మరో మూడు నెలల్లో అసెంబ్లీ ఎన్నికలు జరగనున్న పంజాబ్‌లో రాజకీయ వాతావరణం వేడెక్కింది. ఆప్ ప్రభుత్వ హయాంలో బదిలీలు, పోస్టింగ్‌ల వ్యవహారాల్లో అక్రమాలు, అవినీతి చోటుచేసుకున్నాయన్న ఆరోపణలపై హైకోర్టు విచారణకు ఆదేశించింది. ఈ నేపథ్యంలో కేంద్ర దర్యాప్తు సంస్థ కేసు నమోదు చేసి దర్యాప్తును ముమ్మరం చేసింది.
దర్యాప్తులో భాగంగా పంజాబ్ ముఖ్యమంత్రి కార్యాలయంలో సోదాలు నిర్వహించడం తీవ్ర కలకలం రేపింది. ఈ పరిణామంపై అధికార ఆమ్ ఆద్మీ పార్టీ (ఆప్), బీజేపీ మధ్య మాటల యుద్ధం మరింత ముదిరింది.
తమ ప్రభుత్వానికి, పార్టీకి ప్రజల్లో పెరుగుతున్న ఆదరణను చూసి బీజేపీ ఓర్వలేకపోతోందని పంజాబ్ సీఎం భగవంత్ మాన్ ఆరోపించారు. రానున్న ఎన్నికలను దృష్టిలో పెట్టుకుని ఆప్ ప్రభుత్వ ప్రతిష్ఠను దెబ్బతీసేందుకు కేంద్ర దర్యాప్తు సంస్థలను ఉపయోగించుకుంటున్నారని ఆయన మండిపడ్డారు.
పంజాబ్‌లో అధికార ఆప్ ప్రభుత్వానికి సంబంధించిన వ్యవహారాల్లో సీబీఐ ఆకస్మిక సోదాలు నిర్వహించింది. బదిలీలు, పోస్టింగ్‌లు, ప్రభుత్వ నిర్ణయాల్లో అక్రమాలు, అవినీతి జరిగాయన్న ఆరోపణలపై విచారణ కొనసాగుతున్న వేళ ఈ పరిణామం చోటుచేసుకోవడం ప్రాధాన్యత సంతరించుకుంది. అవినీతి కేసు దర్యాప్తులో భాగంగా చండీగఢ్, మొహాలీ, గుర్దాస్‌పూర్, లూధియానా, పాటియాలా, సంగ్రూర్, జలంధర్ తదితర ప్రాంతాల్లో మొత్తం ఎనిమిది చోట్ల సీబీఐ అధికారులు ఏకకాలంలో సోదాలు నిర్వహించారు.
ఈ తనిఖీల్లో ల్యాప్‌టాప్‌లు, సెల్‌ఫోన్లు, కీలక పత్రాలను అధికారులు స్వాధీనం చేసుకున్నట్లు సమాచారం. బదిలీలు, పోస్టింగ్‌లలో అక్రమాలు, లంచాలు, అధికార దుర్వినియోగానికి సంబంధించిన ఆధారాల కోసం స్వాధీనం చేసుకున్న ఎలక్ట్రానిక్ పరికరాలు, పత్రాలను అధికారులు పరిశీలిస్తున్నారు.
‘బీజేపీ భయపడుతోంది’.. సీఎం మాన్ ఆగ్రహం
రాబోయే అసెంబ్లీ ఎన్నికల నేపథ్యంలో తమ పార్టీకి, ప్రభుత్వానికి ప్రజల్లో పెరుగుతున్న ఆదరణను చూసి బీజేపీ భయపడుతోందని పంజాబ్ సీఎం భగవంత్ మాన్ ఆరోపించారు. రాజకీయ కక్ష సాధింపులో భాగంగానే కేంద్ర దర్యాప్తు సంస్థలను ఉపయోగించుకుంటున్నారని మండిపడ్డారు.
‘పంజాబ్ ఎన్నికల కోసం బీజేపీ తన సన్నాహాలను ప్రారంభించింది. అందులో భాగంగానే నా క్యాంప్ ఆఫీస్‌పై సీబీఐ సోదాలు నిర్వహించింది. నన్ను, పంజాబ్ ప్రభుత్వాన్ని అప్రతిష్ఠపాలు చేసేందుకు ఇకపై ఈడీ, సీబీఐ వంటి కేంద్ర దర్యాప్తు సంస్థలను మరింతగా ఉపయోగించుకుంటారు. అయితే, పంజాబ్ ప్రజలు మాపై చూపిస్తున్న ప్రేమాభిమానాలను చూసే బీజేపీ భయపడుతోంది’ అని భగవంత్ మాన్ ఎక్స్ వేదికగా తీవ్రస్థాయిలో స్పందించారు.
సీబీఐ దాడులపై కేజ్రీవాల్ విమర్శలు
పంజాబ్ సీఎం కార్యాలయంపై సీబీఐ దాడుల నేపథ్యంలో ఆప్ కన్వీనర్, మాజీ ముఖ్యమంత్రి అరవింద్ కేజ్రీవాల్ కేంద్రంలోని బీజేపీ ప్రభుత్వంపై తీవ్ర విమర్శలు చేశారు. ఎన్నికలకు కేవలం రెండు నెలల ముందు ముఖ్యమంత్రి కార్యాలయంపై సీబీఐ దాడులు చేయడం బీజేపీ నైరాశ్యానికి నిదర్శనమని ఆరోపించారు.
కేంద్రంలో బీజేపీ ప్రభుత్వం అధికారంలోకి వచ్చినప్పటి నుంచి రైతు ఉద్యమం, పంజాబ్ నీటి సమస్య, పంజాబ్ యూనివర్సిటీ వివాదం వంటి అంశాల్లో పంజాబీలను ఇబ్బందులకు గురిచేస్తోందని కేజ్రీవాల్ విమర్శించారు. తాజాగా ప్రజలు ఎన్నుకున్న ముఖ్యమంత్రిని సైతం వేధించే స్థాయికి కేంద్రం దిగజారిందని మండిపడ్డారు.
బీజేపీ కౌంటర్
కేజ్రీవాల్ వ్యాఖ్యలపై బీజేపీ నేత, ఇటీవల కాంగ్రెస్ నుంచి బీజేపీలో చేరిన సీనియర్ నాయకుడు సునీల్ జాఖడ్ స్పందించారు. సీబీఐ సోదాలకు ఆదేశాలు ఇవ్వడం కేంద్ర ప్రభుత్వ పరిధిలోని అంశం కాదని ఆయన స్పష్టం చేశారు.
పంజాబ్‌లో జరుగుతున్న అవకతవకలపై దర్యాప్తు చేయాలని హైకోర్టే స్వయంగా ఆదేశించిందని జాఖడ్ పేర్కొన్నారు. ఈ విచారణను కోర్టు స్వయంగా పర్యవేక్షిస్తోందని తెలిపారు.
“మీరు నిజాయితీపరులైతే భయపడాల్సిన అవసరం ఏముంది? మీరు చేసిన తప్పులకు సమాధానం చెప్పాల్సిందే. పంజాబ్ నుంచి దోచుకున్న ప్రతి పైసాకు లెక్క తేలుస్తాం” అంటూ భగవంత్ మాన్ ప్రభుత్వంపై జాఖడ్ తీవ్ర వ్యాఖ్యలు చేశారు.