ప్రముఖ టెక్ దిగ్గజం అమెజాన్ మరోసారి ఉద్యోగుల తొలగింపునకు నిర్ణయం తీసుకుంది. సంస్థలో భాగంగా ఉన్న కిండిల్ ఈ-రీడర్లు ఎకో స్మార్ట్ స్పీకర్ల విభాగంలో సుమారు 250 మంది ఉద్యోగులను తొలగించినట్లు సమాచారం. ఉద్యోగులకు ఈ విషయాన్ని ఈ-మెయిల్, ఫోన్ సందేశాల ద్వారా తెలియజేసినట్లు తెలుస్తోంది.
అమెజాన్ వైస్ ప్రెసిడెంట్ చెర్రీ రాబిన్సన్ ఈ ఉద్యోగాల కోతపై ప్రకటన విడుదల చేశారు. సంస్థ నిర్మాణం పనితీరుపై సమగ్ర సమీక్ష నిర్వహించిన అనంతరం ఈ నిర్ణయం తీసుకున్నట్లు వెల్లడించారు. సంస్థను మరింత సమర్థంగా నిర్వహించడంతో పాటు పనితీరును మెరుగుపరచడమే ఈ మార్పుల ఉద్దేశమని పేర్కొన్నారు.
ఏఐ ప్రభావంతో ఉద్యోగాల కోతలు?
కృత్రిమ మేధ (AI) అభివృద్ధి నేపథ్యంలో అమెజాన్ తన కార్యకలాపాల్లో మార్పులు చేస్తోంది. ఈ క్రమంలో ఉద్యోగాల కోతలకు సంబంధించి గత నెలలోనూ సంస్థ అంతర్గత మెమో జారీ చేసినట్లు సమాచారం. సాఫ్ట్‌వేర్ ఇంజినీరింగ్ సహా పలు విభాగాల్లో ఏఐ కీలక పాత్ర పోషించనుందని మారుతున్న సాంకేతిక పరిస్థితులకు అనుగుణంగా ఉద్యోగులు, సంస్థలు తమ పనితీరును మార్చుకోవాల్సి ఉంటుందని కంపెనీ పేర్కొన్నట్లు తెలుస్తోంది.
కొత్త పరికరాల విడుదల సమయంలోనే కోతలు
అమెజాన్ ఐదు కొత్త అలెక్సా ఆధారిత పరికరాలను ప్రకటించిన రోజే ఉద్యోగాల కోతలు చేపట్టడం చర్చనీయాంశంగా మారింది. కొత్త ఉత్పత్తుల్లో ఎకో షో 16 స్మార్ట్ డిస్‌ప్లే, అలెక్సా ఫోటో ఫ్రేమ్, ఎకో టైమ్ బెడ్‌సైడ్ క్లాక్ వంటి పరికరాలు ఉన్నాయి. వీటిని సంస్థ డివైసెస్ విభాగం అభివృద్ధి చేసింది.
గతంలోనూ భారీగా ఉద్యోగుల తొలగింపు
అమెజాన్ ఇటీవల కాలంలో పలుమార్లు ఉద్యోగాల కోతలను ప్రకటించింది. ఈ నెల ప్రారంభంలో ప్రధాన రిటైల్ విభాగంలో దాదాపు 1,000 మంది ఉద్యోగులను తొలగించే నిర్ణయం తీసుకున్నట్లు సమాచారం. గత ఏడాది అక్టోబర్‌లో సుమారు 14,000 మంది ఉద్యోగులను తొలగించినట్లు నివేదికలు వెల్లడించాయి.
మరోవైపు ఏఐ రంగంలో అమెజాన్ భారీగా పెట్టుబడులు పెడుతోంది. ఈ ఏడాది కృత్రిమ మేధ సంబంధిత మౌలిక సదుపాయాల కోసం సుమారు 220 బిలియన్ డాలర్ల వరకు పెట్టుబడి పెట్టే అవకాశం ఉందని అంచనాలు వెలువడుతున్నాయి. ఒకవైపు సాంకేతిక అభివృద్ధి మరోవైపు ఉద్యోగాల కోతలు కొనసాగుతుండటంతో టెక్ రంగంలో ఏఐ ప్రభావంపై చర్చ మరింత పెరుగుతోంది.