సోషల్ మీడియాలో అభ్యంతరకరమైన పోస్టులు చేసిన వారిపై నమోదైన కేసుల దర్యాప్తును ఆంధ్రప్రదేశ్ ప్రభుత్వం వేగవంతం చేసింది. ఇప్పటికే నమోదైన కేసుల్లో నిందితులను గుర్తించేందుకు ప్రత్యేక బృందాలను రంగంలోకి దించింది.
సోషల్ మీడియా పోస్టుల ఆధారంగా సంబంధిత ఐపీ అడ్రస్‌లు, యూఆర్ఎల్‌లను అధికారులు గుర్తించినట్లు సమాచారం. ఈ వివరాల ఆధారంగా ప్రత్యేక బృందాలు ఆయా ప్రాంతాలకు వెళ్లి దర్యాప్తు చేపట్టనున్నాయి. విచారణలో నిందితులను గుర్తించి అదుపులోకి తీసుకునే చర్యలు చేపట్టనున్నారు.
సోషల్ మీడియాలో అభ్యంతరకరమైన పోస్టులపై ప్రభుత్వం కఠినంగా వ్యవహరిస్తుందని ఇప్పటికే స్పష్టం చేసింది. ఈ అంశంపై గత నెలలో డిప్యూటీ సీఎం పవన్ కళ్యాణ్ కూడా స్పందించిన విషయం తెలిసిందే.
ఆంధ్రప్రదేశ్ ప్రభుత్వం సోషల్ మీడియా వ్యవహారంపై కీలక నిర్ణయం తీసుకుంది. గత నెలలో ప్రకటించిన నిర్ణయాన్ని ఇప్పుడు అమల్లోకి తీసుకువచ్చింది. సోషల్ మీడియాలో ఇష్టానుసారంగా అభ్యంతరకరమైన పోస్టులు చేసే వారిపై కఠిన చర్యలు తీసుకునేందుకు ప్రత్యేక బృందాలను రంగంలోకి దించింది.
సోషల్ మీడియాలో ఎవరైనా అభ్యంతరకరమైన లేదా వివాదాస్పద పోస్టులు చేస్తే, వారి వివరాలను గుర్తించి చట్టపరమైన చర్యలు తీసుకునేలా ఈ ప్రత్యేక బృందాలు పనిచేయనున్నాయి. అవసరమైతే నిందితులను అదుపులోకి తీసుకునే చర్యలు కూడా చేపట్టనున్నారు.
గత కొంతకాలంగా ఏపీ ప్రభుత్వం, కూటమి నేతలు, ప్రముఖులను లక్ష్యంగా చేసుకుని కొందరు సోషల్ మీడియాలో అభ్యంతరకరమైన పోస్టులు చేస్తున్నారనే ఆరోపణలు ఉన్నాయి. ఈ నేపథ్యంలో అలాంటి పోస్టులపై ప్రత్యేక నిఘా ఏర్పాటు చేసి, వాటికి అడ్డుకట్ట వేసేందుకు ప్రభుత్వం చర్యలు చేపడుతోంది.
విజయవాడ సైబర్ క్రైమ్ విభాగంలో సోషల్ మీడియాలో అభ్యంతరకరమైన పోస్టులకు సంబంధించి 20కి పైగా కేసులు నమోదైనట్లు సమాచారం. వీటిలో ఎక్కువ కేసులు డిప్యూటీ సీఎం పవన్ కల్యాణ్‌ను లక్ష్యంగా చేసుకుని చేసిన పోస్టులకు సంబంధించినవిగా తెలుస్తోంది. మరికొన్ని కేసులు ఇతర నేతలపై చేసిన అభ్యంతరకరమైన పోస్టులకు సంబంధించినవిగా అధికారులు చెబుతున్నారు.
ఈ కేసులన్నింటినీ ఒకే ఎఫ్‌ఐఆర్ పరిధిలోకి తీసుకువచ్చి దర్యాప్తు కొనసాగిస్తున్నట్లు సమాచారం. పోస్టులకు సంబంధించిన యూఆర్‌ఎల్‌లు, ఐపీ అడ్రస్‌ల ఆధారంగా అనుమానితులను ఇప్పటికే గుర్తించినట్లు తెలుస్తోంది. వారిని అదుపులోకి తీసుకునేందుకు ప్రత్యేక బృందాలను ఏర్పాటు చేశారు.
ఈ స్పెషల్ టీమ్‌లు రాష్ట్రంలోని వివిధ ప్రాంతాలకు వెళ్లి దర్యాప్తు చేపట్టనున్నాయి. పోస్టులు ఎవరు చేశారు? వాటి వెనుక ఎవరైనా ఉన్నారా? వ్యక్తిగతంగా టార్గెట్ చేయడానికి కారణమేంటి? అనే అంశాలపై విచారణ జరపనున్నారు.
అదే సమయంలో సోషల్ మీడియాలో చేసిన పోస్టుల తీవ్రత, వాటి ప్రభావం వంటి అంశాలను కూడా అధికారులు పరిశీలించనున్నారు. దర్యాప్తు అనంతరం నిందితులకు నోటీసులు ఇచ్చి వదిలేయాలా? లేక అరెస్టు చేసి కోర్టులో హాజరుపరచాలా? అనే అంశంపై పోలీసులు నిర్ణయం తీసుకోనున్నారు.