హైదరాబాద్లోని కోకాపేటలో నిర్మించిన ప్రీమియం మల్టీప్లెక్స్ ‘అల్లు సినిమాస్’ త్వరలో ప్రారంభానికి సిద్ధమవుతోంది. ప్రముఖ నిర్మాత అల్లు అరవింద్ నిర్మించిన ఈ అత్యాధునిక థియేటర్ ప్రారంభోత్సవం మార్చి 12న జరగనున్నట్లు సమాచారం. ఈ వేడుకకు తెలంగాణ ముఖ్యమంత్రి రేవంత్ రెడ్డి ముఖ్య అతిథిగా హాజరుకానున్నారని ప్రచారం సాగుతోంది. నాలుగు స్క్రీన్లతో రూపొందిన ఈ మల్టీప్లెక్స్లో డాల్బీ అట్మాస్ సౌండ్, లేజర్ ప్రొజెక్షన్ వంటి ఆధునిక సాంకేతిక సదుపాయాలు ఏర్పాటు చేశారు. ప్రారంభోత్సవం అనంతరం ఉగాది పండుగ సందర్భంగా మార్చి 19న ప్రేక్షకులకు అందుబాటులోకి తీసుకురావాలని యాజమాన్యం భావిస్తున్నట్లు తెలుస్తోంది.
తెలుగు సినీ పరిశ్రమలో స్టైలిష్ స్టార్గా ప్రత్యేక గుర్తింపు సంపాదించిన అల్లు అర్జున్ ప్రస్తుతం సినిమాలతో పాటు వ్యాపార రంగంలో కూడా తన ప్రభావాన్ని చూపిస్తున్నారు. ఇప్పటికే మల్టీప్లెక్స్ రంగంలో అడుగుపెట్టిన ఆయన, అమీర్పేటలో ఏషియన్ సినిమాస్ భాగస్వామ్యంతో ఒక లగ్జరీ మల్టీప్లెక్స్ను నిర్మించారు. తాజాగా అల్లు అరవింద్ ఆధ్వర్యంలో హైదరాబాద్లో మరో అత్యాధునిక మల్టీప్లెక్స్ నిర్మాణం పూర్తయింది. కోకాపేటలో నిర్మించిన ‘అల్లు సినిమాస్’ అనే ఈ ప్రీమియం థియేటర్ త్వరలోనే ప్రేక్షకులకు అందుబాటులోకి రానుంది.
సమాచారం ప్రకారం మార్చి 12న ఈ మల్టీప్లెక్స్ ప్రారంభోత్సవ కార్యక్రమం నిర్వహించనున్నారు. ఈ కార్యక్రమానికి తెలంగాణ ముఖ్యమంత్రి రేవంత్ రెడ్డి ముఖ్య అతిథిగా హాజరవుతారనే ప్రచారం జరుగుతోంది. అలాగే సినిమాటోగ్రఫీ మంత్రి కోమటిరెడ్డి వెంకట్ రెడ్డి కూడా ఈ వేడుకకు హాజరయ్యే అవకాశముందని సమాచారం.
అయితే దీనిపై అధికారిక ప్రకటన ఇంకా వెలువడాల్సి ఉంది. అయినప్పటికీ ముఖ్యమంత్రి చేతుల మీదుగా ఈ మల్టీప్లెక్స్ ప్రారంభం కానుందనే వార్త ప్రస్తుతం సోషల్ మీడియాలో విస్తృతంగా చర్చనీయాంశమవుతోంది. ప్రారంభోత్సవం అనంతరం కొన్ని రోజుల పాటు టెక్నికల్ టెస్టింగ్ నిర్వహించి, ఉగాది సందర్భంగా మార్చి 19న థియేటర్ను ప్రజలకు అందుబాటులోకి తీసుకురావాలని యాజమాన్యం యోచిస్తున్నట్లు తెలుస్తోంది.
‘అల్లు సినిమాస్’ మల్టీప్లెక్స్ను అత్యాధునిక సాంకేతిక సదుపాయాలతో నిర్మించారు. ఇందులో మొత్తం నాలుగు స్క్రీన్లు ఉండగా, ప్రతి స్క్రీన్లో డాల్బీ అట్మాస్ సౌండ్ సిస్టమ్, డాల్బీ విజన్ 3డీ ప్రొజెక్షన్, లేజర్ ప్రొజెక్షన్ టెక్నాలజీ వంటి ప్రపంచ స్థాయి సౌకర్యాలు ఏర్పాటు చేశారు. సుమారు 75 అడుగుల వెడల్పుతో భారీ డాల్బీ స్క్రీన్ ఏర్పాటు చేయడం ఈ మల్టీప్లెక్స్కు ప్రత్యేక ఆకర్షణగా నిలుస్తోంది. ‘ధురంధర్ 2’, ‘ఉస్తాద్ భగత్ సింగ్’ వంటి పెద్ద సినిమాలతో ఈ మల్టీప్లెక్స్ ప్రారంభమయ్యే అవకాశం ఉందని సమాచారం.
ఇప్పటికే అల్లు కుటుంబానికి చెందిన లగ్జరీ మల్టీప్లెక్స్ AAA సినిమాస్ కూడా మంచి ఆదరణ పొందుతోంది. అమీర్పేటలో ఏషియన్ గ్రూప్ భాగస్వామ్యంతో అల్లు అర్జున్ నిర్మించిన ఈ మల్టీప్లెక్స్ 2023లో ప్రారంభమైంది. ఇందులో ఐదు స్క్రీన్లు, డాల్బీ అట్మాస్ సౌండ్ సిస్టమ్, లేజర్ ప్రొజెక్షన్, భారీ స్క్రీన్ వంటి సదుపాయాలు ఉన్నాయి. విస్తృత లెగ్ స్పేస్, లగ్జరీ సీటింగ్ వంటి సౌకర్యాలతో ఇది సినీ అభిమానులను ఆకట్టుకుంది. ఇప్పుడు కోకాపేటలో ‘అల్లు సినిమాస్’ ప్రారంభం కావడంతో హైదరాబాద్లో అల్లు కుటుంబం మల్టీప్లెక్స్ వ్యాపారాన్ని మరింత విస్తరించనుంది.
ఇదిలా ఉండగా, ఇటీవల అల్లు అర్జున్ మరియు రేవంత్ రెడ్డి మధ్య సాన్నిహిత్యం పెరుగుతున్నట్లు రాజకీయ, సినీ వర్గాల్లో చర్చలు వినిపిస్తున్నాయి. ‘పుష్ప 2’ సినిమా విడుదల సమయంలో జరిగిన తొక్కిసలాట ఘటన నేపథ్యంలో ప్రభుత్వం తీసుకున్న చర్యలు, అల్లు అర్జున్ అరెస్టు వంటి పరిణామాలు అప్పట్లో పెద్ద చర్చకు దారితీశాయి. అసెంబ్లీలో రేవంత్ రెడ్డి చేసిన వ్యాఖ్యలు, అనంతరం అల్లు అర్జున్ ప్రెస్మీట్లో చేసిన స్పందన కూడా అప్పట్లో హాట్ టాపిక్గా మారాయి.
అయితే అనంతరం పరిస్థితులు క్రమంగా సర్దుమణిగాయి. ఇటీవల జరిగిన గద్దర్ అవార్డ్స్ కార్యక్రమంలో అల్లు అర్జున్, రేవంత్ రెడ్డి ఒకే వేదికపై కనిపించారు. అలాగే అల్లు అర్జున్ తమ్ముడు అల్లు శిరీష్ వివాహ వేడుకలో కూడా ముఖ్యమంత్రి రేవంత్ రెడ్డి పాల్గొన్నారు. ఆ వేడుకలో ఇద్దరూ ఆప్యాయంగా ఆలింగనం చేసుకుని కొంతసేపు కలిసి మాట్లాడుకుంటూ కనిపించిన వీడియోలు సోషల్ మీడియాలో వైరల్ అయ్యాయి. ఇప్పుడు కోకాపేటలో నిర్మించిన ‘అల్లు సినిమాస్’ ప్రారంభోత్సవానికి రేవంత్ రెడ్డి ముఖ్య అతిథిగా రావడం ఈ సాన్నిహిత్యానికి మరో ఉదాహరణగా అభిమానులు భావిస్తున్నారు.
