ప్రపంచవ్యాప్తంగా టీకి ఎంతో డిమాండ్ ఉంది. అనేక దేశాల్లో తేయాకు సాగు, ఉత్పత్తి విస్తృతంగా జరుగుతున్నప్పటికీ.. ప్రపంచంలో అత్యధిక తేయాకు ఉత్పత్తి చేసే దేశంగా ఒక దేశం అగ్రస్థానంలో కొనసాగుతోంది. ఇక టీ ఉత్పత్తిలో భారత్ కూడా కీలక స్థానంలో ఉంది. ప్రపంచ తేయాకు మార్కెట్‌లో ఏ దేశం మొదటి స్థానంలో ఉంది? భారత్ ఎన్నో స్థానంలో ఉందో తెలుసుకోవాలంటే ఈ కథనం పూర్తిగా చదవండి.

ప్రపంచ టీ ఉత్పత్తిలో చైనా తన ఆధిపత్యాన్ని కొనసాగిస్తోంది. 2024లో ప్రపంచవ్యాప్తంగా మొత్తం 7.05 మిలియన్ మెట్రిక్ టన్నుల టీ ఉత్పత్తి కాగా, అందులో చైనా వాటా 3.74 మిలియన్ టన్నులతో సుమారు 53 శాతంగా ఉంది. దీంతో ప్రపంచంలోనే అత్యధిక టీ ఉత్పత్తి చేసే దేశంగా చైనా తొలి స్థానంలో నిలిచింది. భారత్ 1.28 మిలియన్ టన్నుల ఉత్పత్తితో రెండో స్థానాన్ని దక్కించుకుంది. మొత్తంగా ప్రపంచ టీ ఉత్పత్తిలో ఆసియా దేశాల ప్రాధాన్యం స్పష్టంగా కనిపిస్తోంది. అయితే వాతావరణ మార్పులు, గ్రీన్ టీతో పాటు బ్లాక్ టీకి పెరుగుతున్న డిమాండ్ భవిష్యత్‌లో టీ ఉత్పత్తిపై గణనీయమైన ప్రభావం చూపే అవకాశం ఉంది.

ప్రపంచవ్యాప్తంగా ఉత్పత్తి అవుతున్న మొత్తం తేయాకులో సగానికి పైగా వాటా చైనా దేశానిదే కావడం విశేషం. ప్రపంచవ్యాప్తంగా కోట్లాది మంది ప్రతిరోజూ ఆస్వాదించే టీకి సంబంధించి తాజాగా ఆసక్తికరమైన గణాంకాలు వెలుగులోకి వచ్చాయి. గత రెండు దశాబ్దాల్లో ప్రపంచ తేయాకు ఉత్పత్తి దాదాపు రెట్టింపైంది. 2024లో ప్రపంచవ్యాప్తంగా రికార్డు స్థాయిలో 7.05 మిలియన్ మెట్రిక్ టన్నుల టీ ఉత్పత్తి కాగా, అందులో చైనా వాటా ఏకంగా 53 శాతంగా ఉంది. అంతేకాదు, ప్రపంచ తేయాకు ఉత్పత్తిలో 93 శాతం వాటాను కేవలం ఎనిమిది దేశాలు కలిగి ఉండటం గమనార్హం.

ప్రపంచ టీ ఉత్పత్తిలో చైనా ఆధిపత్యం

ప్రపంచ తేయాకు ఉత్పత్తిలో ఆసియా దేశం చైనా అగ్రస్థానంలో కొనసాగుతోంది. సుమారు 3.74 మిలియన్ టన్నుల ఉత్పత్తితో, ప్రపంచ మొత్తం టీ ఉత్పత్తిలో సగానికి పైగా వాటాను చైనా సొంతం చేసుకుంది. తేయాకు పుట్టినిల్లు అయిన చైనా ఈ రంగంలో తన ఆధిపత్యాన్ని కొనసాగిస్తూ దూసుకెళ్తోంది.

మరోవైపు భారత్ సుమారు 1.28 మిలియన్ టన్నుల తేయాకు ఉత్పత్తితో ప్రపంచంలో రెండో స్థానంలో నిలిచింది. అయితే ఇది ప్రపంచ మొత్తం ఉత్పత్తిలో దాదాపు 18 శాతం మాత్రమే. అంటే భారత్‌తో పోలిస్తే చైనా దాదాపు మూడు రెట్లు అధికంగా తేయాకును ఉత్పత్తి చేస్తూ అగ్రస్థానంలో కొనసాగుతోంది.

టీ ఉత్పత్తిలో కెన్యా, టర్కీ ప్రత్యేకత

ఆసియా వెలుపల ఉన్న ఆఫ్రికా దేశం కెన్యా ప్రపంచ టీ ఉత్పత్తిలో మూడో స్థానాన్ని దక్కించుకుంది. ప్రపంచ ఉత్పత్తిలో 8 శాతం వాటాతో సుమారు 599 వేల మెట్రిక్ టన్నుల టీని ఉత్పత్తి చేస్తోంది. భారత్ కంటే తక్కువ పరిమాణంలో టీ ఉత్పత్తి చేస్తున్నప్పటికీ, ప్రపంచ టీ ఎగుమతుల్లో మాత్రం కెన్యా అగ్రస్థానంలో ఉండటం విశేషం.

ఇక టర్కీ టీ ఉత్పత్తిలో నాలుగో స్థానంలో ఉన్నప్పటికీ, టీ వినియోగంలో మాత్రం ప్రపంచంలోనే ముందంజలో ఉంది. అక్కడ ఒక్కో వ్యక్తి ఏడాదికి సగటున మూడు కిలోలకుపైగా టీ తాగుతున్నట్లు గణాంకాలు సూచిస్తున్నాయి. టర్కీ తర్వాత శ్రీలంక, వియత్నాం, ఇండోనేషియా, జపాన్ దేశాలు వరుస స్థానాల్లో నిలిచాయి.

భారత్, చైనా దేశాలు భారీ స్థాయిలో తేయాకును ఉత్పత్తి చేస్తున్నప్పటికీ, వాటి ఎగుమతులు మాత్రం ఆశించిన స్థాయిలో లేవు. ముఖ్యంగా భారత్‌లో ఉత్పత్తి అయ్యే టీకి సగానికి పైగా దేశీయంగానే వినియోగం జరుగుతోంది. దీంతో అంతర్జాతీయ ఎగుమతి మార్కెట్‌లో భారత్ కొంత వెనుకబడి, ప్రధానంగా దేశీయ డిమాండ్‌ను తీర్చడంపైనే దృష్టి సారిస్తోంది.

మొత్తంగా చూస్తే ప్రపంచ టీ ఉత్పత్తిలో ఆసియా దేశాల ఆధిపత్యం స్పష్టంగా కనిపిస్తోంది. అయితే వాతావరణ మార్పులు, సాగు పరిస్థితుల్లో వస్తున్న మార్పుల కారణంగా రానున్న రోజుల్లో ఉత్పత్తి గణాంకాల్లోనూ మార్పులు చోటుచేసుకునే అవకాశం ఉంది. మరోవైపు ప్రపంచవ్యాప్తంగా గ్రీన్ టీ, బ్లాక్ టీకి ఆదరణ పెరుగుతున్న నేపథ్యంలో భవిష్యత్తులో టీ ఉత్పత్తి, వినియోగం మరింత విస్తరించే అవకాశాలు కనిపిస్తున్నాయి.