ఆంధ్రప్రదేశ్ ఐటీ హబ్గా ఎదుగుతున్న విశాఖపట్నానికి మరో ప్రతిష్టాత్మక SEZ ప్రాజెక్ట్ ఖరారైంది. వైజాగ్ ఐటీ కారిడార్గా పేరొందిన మధురవాడలో ఇప్పటికే ఏర్పాటైన ప్రముఖ అంతర్జాతీయ ఐటీ దిగ్గజం కాగ్నిజెంట్ (Cognizant) ప్రత్యేక ఆర్థిక మండలి (SEZ) ఏర్పాటుకు కేంద్ర వాణిజ్య మంత్రిత్వ శాఖ తుది ఆమోదం తెలిపింది. ఈ నిర్ణయంతో ఉత్తరాంధ్ర ప్రాంతంలో ఐటీ విస్తరణ మరింత వేగవంతం కానుంది..
విశాఖపట్నంలోని మధురవాడ ఐటీ సెజ్ పరిధిలోని హిల్ నెం.2 లో ఈ కాగ్నిజెంట్ క్యాంపస్ ఏర్పాటు అయింది. గతంలోనే ఇందుకు సంబంధించిన ప్రాథమిక ప్రతిపాదనలు జరగగా, తాజాగా కేంద్ర ప్రభుత్వం నుంచి వచ్చిన అధికారిక అనుమతులతో అడ్డంకులన్నీ తొలిగిపోయాయి.
ఈ ప్రాంతంలో ఇప్పటికే పలు ప్రముఖ ఐటీ సంస్థలు తమ కార్యకలాపాలను సాగిస్తుండగా, ఇప్పుడు కాగ్నిజెంట్ రాకతో మధురవాడ రూపురేఖలు మరింత మారనున్నాయి.
వేలాది మంది స్థానిక యువతకు ఉద్యోగ అవకాశాలు
ఈ సరికొత్త ఐటీ సెజ్ అందుబాటులోకి రావడం ద్వారా ఆంధ్రప్రదేశ్లో, ముఖ్యంగా ఉత్తరాంధ్ర జిల్లాలైన విశాఖ, విజయనగరం, శ్రీకాకుళం ప్రాంతాలకు చెందిన సాఫ్ట్వేర్ నిపుణులకు, ఫ్రెషర్స్కు భారీగా ఉపాధి అవకాశాలు లభించనున్నాయి.
స్థానికంగానే అంతర్జాతీయ స్థాయి కంపెనీలో పనిచేసే అవకాశం దక్కడం వల్ల బ్రెయిన్ డ్రెయిన్ అంటే ప్రతిభావంతులు ఇతర రాష్ట్రాలకు వలస వెళ్లడం తగ్గుతుందని ఐటీ నిపుణులు అంచనా వేస్తున్నారు.
