గూగుల్ సమాచారం కోసం ఉపయోగకరమైన సాధనమే అయినప్పటికీ, కొన్ని విషయాల కోసం శోధించడం సైబర్ మోసాలు, చట్టపరమైన సమస్యలు లేదా భద్రతా ప్రమాదాలకు దారితీయవచ్చు. అందుకే ఆన్లైన్లో అప్రమత్తంగా ఉండటం అవసరం. నకిలీ యాప్లు, తప్పుడు కస్టమర్ కేర్ నంబర్లు, మోసపూరిత పెట్టుబడి పథకాలు వంటి అంశాల కోసం గూగుల్లో వెతకడం వల్ల ఆర్థిక, వ్యక్తిగత సమాచార నష్టం కలిగే ప్రమాదం ఉంది..
ప్రస్తుతం సమాచారం కోసం ఎక్కువ మంది ఆధారపడేది గూగుల్పైనే. చిన్న సందేహం నుంచి పెద్ద పరిశోధన వరకు కేవలం కొన్ని సెకన్లలోనే సమాధానాలు అందుబాటులోకి వస్తాయి. అయితే ఇంటర్నెట్లో ఉన్న ప్రతి సమాచారం సురక్షితమైనదే అనుకోవడం పొరపాటు. కొన్ని విషయాలను గూగుల్లో వెతకడం వల్ల చట్టపరమైన, ఆర్థిక లేదా సైబర్ భద్రతా సమస్యలు ఎదురయ్యే అవకాశం ఉంది. నిపుణులు సూచిస్తున్న కొన్ని జాగ్రత్తలు ఇవే. బాంబులు, పేలుడు పదార్థాలు, అక్రమ ఆయుధాల తయారీ లేదా చట్టవిరుద్ధమైన మాదకద్రవ్యాలకు సంబంధించిన సమాచారం కోసం వెతకడం ప్రమాదకరం. ఇటువంటి శోధనలు భద్రతా సంస్థల దృష్టిని ఆకర్షించే అవకాశం ఉంది. ఫలితంగా మిమ్మల్ని పోలీసులు అరెస్ట్ చేసి, జైలుకు తరలిస్తారు.
బర్ నేరాలకు సంబంధించిన శోధనలు వద్దు
ఫోన్లు, వై-ఫై నెట్వర్క్లు, బ్యాంక్ ఖాతాలను హ్యాక్ చేయడం, ఓటీపీలు లేదా పాస్వర్డ్లను ఛేదించడం వంటి అంశాలపై శోధించడం చట్టపరమైన సమస్యలకు దారితీయవచ్చు. ఇటువంటి సమాచారం కోసం వెతకడం కూడా అనుమానాస్పదంగా పరిగణించబడే అవకాశం ఉంది.
తెలియని యాప్లు, సాఫ్ట్వేర్ల విషయంలో జాగ్రత్త
గూగుల్ సెర్చ్లో కనిపించే ప్రతి యాప్ లేదా సాఫ్ట్వేర్ విశ్వసనీయమైనది కాదు. సైబర్ నేరగాళ్లు నకిలీ యాప్ల ద్వారా వ్యక్తిగత సమాచారం, బ్యాంకింగ్ వివరాలు లేదా ఇతర సున్నితమైన డేటాను దొంగిలించే ప్రమాదం ఉంది. కాబట్టి అధికారిక యాప్ స్టోర్లు లేదా విశ్వసనీయ వనరుల నుంచే డౌన్లోడ్ చేయాలి.
అధిక లాభాల పెట్టుబడి పథకాలపై అప్రమత్తం
తక్కువ సమయంలో డబ్బు రెట్టింపు అవుతుందని లేదా భారీ లాభాలు వస్తాయని హామీ ఇచ్చే వెబ్సైట్లు, పెట్టుబడి పథకాల విషయంలో జాగ్రత్త అవసరం. వీటిలో కొన్ని మోసపూరిత పథకాలు కావచ్చు. పెట్టుబడుల విషయంలో ఎల్లప్పుడూ గుర్తింపు పొందిన ఆర్థిక సంస్థల సలహా తీసుకోవడం మంచిది.
కస్టమర్ కేర్ నంబర్ల కోసం నేరుగా సెర్చ్ చేయవద్దు
సైబర్ మోసగాళ్లు నకిలీ కస్టమర్ కేర్ నంబర్లను ఇంటర్నెట్లో ప్రచారం చేసే అవకాశం ఉంది. అలాంటి నంబర్లకు కాల్ చేస్తే వ్యక్తిగత లేదా బ్యాంకింగ్ వివరాలు దుర్వినియోగం కావచ్చు. కాబట్టి సంబంధిత సంస్థ అధికారిక వెబ్సైట్ లేదా యాప్ ద్వారా మాత్రమే కస్టమర్ సేవా వివరాలు పొందాలి.
ఆరోగ్య సమస్యలకు స్వయంగా చికిత్స వద్దు
ఆరోగ్య సమస్యల లక్షణాలను చూసి గూగుల్లో మందులు వెతికి వాడటం ప్రమాదకరం. ప్రతి వ్యక్తి ఆరోగ్య పరిస్థితి భిన్నంగా ఉంటుంది. కాబట్టి ఏదైనా అనారోగ్యం లేదా వైద్య సమస్య ఉన్నప్పుడు అర్హత కలిగిన వైద్యుడిని సంప్రదించడం తప్పనిసరి.
ఇంటర్నెట్ వినియోగంలో అప్రమత్తత అవసరం
గూగుల్ సమాచారానికి గొప్ప వనరు అయినప్పటికీ, ప్రతి శోధన సురక్షితమైనదని భావించకూడదు. విశ్వసనీయ వనరులను మాత్రమే ఉపయోగించడం, అనుమానాస్పద వెబ్సైట్లు మరియు లింక్లకు దూరంగా ఉండటం, వ్యక్తిగత సమాచారాన్ని జాగ్రత్తగా నిర్వహించడం ద్వారా సైబర్ మోసాల నుంచి రక్షణ పొందవచ్చు.