టాలీవుడ్‌లో యూత్‌లో మంచి క్రేజ్ సంపాదించుకున్న హీరో విజయ్ దేవరకొండకు గత కొంతకాలంగా సరైన కమర్షియల్ సక్సెస్ దక్కడం లేదు. 2018లో వచ్చిన ‘గీత గోవిందం’తో బ్లాక్‌బస్టర్ అందుకున్న విజయ్.. ఆ తర్వాత వరుస పరాజయాలతో కెరీర్‌లో కొంత వెనుకబడిపోయాడు. ‘గీత గోవిందం’ తర్వాత విజయ్ టాలీవుడ్‌లో టాప్ హీరోల రేసులో మరింత దూసుకెళ్తాడని అంచనాలు ఏర్పడినా.. ఆ స్థాయిలో విజయాల పరంపరను కొనసాగించలేకపోయాడు.
వరుస సినిమాలు.. నిరాశే
‘డియర్ కామ్రేడ్’ మంచి టాక్ తెచ్చుకున్నప్పటికీ బాక్సాఫీస్ వద్ద ఆశించిన స్థాయి ఫలితాన్ని అందుకోలేకపోయింది. ఆ తర్వాత వచ్చిన ‘వరల్డ్ ఫేమస్ లవర్’ విజయ్ కెరీర్‌లో మరో నిరాశగా మిగిలింది. భారీ అంచనాలతో పాన్ ఇండియా స్థాయిలో రూపొందిన ‘లైగర్’ కూడా బాక్సాఫీస్ వద్ద తీవ్రంగా నిరాశపరిచింది.
ఇక ‘ఖుషి’, ‘ఫ్యామిలీ స్టార్’, ‘కింగ్‌డమ్’ సినిమాలు కూడా విజయ్‌కు కావాల్సిన కమ్‌బ్యాక్‌ను అందించలేకపోయాయి. దీంతో ఇప్పుడు ఆయన అభిమానుల ఆశలన్నీ తదుపరి చిత్రం ‘రణబాలి’పైనే ఉన్నాయి.
‘రణబాలి’పై కనిపించని హైప్?
విజయ్ దేవరకొండ నటిస్తున్న ‘రణబాలి’ అక్టోబర్ 16న ప్రేక్షకుల ముందుకు రానుంది. విడుదలకు సమయం దగ్గరపడుతున్నప్పటికీ.. సినిమాపై ఇంకా ఆశించిన స్థాయిలో హైప్ కనిపించడం లేదనే చర్చ జరుగుతోంది. ఇప్పటివరకు విడుదలైన ప్రమోషనల్ కంటెంట్ కూడా ప్రేక్షకుల్లో భారీ ఆసక్తిని రేకెత్తించలేకపోయిందనే టాక్ వినిపిస్తోంది.
విజయ్‌కు ఉన్న యూత్ ఫాలోయింగ్, స్టార్ ఇమేజ్‌కు తగ్గట్టుగా సినిమా ప్రమోషన్స్ మరింత దూకుడుగా సాగాల్సి ఉందనే అభిప్రాయాలు వ్యక్తమవుతున్నాయి. అయితే విడుదలకు ముందు ప్రమోషన్స్ ఊపందుకుంటే పరిస్థితి మారే అవకాశం కూడా ఉంది.
ప్రస్తుతం విజయ్ దేవరకొండకు ‘రణబాలి’ విజయం కీలకంగా మారింది. ఈ సినిమా బాక్సాఫీస్ వద్ద ఎలాంటి ఫలితాన్ని అందుకుంటుందనేది ఆసక్తికరంగా మారింది. మరి ‘రణబాలి’తో విజయ్ మరోసారి తన సక్సెస్ ట్రాక్‌లోకి వస్తాడా? అనేది అక్టోబర్ 16 తర్వాతే తేలనుంది.