భారత ప్రభుత్వ రైల్వే మంత్రిత్వ శాఖ పరిధిలోని రైల్వే రిక్రూట్‌మెంట్ బోర్డులు (RRB) గ్రాడ్యుయేట్ స్థాయి నాన్-టెక్నికల్ పాపులర్ కేటగిరీస్ (NTPC)లో 3,477 ఉద్యోగాల భర్తీకి నోటిఫికేషన్ విడుదల చేశాయి. ఈ పోస్టులకు అక్టోబర్ 8 నుంచి ఆన్‌లైన్ దరఖాస్తుల ప్రక్రియ ప్రారంభం కానుంది.
ఈసారి దరఖాస్తు ప్రక్రియలో ఆధార్ ధృవీకరణను రైల్వే బోర్డు తప్పనిసరి చేసింది. అభ్యర్థులు దరఖాస్తు చేసుకునే ముందు తమ ఆధార్‌లోని వ్యక్తిగత వివరాలను పదో తరగతి సర్టిఫికెట్‌లో ఉన్న వివరాలతో సరిపోలేలా అప్‌డేట్ చేసుకోవాలని సూచించింది.
అభ్యర్థులు దరఖాస్తు ప్రక్రియలో ఎలాంటి ఇబ్బందులు ఎదుర్కోకుండా ముందుగానే ఆధార్ వివరాలను పరిశీలించుకోవడం మంచిది. ఉద్యోగాల సంఖ్య, అర్హతలు, వయోపరిమితి, దరఖాస్తు విధానం, ఫీజు, ఎంపిక ప్రక్రియ తదితర పూర్తి వివరాలను అధికారిక RRB నోటిఫికేషన్‌లో పరిశీలించవచ్చు.
భారత ప్రభుత్వ రైల్వే మంత్రిత్వ శాఖ పరిధిలోని రైల్వే రిక్రూట్‌మెంట్ బోర్డు (RRB) నిరుద్యోగులకు శుభవార్త అందించింది. నాన్-టెక్నికల్ పాపులర్ కేటగిరీస్ (NTPC)లో గ్రాడ్యుయేట్ స్థాయి పోస్టుల భర్తీకి సంబంధించి కేంద్ర ఉపాధి నోటిఫికేషన్‌ను విడుదల చేసింది.
దేశవ్యాప్తంగా ఉన్న వివిధ RRB ప్రాంతాల పరిధిలో గ్రాడ్యుయేట్ స్థాయి NTPC పోస్టులను భర్తీ చేయనున్నారు. మొత్తం 3,477 తాత్కాలిక ఖాళీలను ఈ నియామక ప్రక్రియ ద్వారా భర్తీ చేయనున్నట్లు రైల్వే రిక్రూట్‌మెంట్ బోర్డు అధికారికంగా ప్రకటించింది. అర్హత కలిగిన అభ్యర్థులు ఈ అవకాశాన్ని సద్వినియోగం చేసుకోవాలని సూచించింది
రేపటి నుంచే ఆన్‌లైన్ దరఖాస్తుల స్వీకరణ
ఈ నియామక ప్రక్రియకు అర్హత కలిగిన అభ్యర్థుల నుంచి కేవలం ఆన్‌లైన్ విధానంలోనే దరఖాస్తులను స్వీకరించనున్నారు. అభ్యర్థులు తమ దరఖాస్తులను సమర్పించేందుకు RRB అధికారిక దరఖాస్తు వెబ్సైట్ను సందర్శించాలి.
ఆన్‌లైన్ దరఖాస్తుల ప్రక్రియ అక్టోబర్ 8న ప్రారంభమై, నవంబర్ 6వ తేదీ రాత్రి 11:59 గంటల వరకు కొనసాగుతుంది. అభ్యర్థుల వయస్సును 2027 జనవరి 1వ తేదీని ప్రామాణికంగా తీసుకుని లెక్కించనున్నారు.
అభ్యర్థుల వయోపరిమితి, విద్యార్హతలు, వైద్య ప్రమాణాలు (Medical Standards) తదితర అర్హతలకు సంబంధించిన పూర్తి వివరాలను రైల్వే రిక్రూట్‌మెంట్ బోర్డు విడుదల చేయనున్న వివరణాత్మక నోటిఫికేషన్‌లో పేర్కొంటుంది. అభ్యర్థులు అధికారిక వెబ్సైట్ను క్రమం తప్పకుండా పరిశీలిస్తూ తాజా సమాచారాన్ని తెలుసుకోవాలని సూచించారు.
దరఖాస్తుదారులకు ఆధార్ వెరిఫికేషన్ తప్పనిసరి
రైల్వే నియామక ప్రక్రియలో దరఖాస్తు దశలోనే ఆధార్ ఆధారిత ప్రాథమిక ధృవీకరణను పూర్తి చేయాలని రైల్వే బోర్డులు స్పష్టం చేశాయి. నియామక ప్రక్రియలోని ప్రతి దశలో అభ్యర్థుల వివరాలను పూర్తిస్థాయిలో పరిశీలించడం వల్ల కలిగే ఆలస్యం, అభ్యర్థులకు ఎదురయ్యే అసౌకర్యాన్ని నివారించేందుకు ఈ విధానాన్ని అమలు చేస్తున్నట్లు తెలిపాయి.
ఆధార్ ధృవీకరణ విజయవంతం కావాలంటే అభ్యర్థులు కొన్ని ముఖ్యమైన అంశాలను తప్పనిసరిగా గమనించాలని అధికారులు సూచించారు. ఆధార్ కార్డులో నమోదైన పేరు, పుట్టిన తేదీ.. 10వ తరగతి (ఎస్సెస్సీ) ఉత్తీర్ణత సర్టిఫికెట్‌లో ఉన్న పూర్తి పేరు, పుట్టిన తేదీతో పూర్తిగా సరిపోలేలా ఉండాలని పేర్కొన్నారు.
అదేవిధంగా, రైల్వే ఉద్యోగానికి దరఖాస్తు చేసుకునే ముందు ఆధార్‌లో తాజా ఫొటోతో పాటు బయోమెట్రిక్ వివరాలను కూడా అప్‌డేట్ చేసుకోవాలని అధికారులు సూచించారు. ఈ వివరాలు సరిగ్గా ఉండటం ద్వారా ఆధార్ ఆధారిత వెరిఫికేషన్ ప్రక్రియ సులభంగా పూర్తయ్యే అవకాశం ఉంటుందని తెలిపారు.