్యాప్తు చేపట్టనున్నట్లు పోలీసులు తెలిపారు.
మరోవైపు, రాజకీయ కారణాలతోనో లేదా పొరపాటునో ఇతరుల ఓట్ల తొలగింపునకు ఫారం-7 దరఖాస్తులు సమర్పిస్తున్నారన్న ఆరోపణలు కూడా వినిపిస్తున్నాయి. దీంతో తమ ఓటు హక్కు కొనసాగుతోందా? తమ పేరు ఓటరు జాబితాలో ఉందా? అనే సందేహాలు ఓటర్లలో వ్యక్తమవుతున్నాయి.
అయితే మీ ఓటు జాబితాలో ఉందో లేదో తెలుసుకోవడం చాలా సులభం. ఎన్నికల సంఘం అధికారిక ఓటర్ సర్వీసెస్ పోర్టల్‌లో మీ పేరు, ఓటర్ ఐడీ తదితర వివరాలతో చెక్ చేసుకోవచ్చు. అసలు మీ ఓటు భద్రంగా ఉందో లేదో క్షణాల్లో ఎలా తెలుసుకోవాలి? ఓటరు జాబితాలో మీ పేరును ఎలా చెక్ చేసుకోవాలి? ఇప్పుడు స్టెప్ బై స్టెప్ చూద్దాం.
కేంద్ర ఎన్నికల సంఘం వెబ్‌సైట్ ద్వారా చెక్ చేసుకోవడం
ముందుగా కేంద్ర ఎన్నికల సంఘం అధికారిక ఓటర్ సర్వీస్ పోర్టల్ voters.eci.gov.in ను ఓపెన్ చేయండి.
హోమ్ పేజీలో కనిపించే ‘Search in Electoral Roll’ ఆప్షన్‌పై క్లిక్ చేయండి. అనంతరం మీ ఓటరు వివరాలను తెలుసుకునేందుకు మూడు రకాల సెర్చ్ ఆప్షన్లు అందుబాటులో ఉంటాయి:
- Search by EPIC: మీ ఓటర్ ఐడీ (EPIC) నంబర్, రాష్ట్రాన్ని ఎంచుకుని క్యాప్చా నమోదు చేస్తే మీ ఓటరు వివరాలు కనిపిస్తాయి.
- Search by Details: మీ పేరు, తండ్రి లేదా భర్త పేరు, వయస్సు, నియోజకవర్గం వంటి వివరాలను నమోదు చేసి ఓటరు జాబితాలో మీ పేరును వెతకవచ్చు.
- Search by Mobile: ఓటరు జాబితాలో నమోదైన మొబైల్ నంబర్‌ను ఉపయోగించి, OTP ద్వారా కూడా మీ వివరాలను చెక్ చేసుకోవచ్చు.
సెర్చ్ చేసిన తర్వాత స్క్రీన్‌పై మీ ఓటరు వివరాలు కనిపిస్తే, మీ పేరు ప్రస్తుతం ఓటరు జాబితాలో ఉన్నట్లు అర్థం. అయితే ‘No Record Found’ అని కనిపిస్తే, మీ వివరాలు ఆ సెర్చ్‌లో లభించలేదని మాత్రమే అర్థం; వెంటనే ఓటు తొలగించబడిందని నిర్ధారించలేం. అటువంటి సందర్భంలో మరో సెర్చ్ ఆప్షన్‌తో కూడా వివరాలను పరిశీలించడం లేదా సంబంధిత ఎన్నికల అధికారులను సంప్రదించడం మంచిది.