మెగా పవర్ స్టార్ రామ్ చరణ్ తన చమత్కారమైన మాటలతో మరోసారి అభిమానులను నవ్వించారు. ‘ఇట్లు అర్జున’ సినిమా ప్రమోషన్లలో భాగంగా నిర్వహించిన మ్యూజికల్ కాన్సర్ట్‌కు ముఖ్య అతిథిగా హాజరైన ఆయన.. నటి అనస్వర రాజన్ గురించి ఆసక్తికర వ్యాఖ్యలు చేశారు. ముఖ్యంగా మెగాస్టార్ చిరంజీవి నటిస్తున్న ‘కాకా’ సినిమాలో అనస్వర పోషిస్తున్న పాత్ర గురించి మాట్లాడుతూ సరదాగా స్పందించారు. ‘చిరు లీక్స్‌’ తరహాలో తాను ఎలాంటి విషయాలనూ బయటపెట్టనని చెప్పడంతో కార్యక్రమంలో నవ్వులు పూశాయి.

‘ఇట్లు అర్జున’ ఈవెంట్‌కు ముఖ్య అతిథిగా రామ్ చరణ్

మహేశ్ ఉప్పల దర్శకత్వంలో అనీష్ హీరోగా పరిచయమవుతున్న చిత్రం ‘ఇట్లు అర్జున’. అనస్వర రాజన్ కథానాయికగా నటిస్తుండగా.. వెంకీ కుడుముల ఈ చిత్రాన్ని నిర్మిస్తున్నారు. అక్కినేని నాగార్జున సమర్పణలో రూపొందిన ఈ సినిమా నవంబర్ 13న ప్రేక్షకుల ముందుకు రానుంది.

సినిమా ప్రమోషన్లలో భాగంగా సోమవారం రాత్రి హైదరాబాద్‌లో ప్రత్యేక మ్యూజికల్ కాన్సర్ట్ నిర్వహించారు. ఈ కార్యక్రమానికి రామ్ చరణ్ ముఖ్య అతిథిగా హాజరయ్యారు. ఈ సందర్భంగా చిత్రబృందాన్ని అభినందించడంతో పాటు తనదైన శైలిలో సరదా వ్యాఖ్యలు చేశారు.

చిరు లీక్స్‌లా నేను లీక్ చేయను!

అనస్వర రాజన్ గురించి మాట్లాడుతూ రామ్ చరణ్ ఆసక్తికర విషయాలు వెల్లడించారు. ‘ఛాంపియన్’ సినిమా సమయంలో అనస్వరను కలిశానని, ఇటీవల ఆమె నటనను స్వయంగా చూశానని చెప్పారు. అంతేకాదు.. చిరంజీవి హీరోగా, బాబీ కొల్లి దర్శకత్వంలో తెరకెక్కుతున్న ‘కాకా’ సినిమాలోనూ అనస్వర నటిస్తున్నారని గుర్తుచేశారు.

‘కాకా సినిమాలో డాడీ, అనస్వర మధ్య ఉన్న రిలేషన్‌షిప్ గురించి మాత్రం నేను చెప్పను. చిరు లీక్స్‌లా నేనేమీ లీక్ చేయను. ఆ సినిమాలో అనస్వర ఓ కీలక పాత్ర పోషిస్తున్నారు’ అంటూ చరణ్ చమత్కరించారు. ఆయన వ్యాఖ్యలతో ఈవెంట్ ప్రాంగణం నవ్వులతో మార్మోగింది. అభిమానులు ఈలలు, కేకలతో సందడి చేశారు.

‘ఇట్లు అర్జున’ బ్లాక్‌బస్టర్ పక్కా: రామ్ చరణ్

‘ఇట్లు అర్జున’ సినిమా గురించి కూడా రామ్ చరణ్ ఎంతో నమ్మకంగా మాట్లాడారు. నవంబర్ 13న విడుదల కానున్న ఈ చిత్రం కచ్చితంగా బ్లాక్‌బస్టర్ అవుతుందని ధీమా వ్యక్తం చేశారు.

‘మీరు రాసిపెట్టుకోండి.. ఇట్లు అర్జున బ్లాక్‌బస్టర్ పక్కా. అనస్వర రాజన్ మళ్లీ సంక్రాంతికి మరో హిట్ కొడతారు. ఆమె ఈ సినిమాలో అద్భుతంగా నటించారు’ అంటూ ప్రశంసించారు.

ప్రస్తుతం రామ్ చరణ్ చేసిన వ్యాఖ్యలకు సంబంధించిన వీడియోలు సోషల్ మీడియాలో వైరల్ అవుతున్నాయి. ముఖ్యంగా ‘కాకా’ సినిమాలో అనస్వర పాత్ర గురించి ఆయన చేసిన సరదా కామెంట్స్ మెగా అభిమానులతో పాటు సినీ ప్రేక్షకుల్లోనూ ఆసక్తిని పెంచుతున్నాయి.

Leave a Reply

Your email address will not be published. Required fields are marked *