మార్కెట్ నుంచి తెచ్చిన కొత్తిమీర రెండు రోజుల్లోనే వాడిపోయి కుళ్లిపోతుందా? వంటకు అవసరమైనప్పుడల్లా బజారుకు వెళ్లడం ఇబ్బందిగా ఉందా? అయితే మీ ఇంటి బాల్కనీలో లేదా కిటికీ పక్కన ఒక చిన్న కుండీ ఉంటే సరిపోతుంది. ఇంట్లోనే తాజా, పచ్చని కొత్తిమీరను పెంచుకోవచ్చు. వంటింట్లో సులభంగా లభించే ధనియాల గింజలతోనే కొత్తిమీర సాగు చేయవచ్చు. సరైన పద్ధతిలో విత్తనాలు నాటి, తగినంత నీరు, సూర్యరశ్మి అందిస్తే మొక్కలు చక్కగా పెరుగుతాయి. 40 ఏళ్ల గార్డెనింగ్ అనుభవం ఉన్న నిపుణుడు లలిత్ సూచించిన పద్ధతులతో తక్కువ ఖర్చుతో ఇంట్లోనే కొత్తిమీరను ఎలా పెంచుకోవాలో ఇప్పుడు తెలుసుకుందాం.
మట్టి, విత్తనాలు సిద్ధం చేసుకున్న తర్వాత వాటిని సరైన పద్ధతిలో నాటడం కూడా చాలా ముఖ్యం. ముందుగా నానబెట్టిన ధనియాల గింజలను కుండీలోని మట్టిపై అన్ని వైపులా సమానంగా చల్లాలి. విత్తనాలను మరీ లోతుగా పాతిపెట్టకుండా, వాటిపై అర అంగుళం నుంచి ఒక అంగుళం మందం వరకు పొడి మట్టి లేదా కంపోస్ట్‌ను పలుచగా కప్పాలి. కొత్తిమీర మొక్కలు ఆరోగ్యంగా పెరగాలంటే తగినంత వెలుతురు అవసరం. అందుకే కుండీని రోజుకు కనీసం 4–5 గంటల పాటు సూర్యరశ్మి అందే బాల్కనీ లేదా టెర్రస్‌లో ఉంచాలి. గాలి కూడా సరిగ్గా తగిలే ప్రదేశాన్ని ఎంచుకోవడం మంచిది.
నీరు పోసే విషయంలో ఈ జాగ్రత్తలు తప్పనిసరి!
కొత్తిమీర విత్తనాలు మొలకెత్తి మొక్కలు ఆరోగ్యంగా ఎదగాలంటే నీరు పోసే విధానంపై ప్రత్యేక శ్రద్ధ పెట్టాలి. కుండీలోకి మగ్గుతో లేదా పైపుతో నేరుగా ఎక్కువ నీటిని ధారగా పోయకూడదు. ఇలా చేస్తే మట్టి కొట్టుకుపోయి విత్తనాలు పైకి తేలడం లేదా ఒకే చోట గుమిగూడటం జరుగుతుంది. అందువల్ల వాటర్ స్ప్రేయర్ లేదా జల్లెడ ఉన్న నీటి డబ్బాతో మెల్లగా నీటిని చిలకరించాలి. మట్టి కొద్దిగా తేమగా ఉండేలా చూసుకోవాలి. అయితే కుండీలో నీరు నిలిచిపోకుండా, అదనపు నీరు బయటకు వెళ్లేలా డ్రైనేజీ రంధ్రాలు ఉండటం ముఖ్యం.
20–22 రోజుల్లోనే తాజా కొత్తిమీర!
మట్టి తయారీ, విత్తనాలు నాటడం, నీటి నిర్వహణ వంటి చిన్న చిన్న మెలకువలు పాటిస్తే వాతావరణం, విత్తనాల నాణ్యతను బట్టి సుమారు 20–22 రోజుల్లో కొత్తిమీర ఆకులు కోసుకునే స్థాయికి పెరగవచ్చు. ఆకులు ఏపుగా పెరిగిన తర్వాత మొక్కను వేర్లతో సహా పీకేయకుండా, పైభాగంలోని ఆకులను కత్తెరతో కోసుకోవాలి. ఇలా చేస్తే మొక్కకు అనుకూలమైన పరిస్థితుల్లో మళ్లీ కొత్త చిగుళ్లు వచ్చే అవకాశం ఉంటుంది. ఇంట్లో వంటలకు ఉపయోగించే ధనియాల గింజలతోనే బాల్కనీ లేదా టెర్రస్‌పై కొత్తిమీరను పెంచుకోవచ్చు. తక్కువ ఖర్చుతో తాజా ఆకులను అందుబాటులో ఉంచుకోవాలనుకునే వారికి ఈ పద్ధతి ఉపయోగకరంగా ఉంటుంది.