విశాఖపట్నం: గ్రేటర్ విశాఖపట్నం మేయర్ పదవికి జనరల్ మహిళ రిజర్వేషన్ ఖరారు కావడంతో ప్రధాన పార్టీల్లో అభ్యర్థుల ఎంపికపై చర్చ మొదలైంది. కూటమి, వైఎస్సార్‌సీపీ నుంచి పలువురి పేర్లు తెరపైకి వస్తున్నాయి.
టీడీపీ నుంచి తేజస్విని, లావణ్య పేర్లు
టీడీపీ నుంచి నందమూరి బాలకృష్ణ చిన్న కుమార్తె, ఎంపీ శ్రీభరత్ సతీమణి తేజస్విని, ఏపీ టీడీపీ అధ్యక్షుడు పల్లా శ్రీనివాసరావు సతీమణి లావణ్య పేర్లు ప్రముఖంగా వినిపిస్తున్నాయి. వీరితో పాటు మాజీ కార్పొరేటర్ ముక్కా శ్రావణి పేరు కూడా చర్చలో ఉంది. అయితే, ఈ పేర్లపై అధికారిక ప్రకటన వెలువడలేదు.
వైసీపీ నుంచి హిమగౌరి, వరుదు కల్యాణి
వైఎస్సార్‌సీపీ నుంచి మాజీ మంత్రి గుడివాడ అమర్‌నాథ్ సతీమణి హిమగౌరి, ఎమ్మెల్సీ వరుదు కల్యాణి పేర్లు ప్రచారంలో ఉన్నాయి. మాజీ ఎంపీ బీశెట్టి సత్యవతి, మాజీ మంత్రి బొత్స ఝాన్సీ పేర్లు కూడా వినిపిస్తున్నాయి.
రిజర్వేషన్ ఖరారు కావడంతో రెండు పార్టీల అధిష్ఠానాలు అభ్యర్థుల ఎంపికపై దృష్టి సారించనున్నాయి. సామాజిక, రాజకీయ సమీకరణాల ఆధారంగా ఎవరికి అవకాశం దక్కుతుందనేది ఆసక్తికరంగా మారింది. ప్రస్తుతం వినిపిస్తున్న పేర్లన్నీ ఊహాగానాలే కాగా, అధికారిక ప్రకటన కోసం ఎదురుచూపులు కొనసాగుతున్నాయి.