ఆంధ్రప్రదేశ్లో విస్తృత చర్చకు దారితీసిన **పోలవరం-బనకచర్ల లింక్ ప్రాజెక్ట్ (PBLP)**కు సంబంధించిన టర్మ్స్ ఆఫ్ రిఫరెన్స్ (ToR) ప్రతిపాదనను కేంద్ర ప్రభుత్వం తిరిగి పంపింది. ఈ విషయాన్ని రాజ్యసభలో వైఎస్సార్సీపీ ఎంపీ గొల్ల బాబురావు అడిగిన ప్రశ్నకు కేంద్ర అటవీ, పర్యావరణ, వాతావరణ మార్పు శాఖ సహాయ మంత్రి కీర్తి వర్ధన్ సింగ్ లిఖితపూర్వక సమాధానంలో వెల్లడించారు.
మంత్రి కీర్తి వర్ధన్ సింగ్ తెలిపిన వివరాల ప్రకారం, పోలవరం-బనకచర్ల లింక్ ప్రాజెక్టుకు సంబంధించిన ToR ప్రతిపాదన పర్యావరణ, అటవీ, వాతావరణ మార్పు మంత్రిత్వ శాఖకు అందింది. అనంతరం ఈ ప్రతిపాదనను జూన్ 17న నిపుణుల మదింపు కమిటీ (EAC) పరిశీలించింది. అయితే ప్రాజెక్టుకు పర్యావరణ అనుమతుల ప్రక్రియను ముందుకు తీసుకెళ్లే ముందు కేంద్ర జల సంఘం (CWC) అంతర్రాష్ట్ర జల వివాదాలు, అవసరమైన అనుమతులు, సాంకేతిక అంశాలను సమగ్రంగా పరిశీలించాలని కమిటీ సూచించింది.
అదే సమయంలో, పోలవరం-బనకచర్ల ప్రాజెక్టు గోదావరి జలాల ట్రిబ్యునల్ అవార్డుకు విరుద్ధంగా ఉందంటూ పలు ఫిర్యాదులు కూడా కేంద్ర ప్రభుత్వానికి అందినట్లు మంత్రి వెల్లడించారు. ఈ అన్ని అంశాలను పరిగణనలోకి తీసుకున్న నిపుణుల మదింపు కమిటీ సిఫారసుల మేరకు, ప్రాజెక్టుకు సంబంధించిన టర్మ్స్ ఆఫ్ రిఫరెన్స్ (ToR) ప్రతిపాదనను తిరిగి పంపినట్లు కేంద్ర ప్రభుత్వం స్పష్టం చేసింది.
