శ్రావణ మాసంలో నాన్వెజ్తో పాటు ఈ ఆకు కూరలకు కూడా దూరం.. కారణం ఇదే!
ప్రస్తుతం శ్రావణ మాసం కొనసాగుతోంది. హిందూ సంప్రదాయాలను పాటించే వారికి ఈ మాసం ఎంతో పవిత్రమైనది, ప్రత్యేకమైనది. ఈ సమయంలో చాలామంది నాన్వెజ్ ఆహారానికి దూరంగా ఉంటారు. అయితే శ్రావణ మాసంలో నాన్వెజ్ మాత్రమే కాకుండా.. కొన్ని రకాల ఆకు కూరలను కూడా తినకూడదనే ఆచారం ఉందని మీకు తెలుసా? సంప్రదాయాల ప్రకారం కొందరు ఈ మాసంలో నాన్వెజ్తో పాటు కొన్ని ఆకు కూరలకు కూడా దూరంగా ఉంటారు. ఇంతకీ ఆ ఆకు కూరలు ఏవి? వాటిని ఎందుకు తినకూడదని భావిస్తారు? ఇప్పుడు తెలుసుకుందాం.
శ్రావణమాసంలో నాన్వెజ్ ఎందుకు దూరం పెడతారు?
శ్రావణమాసాన్ని పవిత్రమైన నెలగా భావించే చాలామంది హిందువులు ఈ నెల రోజుల పాటు మాంసాహారానికి దూరంగా ఉంటారు. ఇందుకు ప్రధానంగా రెండు కారణాలను చెబుతారు. శ్రావణమాసంలో పండగలు, వ్రతాలు, పూజలు ఎక్కువగా ఉండటంతో ఆధ్యాత్మికంగా ఈ నెలలో నాన్వెజ్కు దూరంగా ఉండాలని కొందరు భావిస్తారు. మరోవైపు, వర్షాకాలంలో జీర్ణక్రియ కొంత మందగించే అవకాశం ఉండటంతో మాంసాహారం జీర్ణం కావడానికి ఎక్కువ సమయం పడుతుందని చెబుతారు. అందుకే ఈ కాలంలో తేలికపాటి, సాత్విక ఆహారం తీసుకోవాలని చాలామంది సూచిస్తారు.
అయితే ఈ నెలలో కేవలం నాన్వెజ్కు మాత్రమే కాకుండా, కొందరు కొన్ని ఆకు కూరలకు కూడా దూరంగా ఉంటారు. వర్షాకాలంలో పచ్చని ఆకు కూరలపై తేమ ఎక్కువగా ఉండటం వల్ల బ్యాక్టీరియా, క్రిములు వృద్ధి చెందే అవకాశం ఉంటుంది. సరైన శుభ్రత, వంట విధానం లేకుండా వీటిని తీసుకుంటే ఇన్ఫెక్షన్లు, ఇతర ఆరోగ్య సమస్యలు వచ్చే ప్రమాదం ఉందని నిపుణులు చెబుతున్నారు. అందుకే శ్రావణమాసంతో పాటు వర్షాకాలంలో గోంగూర, పాలకూర, మెంతికూర, ఆవాల ఆకులు వంటి కొన్ని ఆకు కూరలను తీసుకోవడంలో జాగ్రత్తలు పాటించాలని సూచిస్తున్నారు.
ఈ ఆకుకూరల్లో శరీరానికి అవసరమైన విటమిన్లు, ఖనిజాలు సమృద్ధిగా ఉన్నప్పటికీ.. వర్షాకాలంలో వీటిని తీసుకునే విషయంలో జాగ్రత్తగా ఉండాలని నిపుణులు సూచిస్తున్నారు. వర్షాలు, తేమ ఎక్కువగా ఉండే ఈ కాలం సూక్ష్మజీవులు, బ్యాక్టీరియా వృద్ధికి అనుకూలంగా ఉంటుంది. దీంతో ఆకుకూరలు సులభంగా కలుషితమయ్యే అవకాశం ఉంది. సరైన శుభ్రత, వంట విధానం పాటించకుండా వీటిని తీసుకుంటే ఆహార సంబంధిత ఇన్ఫెక్షన్లు, ఇతర ఆరోగ్య సమస్యలు వచ్చే ప్రమాదం ఉంటుందని చెబుతున్నారు.
