CAT 2026 ద్వారా IIMల్లో MBA ప్రవేశం పొందాలనుకునే అభ్యర్థులకు కీలక సమాచారం. CAP అన్ని IIMలకు సాధారణం కాకపోవడంతో పాటు JAP, CAT స్కోర్ వెయిటేజీ, పని అనుభవం, అకడమిక్ మార్కుల ఆధారంగా అడ్మిషన్ విధానాల్లో మార్పులు చోటుచేసుకున్నాయి. వాటి గురించి తెలుసుకుందాం.
IIM Admission 2026: కామన్ అడ్మిషన్ టెస్ట్ (CAT) 2026కు ఆన్లైన్ దరఖాస్తు ప్రక్రియ ఆగస్టు 3, 2026న ప్రారంభమైంది. ఈ ఏడాది CAT 2026 పరీక్షను ఐఐఎం ఇండోర్ నిర్వహిస్తోంది. నవంబర్ 29, 2026న దేశవ్యాప్తంగా వివిధ పరీక్షా కేంద్రాల్లో ఈ పరీక్ష జరగనుంది. CAT స్కోర్ ఆధారంగా ప్రతిష్టాత్మక ఇండియన్ ఇన్స్టిట్యూట్స్ ఆఫ్ మేనేజ్మెంట్ (IIMs)తో పాటు ప్రముఖ బిజినెస్ స్కూళ్లలో MBA, ఇతర మేనేజ్మెంట్ ప్రోగ్రామ్లలో ప్రవేశానికి అవకాశం ఉంటుంది. అయితే, CATలో మంచి స్కోర్ సాధించడం మాత్రమే IIMలో సీటు పొందేందుకు సరిపోదు. ఇటీవలి కాలంలో పలు IIMలు తమ అడ్మిషన్ విధానాల్లో మార్పులు చేశాయి. అభ్యర్థులను షార్ట్లిస్ట్ చేయడం నుంచి తుది ఎంపిక వరకు ఒక్కో IIM ఒక్కో విధానాన్ని అనుసరిస్తోంది.
IMల ప్రవేశ ప్రక్రియలో కీలకమైన 5 మార్పులు
1. అన్ని IIMలకు CAP ఇకపై సాధారణ ప్రక్రియ కాదు
గతంలో కొన్ని IIMలు Common Admission Process (CAP) ద్వారా అభ్యర్థుల ఎంపికను చేపట్టేవి. అయితే ఇప్పుడు CAP అన్ని IIMలకు ఉమ్మడి ప్రక్రియగా లేదు. ఉదాహరణకు, IIM బోధ్ గయా, IIM జమ్మూ, IIM సిర్మౌర్ వంటి సంస్థలు CAP 2026లో పాల్గొంటున్నాయి. మరోవైపు, కొన్ని IIMలు తమ సొంత అడ్మిషన్ విధానాలను అమలు చేస్తున్నాయి. ఉదాహరణకు, IIM ఉదయ్పూర్ ప్రత్యేక ఎంపిక ప్రక్రియను అనుసరిస్తోంది. ఇందులో CAT పనితీరుతో పాటు రాత పరీక్ష, వ్యక్తిగత ఇంటర్వ్యూ వంటి అంశాలకు ప్రాధాన్యత ఉంటుంది.
2. నాలుగు IIMలు కలిసి JAPను ప్రారంభించాయి
IIM కాశీపూర్, IIM రాయ్పూర్, IIM రాంచీ, IIM తిరుచిరాపల్లి కలిసి Joint Admission Process (JAP) ద్వారా అభ్యర్థుల ఎంపికను చేపడుతున్నాయి. అయితే, ఈ నాలుగు IIMలకు ఉమ్మడి ప్రక్రియ ఉన్నప్పటికీ, తుది మెరిట్ జాబితా, వెయిటేజీలు, ఎంపిక ప్రమాణాలు మాత్రం ఒక్కో సంస్థకు భిన్నంగా ఉండవచ్చు. అందువల్ల అభ్యర్థులు ప్రతి IIM అధికారిక అడ్మిషన్ విధానాన్ని విడిగా పరిశీలించడం అవసరం.
3. IIM ఇండోర్ CAT స్కోర్కు అధిక ప్రాధాన్యత
2026-28 విద్యా సంవత్సరానికి IIM ఇండోర్ తన ప్రవేశ విధానంలో కొన్ని కీలక మార్పులు చేసింది. MBA ప్రవేశాల్లో CAT స్కోర్కు గతంతో పోలిస్తే అధిక ప్రాధాన్యత ఇచ్చింది. అదే సమయంలో పని అనుభవానికి కూడా వెయిటేజీ కల్పించింది. మరోవైపు, 10వ తరగతి మార్కులకు ఇచ్చే ప్రాధాన్యతను తగ్గించింది. దీంతో అభ్యర్థుల CAT పనితీరు, పని అనుభవం వంటి అంశాలు మరింత కీలకంగా మారాయి.
4. అధిక CAT స్కోర్ ఉన్నా అడ్మిషన్ ఖాయం కాదు
CATలో మంచి పర్సంటైల్ సాధించడం ముఖ్యమే అయినప్పటికీ, దానితో IIMలో సీటు ఖరారవుతుందని చెప్పలేం. అభ్యర్థి 10వ, 12వ తరగతి, గ్రాడ్యుయేషన్లో సాధించిన మార్కులు, CAT సెక్షనల్ స్కోర్లు, పని అనుభవం, ఇతర ఎంపిక దశల్లో ప్రతిభ వంటి అంశాలను కూడా అనేక IIMలు పరిగణనలోకి తీసుకుంటాయి. అందుకే CATలో మంచి స్కోర్తో పాటు మొత్తం ప్రొఫైల్ను బలంగా ఉంచుకోవడం కీలకం.
5. ఒక్కో IIMకు ఒక్కో ఎంపిక ప్రమాణం
ప్రస్తుతం అన్ని IIMలు ఒకే విధమైన అడ్మిషన్ విధానాన్ని అనుసరించడం లేదు. కొన్ని సంస్థలు CAT స్కోర్కు ఎక్కువ వెయిటేజీ ఇస్తుంటే, మరికొన్ని అకడమిక్ రికార్డు, పని అనుభవం, రాత పరీక్ష, వ్యక్తిగత ఇంటర్వ్యూ వంటి అంశాలకు కూడా ప్రాధాన్యత ఇస్తున్నాయి. అందువల్ల CAT 2026 అభ్యర్థులు కేవలం CAT పరీక్షపైనే దృష్టి పెట్టకుండా, తాము లక్ష్యంగా పెట్టుకున్న IIMల అధికారిక అడ్మిషన్ ప్రమాణాలు, వెయిటేజీలు, షార్ట్లిస్టింగ్ విధానం కూడా ముందుగానే తెలుసుకోవాలి.
చివరగా చెప్పాలంటే.. CAT 2026 ద్వారా IIMల్లో MBA ప్రవేశం పొందాలనుకునే అభ్యర్థులకు ఈ మార్పులు ఎంతో కీలకం. “మంచి CAT స్కోర్ = IIM సీటు’’ అనే విధానం ఇప్పుడు అన్ని IIMలకు వర్తించదు. CAT స్కోర్తో పాటు అకడమిక్ ప్రొఫైల్, పని అనుభవం, ఇంటర్వ్యూ, రాత పరీక్ష వంటి అంశాలు కూడా తుది ఎంపికలో కీలక పాత్ర పోషించవచ్చు. కాబట్టి అభ్యర్థులు తమ లక్ష్య IIMకు సంబంధించిన తాజా అడ్మిషన్ నిబంధనలను తప్పనిసరిగా పరిశీలించాలి.
