బిజినెస్‌ ప్రతినిధి: రిలయన్స్‌ ఇండస్ట్రీస్‌ అధినేత ముఖేష్‌ అంబానీ పెద్ద కుమారుడు ఆకాష్‌ అంబానీ ఇప్పుడు వ్యాపార వర్గాల్లో చర్చనీయాంశంగా మారారు. జియో ప్లాట్‌ఫామ్స్‌ ఐపీఓ నేపథ్యంలో సంస్థ తరఫున ఆయన కీలకంగా వ్యవహరిస్తుండటంతో రిలయన్స్‌ సామ్రాజ్యంలో తదుపరి తరం నాయకుడిగా ఎదుగుతున్నారనే విశ్లేషణలు వెలువడుతున్నాయి.
35 ఏళ్ల ఆకాష్‌ అంబానీ జియో ప్లాట్‌ఫామ్స్‌ మేనేజింగ్‌ డైరెక్టర్‌గా, రిలయన్స్‌ జియో ఇన్ఫోకామ్‌ చైర్మన్‌గా బాధ్యతలు నిర్వహిస్తున్నారు. సంస్థ వ్యాపార విస్తరణలో ఆయన కీలక పాత్ర పోషిస్తున్నారు.
రెండు గంటల్లోనే పూర్తిస్థాయి సబ్‌స్క్రిప్షన్‌!
జియో ప్లాట్‌ఫామ్స్‌ 3.2 బిలియన్‌ డాలర్ల ఐపీఓకు మదుపరుల నుంచి మంచి స్పందన లభించింది. బిడ్ల స్వీకరణ ప్రారంభమైన రెండు గంటల్లోనే ఇష్యూ పూర్తిగా సబ్‌స్క్రైబ్‌ అయినట్లు కథనంలో పేర్కొన్నారు.
అక్టోబర్‌ 15న ముంబైలో నిర్వహించిన కార్యక్రమంలో ఆకాష్‌ పాల్గొని, జియోకు ఉన్న 533 మిలియన్ల మంది వినియోగదారులు, సంస్థ ఆర్థిక పనితీరు వివరాలను వెల్లడించారు. ఈ కార్యక్రమంలో ఇషా అంబానీ పాల్గొనగా, ముఖేష్‌ అంబానీ హాజరుకాలేదు. పెట్టుబడిదారులకు సంస్థ తరఫున ఆకాష్‌ వివరాలు అందించడం ఆయన ప్రాధాన్యం పెరుగుతోందనే సంకేతంగా భావిస్తున్నారు.
జుకర్‌బర్గ్‌తో వ్యూహాత్మక సంబంధాలు
జియోలో గణనీయమైన వాటా కలిగిన మెటాతో వ్యాపార సంబంధాలను పర్యవేక్షించడంలో ఆకాష్‌ కీలక పాత్ర పోషిస్తున్నట్లు పరిశ్రమ వర్గాలు తెలిపాయి. మెటా అధినేత మార్క్‌ జుకర్‌బర్గ్‌తోనూ ఆయన నేరుగా సంప్రదింపులు జరుపుతున్నట్లు వెల్లడించాయి.
ఏఐ, డిజిటల్‌ సేవలపై దృష్టి
టెలికాం సేవలకు మాత్రమే పరిమితం కాకుండా జియోను డిజిటల్‌ టెక్నాలజీ, కృత్రిమ మేధ రంగాల్లో విస్తరించాలన్నది సంస్థ లక్ష్యంగా కనిపిస్తోంది. 12 భారతీయ భాషల్లో ఏఐ సేవలను అందించే ప్రతిపాదన ఈ వ్యూహంలో కీలకంగా మారనుంది.
జియో ఐపీఓ, అంతర్జాతీయ భాగస్వామ్యాలు, కొత్త సాంకేతిక సేవల విస్తరణ ఆకాష్‌ నాయకత్వానికి కీలక అవకాశాలను అందించనున్నాయి. ముఖేష్‌ అంబానీ వ్యాపార వారసత్వాన్ని ఆయన ఎలా ముందుకు తీసుకెళ్తారన్నది రానున్న రోజుల్లో ఆసక్తికరంగా మారనుంది.