నంద్యాల, నంద్యాల జిల్లాలో రెండో విడత ఎంపీటీసీ, జెడ్పీటీసీ ఎన్నికలకు జిల్లా యంత్రాంగం అన్ని ఏర్పాట్లు పూర్తి చేసింది. గురువారం (నవంబర్ 5) ఉదయం 7 నుంచి సాయంత్రం 5 గంటల వరకు పోలింగ్ నిర్వహించనున్నట్లు జిల్లా కలెక్టర్ రాజకుమారి గణియా తెలిపారు. ఎన్నికలు ప్రశాంతంగా, పారదర్శకంగా జరిగేలా సిబ్బంది, పోలింగ్ సామగ్రి, భద్రతా ఏర్పాట్లు సిద్ధం చేసినట్లు వెల్లడించారు. అర్హులైన ఓటర్లందరూ నిర్భయంగా ఓటు హక్కును వినియోగించుకోవాలని కోరారు.

10.61 లక్షల మంది ఓటర్లు

జిల్లాలోని 28 జెడ్పీటీసీ స్థానాల్లో 20 స్థానాలకు, 377 ఎంపీటీసీ స్థానాల్లో 224 స్థానాలకు ఎన్నికలు జరగనున్నాయి. మొత్తం 10,61,817 మంది ఓటర్లు తమ ఓటు హక్కును వినియోగించుకోనుండగా, ఇందుకోసం 1,238 పోలింగ్ కేంద్రాలను ఏర్పాటు చేశారు.

సమస్యాత్మక, అతి సమస్యాత్మక కేంద్రాలను గుర్తించి అదనపు భద్రత కల్పిస్తున్నారు. అవసరమైన చోట మైక్రో అబ్జర్వర్లను నియమించడంతోపాటు వెబ్‌కాస్టింగ్, వీడియోగ్రఫీ ద్వారా పోలింగ్‌ను పర్యవేక్షించనున్నారు.

గ్రామీణ ప్రాంతాల్లో డ్రై డే

ఎన్నికల నేపథ్యంలో నవంబర్ 3వ తేదీ సాయంత్రం 5 గంటల నుంచి నవంబర్ 5వ తేదీ అర్ధరాత్రి 12 గంటల వరకు గ్రామీణ ప్రాంతాల్లో డ్రై డే అమల్లో ఉంటుందని కలెక్టర్ తెలిపారు. నంద్యాల, నందికొట్కూరు, ఆళ్లగడ్డ, ఆత్మకూరు, డోన్ మున్సిపాలిటీలు, బేతంచెర్ల నగర పంచాయతీ పరిధికి మినహాయింపు ఇచ్చారు. మిగిలిన గ్రామీణ ప్రాంతాల్లో మద్యం దుకాణాలు, బార్లు మూసివేయాలని ఆదేశించారు.

నవంబర్ 7న ఓట్ల లెక్కింపు

పోలింగ్ ముగిసిన అనంతరం నవంబర్ 7వ తేదీ ఉదయం 8 గంటలకు ఓట్ల లెక్కింపు ప్రారంభం కానుంది. ఇందుకోసం జిల్లాలో ఆరు కేంద్రాలను ఏర్పాటు చేశారు. ఆళ్లగడ్డ, నంద్యాల, డోన్, నందికొట్కూరు, ఆత్మకూరుతోపాటు నంద్యాలలోని బొమ్మలసత్రం ప్రాంతంలో కౌంటింగ్ కేంద్రాలను సిద్ధం చేశారు. లెక్కింపు పూర్తయిన వెంటనే ఫలితాలు ప్రకటించనున్నారు.

రీపోలింగ్‌కు నవంబర్ 6

ఏదైనా పోలింగ్ కేంద్రంలో రీపోలింగ్ అవసరమైతే నవంబర్ 6న ఉదయం 7 నుంచి సాయంత్రం 5 గంటల వరకు నిర్వహిస్తామని కలెక్టర్ తెలిపారు. ఎన్నికల నిబంధనలు పాటిస్తూ ఓటర్లు ఎలాంటి ప్రలోభాలకు లోనుకాకుండా ఓటు వేయాలని సూచించారు. ఎన్నికల నిర్వహణకు ప్రజలు, రాజకీయ పార్టీల ప్రతినిధులు సహకరించాలని కోరారు.

By Ramya