తెలంగాణ, ఆంధ్రప్రదేశ్ రాష్ట్రాల మధ్య సీ ప్లేన్ సేవలను ప్రారంభించేందుకు కేంద్ర, రాష్ట్ర ప్రభుత్వాలు చర్యలు వేగవంతం చేస్తున్నాయి. ఇందులో భాగంగా భారత విమానాశ్రయాల సంస్థ (AAI) బృందం ఇటీవల హైదరాబాద్‌లోని హుస్సేన్ సాగర్‌ను సందర్శించి క్షేత్రస్థాయిలో పరిశీలన చేపట్టింది. సీ ప్లేన్‌లు సురక్షితంగా దిగేందుకు, తిరిగి టేకాఫ్ తీసుకునేందుకు అనువైన ప్రాంతాన్ని గుర్తించడంతో పాటు, ప్రయాణికుల సౌకర్యార్థం జెట్టి, టెర్మినల్ వంటి మౌలిక వసతులను ఎక్కడ ఏర్పాటు చేయాలనే అంశాలపై అధ్యయనం చేసింది. ఈ సీ ప్లేన్ సేవలు అందుబాటులోకి వస్తే తెలంగాణ, ఆంధ్రప్రదేశ్ మధ్య రవాణా సౌకర్యాలు మెరుగుపడటంతో పాటు, రెండు రాష్ట్రాల్లో పర్యాటక రంగం మరింత అభివృద్ధి చెందేందుకు అవకాశాలు ఏర్పడనున్నాయి.
మారుతున్న కాలానికి అనుగుణంగా సరికొత్త ఆలోచనలు, వినూత్న ప్రయోగాలు తెరపైకి వస్తున్నాయి. ప్రస్తుతం హైదరాబాద్‌ నుంచి విజయవాడకు బస్సు, రైలు, విమాన మార్గాల్లో సులభంగా చేరుకోవచ్చు. అయితే, నీటి మార్గంలో ప్రయాణించే అవకాశం మాత్రం ఇప్పటివరకు అందుబాటులో లేదు. ఈ లోటును భర్తీ చేస్తూ పర్యాటకులకు సరికొత్త అనుభూతిని అందించేందుకు కేంద్ర, రాష్ట్ర ప్రభుత్వాలు సీ ప్లేన్ సేవలపై దృష్టి సారించాయి. ఈ ప్రణాళికలో భాగంగా హైదరాబాద్‌లోని హుస్సేన్ సాగర్‌పై సీ ప్లేన్ ప్రయాణాన్ని ప్రారంభించి, విజయవాడలోని ప్రకాశం బ్యారేజీ సమీపంలో ల్యాండింగ్‌ చేసే ప్రతిపాదనను పరిశీలిస్తున్నారు. ఈ ఆలోచన కార్యరూపం దాల్చితే హైదరాబాద్‌ నుంచి విజయవాడకు నీటి మార్గంలో ఆకాశయానం చేసే అవకాశం అందుబాటులోకి రానుంది. దీంతో ప్రయాణికులకు సరికొత్త అనుభూతి కలగడమే కాకుండా, రెండు రాష్ట్రాల్లో పర్యాటక రంగానికి మరింత ఊతం లభించే అవకాశం ఉంది.
హుస్సేన్ సాగర్‌లో సీప్లేన్ సేవలకు అడుగులు.. కేంద్రం నిర్ణయంపై ఆసక్తి!
తెలంగాణలో పర్యాటక రంగాన్ని మరింత అభివృద్ధి చేసే దిశగా హుస్సేన్ సాగర్‌లో సీప్లేన్ సేవలను అందుబాటులోకి తీసుకురావాలనే ప్రతిపాదన తెరపైకి వచ్చింది. ముఖ్యమంత్రి రేవంత్ రెడ్డి జులైలో ఢిల్లీ పర్యటన సందర్భంగా కేంద్ర పౌర విమానయాన శాఖ మంత్రితో ఈ అంశంపై చర్చించారు. హుస్సేన్ సాగర్ నుంచి ప్రకాశం బ్యారేజీ వరకు సీప్లేన్ సేవలను ప్రారంభించే అవకాశాలను పరిశీలించాలని ఈ సమావేశంలో ప్రస్తావించినట్లు సమాచారం.
ఈ నేపథ్యంలో భారత విమానాశ్రయాల సంస్థ (ఏఏఐ)కు చెందిన ప్రత్యేక బృందం ఇటీవల హుస్సేన్ సాగర్‌ను సందర్శించింది. హెచ్ఎండీఏ ప్రతినిధులు, రాష్ట్ర పర్యాటక శాఖ అధికారులతో కలిసి క్షేత్రస్థాయిలో పరిశీలనలు నిర్వహించింది. సీప్లేన్‌లు సురక్షితంగా దిగేందుకు, తిరిగి పైకి ఎగిరేందుకు అనువైన ప్రాంతాలను గుర్తించడంతో పాటు ప్రయాణికుల సౌకర్యార్థం జెట్టి, టెర్మినల్ వంటి మౌలిక సదుపాయాలను ఎక్కడ ఏర్పాటు చేయాలనే అంశాలపై అధ్యయనం చేసింది.
సాధ్యాసాధ్యాలపై ఏఏఐ అధ్యయనం
హుస్సేన్ సాగర్‌లో సీప్లేన్ సేవలను ప్రారంభించేందుకు అవసరమైన సాంకేతిక అంశాలు, భద్రతా ప్రమాణాలు, మౌలిక సదుపాయాల కల్పనపై ఏఏఐ బృందం సమగ్రంగా పరిశీలిస్తున్నట్లు తెలుస్తోంది. క్షేత్రస్థాయి అధ్యయనం పూర్తయిన అనంతరం సాధ్యాసాధ్యాలపై కేంద్ర ప్రభుత్వానికి నివేదిక సమర్పించనున్నట్లు సమాచారం. ఈ నివేదిక ఆధారంగా తదుపరి చర్యలు, సీప్లేన్ సేవల ఏర్పాటుపై కేంద్ర, రాష్ట్ర ప్రభుత్వాలు నిర్ణయం తీసుకునే అవకాశం ఉంది.
పర్యాటక రంగానికి కొత్త ఊతం?
హుస్సేన్ సాగర్‌లో సీప్లేన్ సేవలు అందుబాటులోకి వస్తే తెలంగాణతో పాటు ఆంధ్రప్రదేశ్ పర్యాటక రంగానికి కూడా ప్రయోజనం చేకూరే అవకాశం ఉంది. రెండు తెలుగు రాష్ట్రాల్లోని ప్రముఖ పర్యాటక ప్రాంతాలను జలవిమాన మార్గం ద్వారా అనుసంధానించేందుకు కొత్త అవకాశాలు ఏర్పడవచ్చు. పర్యాటకులకు వినూత్న ప్రయాణ అనుభూతిని అందించడంతో పాటు, జలవిమాన రవాణాకు కూడా మార్గం సుగమం కావచ్చు.
అయితే, ఈ ప్రతిపాదన ఇంకా పరిశీలన దశలోనే ఉంది. ఏఏఐ సమర్పించే నివేదిక, దానిపై కేంద్ర ప్రభుత్వం తీసుకునే నిర్ణయం కీలకం కానున్నాయి. హుస్సేన్ సాగర్‌లో సీప్లేన్ సేవలు నిజంగానే అందుబాటులోకి వస్తాయా? తెలుగు రాష్ట్రాల పర్యాటక రంగానికి ఈ ప్రాజెక్టు ఎంతవరకు దోహదపడుతుంది? అన్నది రానున్న రోజుల్లో స్పష్టమయ్యే అవకాశం ఉంది.