చిన్న కుండీలోనే పసుపు సాగు.. ఇంట్లోనే ఆర్గానిక్ పసుపు పెంచే సింపుల్ చిట్కాలు!

పసుపు మన వంటింట్లో నిత్యం ఉపయోగించే ముఖ్యమైన దినుసుల్లో ఒకటి. ఆహారానికి రుచి, రంగుతో పాటు ఇందులో సహజంగా ఉండే కొన్ని సమ్మేళనాల కారణంగా పసుపుకు ప్రత్యేక ప్రాధాన్యం ఉంది. మార్కెట్‌లో లభించే పసుపు నాణ్యతపై సందేహాలు ఉంటే, ఇంట్లోనే కుండీలు లేదా టెర్రస్ గార్డెన్‌లో పసుపు పెంచుకోవచ్చు. పెద్దగా స్థలం అవసరం లేకుండానే సరైన మట్టి, నీరు, సూర్యకాంతితో పసుపు మొక్కను సులభంగా పెంచుకోవచ్చు. తక్కువ స్థలంలో ఇంటివద్దే పసుపు పండించడానికి పాటించాల్సిన సులభమైన పద్ధతులు ఏమిటో ఇప్పుడు తెలుసుకుందాం.

ఇంట్లోనే కుండీలు లేదా గ్రో బ్యాగ్‌లలో పసుపును సులభంగా పెంచుకోవచ్చు. మార్కెట్‌లో కొనుగోలు చేసే పసుపు కొమ్ముల్లో మొలకలు వచ్చిన వాటిని విత్తనాలుగా ఉపయోగించుకోవచ్చు. ఇందుకోసం మంచి డ్రైనేజీ సౌకర్యం ఉన్న కనీసం 10–12 అంగుళాల లోతు, వెడల్పు కలిగిన కుండీని ఎంచుకోవాలి. మొలకలు వచ్చిన పసుపు కొమ్ములను మట్టిలో 2–3 అంగుళాల లోతులో, మొలకలు పైకి ఉండేలా నాటి తేలికగా నీరు పోయాలి. సరైన సంరక్షణతో సాధారణంగా 7–9 నెలల్లో పసుపు కొమ్ములను కోతకు తీసుకోవచ్చు.

సరైన కుండీ, మట్టి ఎంపిక

పసుపు కొమ్ములు మట్టిలో అడ్డంగా విస్తరించి పెరుగుతాయి. అందుకే కనీసం 10–12 అంగుళాల లోతు, వెడల్పు ఉన్న కుండీలు లేదా గ్రో బ్యాగ్‌లను ఉపయోగించడం మంచిది. కుండీ అడుగుభాగంలో అదనపు నీరు బయటకు వెళ్లేందుకు డ్రైనేజీ రంధ్రాలు తప్పనిసరిగా ఉండాలి.

పసుపు మొక్కకు నీరు సులభంగా వెళ్లిపోయే, సేంద్రియ పదార్థాలు సమృద్ధిగా ఉన్న వదులైన మట్టి అనుకూలంగా ఉంటుంది. ఇందుకోసం సుమారు 40 శాతం తోట మట్టి, 30 శాతం వర్మీకంపోస్ట్ లేదా బాగా కుళ్లిన పశువుల ఎరువు, 30 శాతం కొబ్బరి పొట్టు వంటి పదార్థాలతో మట్టి మిశ్రమాన్ని సిద్ధం చేసుకోవచ్చు. అవసరమైతే కొద్దిగా ఇసుకను కూడా కలపవచ్చు.

పసుపు కొమ్ములను ఎలా నాటాలి?

వంటగదిలో ఉన్న పసుపు కొమ్ముల్లో మొలకలు వచ్చిన వాటిని ఎంపిక చేసుకోవాలి. సిద్ధం చేసుకున్న కుండీలో 2–3 అంగుళాల లోతులో గుంత చేసి, మొలకలు పైవైపు ఉండేలా కొమ్ములను నాటి మట్టితో కప్పాలి. ఆ తర్వాత తేలికగా నీరు పోయాలి.

పసుపు మొక్కకు ప్రతిరోజూ సుమారు 4–5 గంటల వెలుతురు లభించే ప్రదేశం అనుకూలంగా ఉంటుంది. మట్టి ఎప్పుడూ స్వల్పంగా తేమగా ఉండేలా చూసుకోవాలి. అయితే కుండీలో నీరు నిల్వ ఉండకుండా జాగ్రత్తపడాలి. అధిక తేమ కారణంగా పసుపు కొమ్ములు కుళ్లిపోయే అవకాశం ఉంటుంది. సరైన మట్టి, నీరు, వెలుతురు, సంరక్షణ అందిస్తే ఇంట్లోనే పసుపును పెంచుకోవచ్చు.

పసుపు మొక్క నాటిన తర్వాత పంట సిద్ధం కావడానికి సాధారణంగా 7 నుంచి 9 నెలల సమయం పడుతుంది. మొక్క ఆకులు క్రమంగా పసుపు రంగులోకి మారి ఎండిపోవడం ప్రారంభిస్తే, నేలలోని పసుపు కొమ్ములు కోతకు సిద్ధమయ్యాయని అర్థం. ఈ సమయంలో కుండీలోని మట్టిని జాగ్రత్తగా తొలగించి, పసుపు కొమ్ములను బయటకు తీసుకోవచ్చు. ఇలా సరైన పద్ధతిలో పెంచితే ఇంట్లోనే తాజాగా పండించిన పసుపును పొందొచ్చు.