తుపాను ప్రభావిత గ్రామాల్లో పునరుద్ధరణ వేగవంతం చేయాలి: పవన్‌ కల్యాణ్‌

అర్నబ్ తుపాను ప్రభావిత గ్రామాల్లో సాధారణ పరిస్థితులు త్వరగా పునరుద్ధరించాలని ఉప ముఖ్యమంత్రి పవన్ కల్యాణ్ అధికారులను ఆదేశించారు. దెబ్బతిన్న రహదారులు, డ్రెయినేజీలు, వీధి దీపాలు, తాగునీటి సరఫరాను యుద్ధ ప్రాతిపదికన పునరుద్ధరించాలని సూచించారు. పంచాయతీరాజ్, గ్రామీణాభివృద్ధి, గ్రామీణ నీటి సరఫరా శాఖల అధికారులతో నిర్వహించిన సమీక్షలో సహాయక చర్యల పురోగతిని పరిశీలించారు.

852 గ్రామ పంచాయతీలపై ప్రభావం

రాష్ట్రవ్యాప్తంగా 75 మండలాల పరిధిలోని 852 గ్రామ పంచాయతీలు తుపాను ప్రభావానికి గురైనట్లు అధికారులు తెలిపారు. గ్రామీణ రహదారులపై 776 చెట్లు కూలిపోగా, ఇప్పటికే 721 చెట్లను తొలగించారు. మిగిలిన చెట్లను కూడా వెంటనే తొలగించి రాకపోకలకు ఇబ్బందులు లేకుండా చూడాలని పవన్ కల్యాణ్ ఆదేశించారు. కోనసీమ జిల్లాలో సహాయక చర్యలను వేగవంతం చేయాలని సూచించారు.

డ్రెయినేజీ, పారిశుద్ధ్యంపై ప్రత్యేక దృష్టి

నీటి ప్రవాహానికి అడ్డంకులు ఏర్పడిన 577 డ్రెయిన్లలో 528 చోట్ల సమస్యలను పరిష్కరించినట్లు అధికారులు వెల్లడించారు. మిగిలిన డ్రెయిన్లను కూడా త్వరగా శుభ్రం చేయాలని, నీరు నిలిచిన ప్రాంతాల్లో అంటువ్యాధులు ప్రబలకుండా చర్యలు తీసుకోవాలని ఉప ముఖ్యమంత్రి సూచించారు.

పారిశుద్ధ్య పనుల కోసం 15,686 మంది సిబ్బందిని, 2,358 పారిశుద్ధ్య బృందాలను, 1,103 తరలింపు బృందాలను సిద్ధంగా ఉంచినట్లు అధికారులు తెలిపారు.

వీధి దీపాలు, తాగునీటి సరఫరా పునరుద్ధరణ

తుపాను కారణంగా 566 వీధి దీపాలు దెబ్బతినగా, 147 దీపాలను పునరుద్ధరించినట్లు అధికారులు వెల్లడించారు. మిగిలిన దీపాలను కూడా త్వరగా పునరుద్ధరించాలని పవన్ కల్యాణ్ ఆదేశించారు.

తాగునీటి వనరులు కలుషితం కాకుండా జాగ్రత్తలు తీసుకోవాలని, దెబ్బతిన్న పైపులైన్లు, పంపుసెట్లు, ట్యాంకులకు వెంటనే మరమ్మతులు చేపట్టాలని సూచించారు. అవసరమైన ప్రాంతాల్లో ట్యాంకర్ల ద్వారా నీటిని సరఫరా చేయాలని తెలిపారు.

4,325 అత్యవసర పరికరాలు సిద్ధం

పునరుద్ధరణ పనుల కోసం 4,325 అత్యవసర పరికరాలు, వాహనాలను సిద్ధంగా ఉంచినట్లు అధికారులు తెలిపారు. వీటిలో 303 జేసీబీలు, క్రేన్లు, 550 ట్రాక్టర్లు, 233 వాటర్ ట్యాంకర్లు, 487 జనరేటర్లు ఉన్నాయి.

రాష్ట్రస్థాయిలో 24 గంటల కమాండ్ కంట్రోల్ వ్యవస్థతో పాటు జిల్లాల్లో కంట్రోల్ రూమ్‌ల ద్వారా పరిస్థితిని పర్యవేక్షిస్తున్నారు. గ్రామాల్లో సాధారణ పరిస్థితులు నెలకొనే వరకు అధికారులు క్షేత్రస్థాయిలో అందుబాటులో ఉండాలని, సహాయక చర్యలపై ఎప్పటికప్పుడు నివేదికలు అందించాలని పవన్ కల్యాణ్ ఆదేశించారు.