స్థానిక సంస్థల ఎన్నికలను ప్రతి ఒక్కరూ ప్రతిష్ఠాత్మకంగా తీసుకోవాలని టీడీపీ జాతీయ అధ్యక్షుడు ముఖ్యమంత్రి చంద్రబాబు నాయుడు పార్టీ అగ్రనేతలకు స్పష్టం చేశారు. 2024 ఎన్నికల్లో ప్రజలు కూటమికి ఘన విజయాన్ని అందించారని అప్పటి నుంచి ఇచ్చిన హామీలను ఒక్కొక్కటిగా అమలు చేస్తూ ముందుకు సాగుతున్నామని తెలిపారు. ఈ నేపథ్యంలో ‘చెప్పాం చేస్తున్నాం’ కార్యక్రమం ద్వారా ప్రజల్లోకి వెళ్లి ప్రభుత్వ పనితీరును వివరించాలని నేతలకు సూచించారు. ప్రచారాన్ని మరింత ముమ్మరం చేయాలని ఆదేశించారు.
సోమవారం ఉండవల్లిలోని తన క్యాంపు కార్యాలయం నుంచి పార్టీ ముఖ్య నేతలతో చంద్రబాబు టెలీకాన్ఫరెన్స్ నిర్వహించారు. స్థానిక సంస్థల ఎన్నికలకు అనుసరించాల్సిన వ్యూహం కూటమి పార్టీల మధ్య సమన్వయం ప్రభుత్వ కార్యక్రమాల ప్రచారంపై నేతలకు దిశానిర్దేశం చేశారు. కూటమి పార్టీలన్నీ మిత్రధర్మాన్ని తప్పనిసరిగా పాటించాలని ఈ విషయంలో ఎలాంటి మినహాయింపులు ఉండబోవని స్పష్టం చేశారు.
2024 ఎన్నికల తర్వాత స్థానిక సంస్థల ఎన్నికల కోసం ప్రజల వద్దకు వెళ్తున్నామని చంద్రబాబు గుర్తు చేశారు. కేంద్రం, రాష్ట్రం, స్థానిక సంస్థల్లో ఒకే ప్రభుత్వం ఉంటే అభివృద్ధి సంక్షేమ కార్యక్రమాల అమలుకు కలిగే ప్రయోజనాలను ప్రజలకు వివరించాలని సూచించారు. ఇందుకు ఉదాహరణలతో ప్రజలకు అవగాహన కల్పించాలని నేతలకు తెలిపారు.
పార్టీ అగ్రనేతల నుంచి క్షేత్రస్థాయిలోని కార్యకర్తల వరకు ప్రతి ఒక్కరి పనితీరును నమోదు చేస్తున్నామని పేర్కొన్నారు. పొత్తులు, రిజర్వేషన్లు, సామాజిక పునర్‌వ్యవస్థీకరణ కారణంగా కొందరికి ఆశించిన అవకాశాలు దక్కలేదని చంద్రబాబు వివరించారు. అయినప్పటికీ పార్టీ కోసం, రాష్ట్రం కోసం కష్టపడి పనిచేసిన వారికి తగిన గుర్తింపు ఇస్తామని హామీ ఇచ్చారు. అర్హులైన వారికి నామినేటెడ్ పదవులు కల్పించి గౌరవిస్తామని తెలిపారు.
కూటమి ప్రభుత్వం అధికారంలోకి వచ్చిన తర్వాత పెద్ద ఎత్తున సంక్షేమ అభివృద్ధి కార్యక్రమాలను చేపట్టిందని చంద్రబాబు చెప్పారు. ప్రజలకు ప్రభుత్వ సేవలను మరింత సులభతరం చేస్తూ సుపరిపాలన అందిస్తున్నామని పేర్కొన్నారు. రాష్ట్రంలోని అన్ని వర్గాలకు అన్ని ప్రాంతాలకు ప్రయోజనం చేకూరేలా పాలన సాగిస్తున్నామని తెలిపారు.
సంక్షేమ పథకాలను సమర్థంగా అమలు చేస్తూ ప్రజలకు మేలు చేస్తున్నామని వివరించారు. కూటమి ప్రభుత్వం చేపట్టిన అభివృద్ధి కార్యక్రమాలు అమలు చేస్తున్న సంక్షేమ పథకాలను ప్రజల్లోకి విస్తృతంగా తీసుకెళ్లాలని పార్టీ నేతలకు చంద్రబాబు సూచించారు. ‘చెప్పాం చేస్తున్నాం’ కార్యక్రమాన్ని సమర్థంగా నిర్వహిస్తూ ప్రభుత్వ పనితీరును ప్రజలకు వివరించాలని ఆదేశించారు.