ICC Men’s T20 World Cup 2026 చివరి దశకు చేరుకుని అభిమానుల్లో ఉత్కంఠను మరింత పెంచుతోంది. మొత్తం 20 జట్లతో ప్రారంభమైన ఈ ప్రతిష్టాత్మక టోర్నీలో ఇప్పటికే 16 జట్లు నిష్క్రమించగా, నాలుగు బలమైన జట్లు సెమీఫైనల్కు అర్హత సాధించాయి. భారత్, దక్షిణాఫ్రికా, ఇంగ్లాండ్, న్యూజిలాండ్ జట్లు టైటిల్ కోసం చివరి పోరుకు సిద్ధమయ్యాయి. మార్చి 4, 5 తేదీల్లో సెమీఫైనల్ మ్యాచ్లు జరుగుతుండగా, మార్చి 8న ఫైనల్ మ్యాచ్తో ఈ మెగా టోర్నీకి తెరపడనుంది.
సూపర్-8 దశలో అద్భుత ప్రదర్శన చేసిన టీమిండియా, ఆదివారం జరిగిన కీలక మ్యాచ్లో వెస్టిండీస్ను ఓడించి సెమీఫైనల్లో స్థానం సంపాదించింది. గ్రూప్-1 నుంచి ఇప్పటికే దక్షిణాఫ్రికా సెమీస్కు చేరగా, భారత్ రెండో జట్టుగా నిలిచింది. మరోవైపు గ్రూప్-2లో ఇంగ్లాండ్, న్యూజిలాండ్ జట్లు నిలకడైన ఆటతో టాప్-2లో నిలిచి నాకౌట్ దశకు అర్హత సాధించాయి. దీంతో ఇప్పుడు టైటిల్ పోరు ఈ నాలుగు జట్ల మధ్యనే పరిమితమైంది.
గ్రూప్-1లో అగ్రస్థానంలో నిలిచిన దక్షిణాఫ్రికా, గ్రూప్-2లో రెండో స్థానంలో ఉన్న న్యూజిలాండ్తో తొలి సెమీఫైనల్లో తలపడనుంది. ఈ మ్యాచ్ మార్చి 4న కోల్కతాలోని Eden Gardensలో జరగనుంది. భారత కాలమానం ప్రకారం రాత్రి 7 గంటలకు మ్యాచ్ ప్రారంభమవుతుంది. కీలక సమరంగా భావిస్తున్న ఈ పోరు అభిమానుల్లో భారీ ఆసక్తిని రేకెత్తిస్తోంది.
ఇక రెండో సెమీఫైనల్లో భారత్, ఇంగ్లాండ్ జట్లు తలపడనున్నాయి. ఈ మ్యాచ్ మార్చి 5న ముంబైలోని Wankhede Stadiumలో జరగనుంది. ఈ మ్యాచ్ కూడా రాత్రి 7 గంటలకు ప్రారంభమవుతుంది. ఇరు జట్లు సమానంగా బలంగా ఉండటంతో ఈ పోరు హై వోల్టేజ్ మ్యాచ్గా మారనుంది. ఈ రెండు సెమీస్లో విజయం సాధించిన జట్లు ఫైనల్కు అర్హత సాధిస్తాయి.
ఫైనల్ మ్యాచ్ మార్చి 8న అహ్మదాబాద్లోని ప్రపంచంలోనే అతిపెద్ద క్రికెట్ స్టేడియంగా పేరుగాంచిన Narendra Modi Stadiumలో నిర్వహించనున్నారు. ఈ మ్యాచ్తో టీ20 ప్రపంచకప్ 2026 విజేత ఎవరో తేలిపోనుంది.
గత ఎడిషన్తో పోలిస్తే ఈసారి సెమీఫైనల్ జట్లలో ఒక కీలక మార్పు చోటుచేసుకుంది. టీ20 ప్రపంచకప్ 2024లో భారత్, అఫ్ఘానిస్థాన్, దక్షిణాఫ్రికా, ఇంగ్లాండ్ జట్లు సెమీస్కు చేరగా, ఈసారి అఫ్ఘానిస్థాన్ స్థానంలో న్యూజిలాండ్ టాప్-4లో చోటు దక్కించుకుంది. మిగిలిన మూడు జట్లు తమ స్థిరమైన ప్రదర్శనను కొనసాగించాయి.
ప్రస్తుతం డిఫెండింగ్ ఛాంపియన్గా బరిలోకి దిగిన భారత్ మరోసారి టైటిల్ను కాపాడుకుంటుందా, లేక కొత్త ఛాంపియన్ అవతరిస్తుందా అన్నది ఆసక్తికరంగా మారింది. మార్చి 8న జరిగే ఫైనల్ మ్యాచ్తో ఈ ప్రశ్నకు సమాధానం లభించనుంది. క్రికెట్ అభిమానులు ఈ కీలక పోరులను ఆసక్తిగా ఎదురుచూస్తున్నారు.
