ఐపీఎల్ 2027 సీజన్‌కు ముందు జరగనున్న మినీ వేలంపై ఇప్పటి నుంచే ఆసక్తి నెలకొంది. వేలానికి ముందుగా ఫ్రాంచైజీలు తమ రిటైన్, రిలీజ్ జాబితాలను సిద్ధం చేసుకుంటుండగా.. మరోవైపు ఆటగాళ్ల ట్రేడింగ్ కూడా కొనసాగుతోంది. ఇప్పటికే సన్‌రైజర్స్ హైదరాబాద్, చెన్నై సూపర్ కింగ్స్ మధ్య ప్లేయర్ల మార్పిడి ఖరారైంది. ఈ నేపథ్యంలో మాజీ క్రికెటర్లు సైతం ఆయా జట్ల అవసరాలు, వేలంలో అనుసరించాల్సిన వ్యూహాలపై తమ అభిప్రాయాలను వెల్లడిస్తున్నారు. తాజాగా టీమిండియా మాజీ ఆటగాడు అంబటి రాయుడు ఐపీఎల్ ఫ్రాంచైజీలకు సంబంధించి ఆసక్తికరమైన అంచనాలు పంచుకున్నారు.

ముంబయి, ఆర్సీబీకి కీలక సూచనలు

ముంబయి ఇండియన్స్‌కు నాలుగో స్థానంలో బ్యాటింగ్ చేయగల సమర్థుడైన ఆటగాడు అవసరమని రాయుడు అభిప్రాయపడ్డాడు. పేస్, స్పిన్ బౌలింగ్ రెండింటినీ సమర్థంగా ఎదుర్కొనే బ్యాటర్ కోసం ఆ జట్టు ప్రయత్నించవచ్చని పేర్కొన్నాడు. పంజాబ్ కింగ్స్‌కు ఆడుతున్న నెహాల్ వధేరా తిరిగి ముంబయి జట్టులోకి వచ్చే అవకాశం ఉందని అంచనా వేశాడు.

రాయల్ ఛాలెంజర్స్ బెంగళూరుకు నాణ్యమైన స్పిన్నర్ అవసరమని, యుజ్వేంద్ర చాహల్‌ను తీసుకునే దిశగా ఆ జట్టు ఆలోచించవచ్చని తెలిపాడు. మరోవైపు గుజరాత్ టైటాన్స్ మిడిలార్డర్‌ను బలోపేతం చేసుకోవాల్సి ఉందని పేర్కొన్నాడు. ఈ క్రమంలో వెంకటేశ్ అయ్యర్‌ను గుజరాత్ సంప్రదించినా ఆశ్చర్యపోనక్కర్లేదని రాయుడు వ్యాఖ్యానించాడు.

లఖ్నవూ, కోల్‌కతాకు కొత్త కెప్టెన్లు?

లఖ్నవూ సూపర్ జెయింట్స్ రిషభ్ పంత్‌ను ఢిల్లీకి పంపిన నేపథ్యంలో ఆ జట్టుకు నాయకత్వ సమస్య ఎదురుకావచ్చని రాయుడు విశ్లేషించాడు. ఈ పరిస్థితిలో యశస్వి జైస్వాల్‌ను కెప్టెన్సీకి మంచి ప్రత్యామ్నాయంగా పరిగణించవచ్చని అభిప్రాయపడ్డాడు.

కోల్‌కతా నైట్‌రైడర్స్ కూడా గత కొన్నేళ్లుగా కెప్టెన్లను మార్చుతూ వస్తోందని గుర్తుచేశాడు. ఈసారి సూర్యకుమార్ యాదవ్‌ను జట్టులోకి తీసుకుని నాయకత్వ బాధ్యతలు అప్పగించే అవకాశం ఉందని అంచనా వేశాడు.

ఇక సన్‌రైజర్స్ హైదరాబాద్‌కు ఇంగ్లండ్ ఆల్‌రౌండర్ సామ్ కరన్ లాంటి ఆటగాడు అవసరమని రాయుడు పేర్కొన్నాడు. పాట్ కమిన్స్ అందుబాటుపై సందేహాలు వ్యక్తమవుతున్న నేపథ్యంలో కరన్ జట్టుకు ఉపయోగపడతాడని వివరించాడు. బౌలింగ్‌తో పాటు లోయర్ ఆర్డర్‌లో బ్యాటింగ్ చేయగల సామర్థ్యం కూడా అతడికి ఉందని అభిప్రాయపడ్డాడు.

మూడు జట్లకు కొత్త సారథులు: ఫాఫ్ డుప్లెసిస్

మరోవైపు దక్షిణాఫ్రికా మాజీ కెప్టెన్ ఫాఫ్ డుప్లెసిస్ కూడా ఐపీఎల్ 2027 జట్ల నాయకత్వ మార్పులపై తన అంచనాలను వెల్లడించాడు. మూడు ఫ్రాంచైజీలకు కొత్త కెప్టెన్లు వచ్చే అవకాశం ఉందని పేర్కొన్నాడు.

ముంబయి ఇండియన్స్‌కు రోహిత్ శర్మ లేదా జస్ప్రీత్ బుమ్రా నాయకత్వం వహించవచ్చని అభిప్రాయపడ్డాడు. లఖ్నవూ సూపర్ జెయింట్స్ కెప్టెన్సీ రేసులో ఐడెన్ మార్క్రమ్, మిచెల్ మార్ష్ పేర్లను ప్రస్తావించాడు. కోల్‌కతా నైట్‌రైడర్స్ విషయానికి వస్తే రింకూ సింగ్‌కు నాయకత్వ బాధ్యతలు అప్పగించవచ్చని, ఒకవేళ ట్రేడింగ్ ద్వారా హార్దిక్ పాండ్యను తీసుకుంటే అతడికి కెప్టెన్సీ దక్కే అవకాశం ఉందని ఫాఫ్ అంచనా వేశాడు.

మొత్తంగా ఐపీఎల్ 2027 మినీ వేలానికి ముందే జట్ల కూర్పు, కెప్టెన్సీ మార్పులు, ఆటగాళ్ల ట్రేడింగ్‌పై చర్చ మొదలైంది. అయితే అంబటి రాయుడు, ఫాఫ్ డుప్లెసిస్ చేసినవన్నీ ప్రస్తుతానికి వారి వ్యక్తిగత అంచనాలు మాత్రమే. ఫ్రాంచైజీల అధికారిక నిర్ణయాలు వెలువడిన తర్వాతే ఏ జట్టు ఎవరిని ఎంచుకుంటుందనే దానిపై స్పష్టత రానుంది.

Leave a Reply

Your email address will not be published. Required fields are marked *