
రణ్బీర్ కపూర్, సాయి పల్లవి, యశ్ ప్రధాన పాత్రల్లో నటించిన ప్రతిష్ఠాత్మక పౌరాణిక చిత్రం ‘రామాయణ: పార్ట్ 1’ బాక్సాఫీస్ వద్ద దూసుకెళ్తోంది. దర్శకుడు నితేష్ తివారీ తెరకెక్కించిన ఈ చిత్రం నవంబర్ 5న ప్రపంచవ్యాప్తంగా విడుదలై తొలి రోజు నుంచే భారీ వసూళ్లను సాధిస్తోంది. తాజాగా ఐదో రోజు కలెక్షన్లతో మరో అరుదైన రికార్డును తన ఖాతాలో వేసుకుంది.
ఐదో రోజు రూ.126 కోట్ల గ్రాస్
సోమవారం ఐదో రోజు కూడా ‘రామాయణ’ వసూళ్ల జోరు కొనసాగింది. ప్రపంచవ్యాప్తంగా ఒక్క రోజులోనే రూ.126 కోట్ల గ్రాస్ వసూళ్లు సాధించినట్లు చిత్ర బృందం అధికారికంగా ప్రకటించింది. దీంతో ఐదో రోజు అత్యధిక వసూళ్లు సాధించిన భారతీయ చిత్రంగా, పోస్ట్ దీపావళి రోజుల్లో అత్యధిక కలెక్షన్లు రాబట్టిన సినిమాగా రికార్డు సృష్టించినట్లు వెల్లడించింది. ఈ సందర్భంగా ప్రత్యేక పోస్టర్ను విడుదల చేసి సినిమా విజయాన్ని అభిమానులతో పంచుకుంది.
ఐదు రోజుల్లో ఇండియాలో రూ.413 కోట్ల గ్రాస్
భారతీయ బాక్సాఫీస్ వద్ద కూడా ఈ సినిమా భారీ వసూళ్లను నమోదు చేస్తోంది. ఐదో రోజు ఇండియాలో రూ.107.50 కోట్ల నెట్ కలెక్షన్లు సాధించింది. దీంతో ఐదు రోజుల్లో దేశీయంగా మొత్తం రూ.346.35 కోట్ల నెట్ వసూళ్లు వచ్చాయి. ఇండియా గ్రాస్ కలెక్షన్లు రూ.413.90 కోట్లకు చేరుకున్నాయి.
ఓవర్సీస్లోనూ అదే జోరు
విదేశీ మార్కెట్లలోనూ ‘రామాయణ’కు మంచి స్పందన లభిస్తున్నట్లు కలెక్షన్ల గణాంకాలు సూచిస్తున్నాయి. ఐదు రోజుల్లో ఓవర్సీస్లో రూ.250 కోట్ల వసూళ్లు సాధించినట్లు సమాచారం. ఇండియా, ఓవర్సీస్ కలెక్షన్లు కలిపి ప్రపంచవ్యాప్తంగా మొత్తం రూ.663.90 కోట్ల గ్రాస్ వసూళ్లను అందుకుంది.
రూ.1,000 కోట్ల క్లబ్పై అంచనాలు
విడుదలైన ఐదు రోజుల్లోనే రూ.663 కోట్లకు పైగా గ్రాస్ వసూళ్లు సాధించడంతో ‘రామాయణ’ తదుపరి బాక్సాఫీస్ లక్ష్యంపై ఆసక్తి పెరిగింది. ఇదే స్థాయిలో వసూళ్ల జోరు కొనసాగితే త్వరలోనే రూ.1,000 కోట్ల క్లబ్లోకి చేరే అవకాశం ఉందని ట్రేడ్ వర్గాలు అంచనా వేస్తున్నాయి. మరి రానున్న రోజుల్లో ఈ చిత్రం ఇంకెన్ని రికార్డులను సృష్టిస్తుందో చూడాలి.
