ఆంధ్రప్రదేశ్‌లో ఆర్నబ్ తుఫాన్ తీవ్ర ప్రభావం చూపించింది. తుఫాన్ తీరం దాటే సమయంలో వీచిన బలమైన గాలులకు పలు ప్రాంతాల్లో భారీ వృక్షాలు నేలకొరిగాయి. మరోవైపు కుండపోత వర్షాలతో జనజీవనం స్తంభించింది. ఈ నేపథ్యంలో ముఖ్యమంత్రి చంద్రబాబు నాయుడు ఆదేశాల మేరకు ప్రభుత్వ యంత్రాంగం అప్రమత్తమై సహాయక చర్యలను వేగవంతం చేసింది.
తుఫాన్ ప్రభావిత ప్రాంతాల్లో పరిస్థితులను చక్కదిద్దేందుకు కార్మికులు, అధికారులు, టీడీపీ నాయకులు, కార్యకర్తలు సమన్వయంతో పనిచేశారు. ఈ క్రమంలో సహాయక చర్యల్లో పాల్గొన్న వారిపై మంత్రి నారా లోకేశ్ ‘ఎక్స్‌’ వేదికగా ప్రశంసలు కురిపించారు.
తుఫాన్ తీరం దాటే సమయంలో రాష్ట్రంలోని పల్లెలు, పట్టణాలు, నగరాల్లో పరిస్థితులు అస్తవ్యస్తంగా మారాయని లోకేశ్ పేర్కొన్నారు. అయినప్పటికీ, ప్రభుత్వ సిబ్బంది, అధికారులు నిద్రాహారాలు మాని పనిచేసి సాధారణ పరిస్థితులను పునరుద్ధరించేందుకు కృషి చేశారని తెలిపారు.
ప్రజలకు ఎలాంటి ఆటంకాలు కలగకుండా చర్యలు చేపట్టడం సమష్టి కృషికి, సేవాస్ఫూర్తికి నిదర్శనమని ఆయన అభిప్రాయపడ్డారు. ప్రకృతి విపత్తుల సమయంలో ప్రజలకు అండగా నిలవడంలో ప్రభుత్వ యంత్రాంగం, ప్రజాప్రతినిధులు, క్షేత్రస్థాయి సిబ్బంది సమన్వయంతో పనిచేయడం కీలకమని లోకేశ్ తన పోస్టులో పేర్కొన్నారు.