చిత్తూరు: తమిళనాడు సరిహద్దుకు ఆనుకుని ఉన్న గుడిపాల మండలంలో ఇసుక అక్రమ రవాణా జరుగుతోందన్న ఆరోపణలు స్థానికంగా చర్చనీయాంశంగా మారాయి. మండలంలోని పలు ప్రాంతాల నుంచి ప్రతిరోజూ 5 నుంచి 10 లారీలు, టిప్పర్లలో ఇసుకను తమిళనాడు వైపు తరలిస్తున్నట్లు స్థానికులు చెబుతున్నారు. ఈ వ్యవహారంలో కొందరు రాజకీయ నాయకుల ప్రమేయం ఉందన్న ఆరోపణలు కూడా వినిపిస్తున్నాయి. అయితే వీటిపై అధికారిక నిర్ధారణ కావాల్సి ఉంది.
డంపులపై అధికారుల తనిఖీలు
నారగల్లు పంచాయతీ పరిధిలోని మంచినీళ్లకుంట, వెంగమాంబపురం సమీపంలోని ఇసుక డంపింగ్ ప్రాంతాల్లో పోలీసులు, రెవెన్యూ అధికారులు శనివారం తనిఖీలు నిర్వహించారు. తహసీల్దార్ శ్రీనివాసులు, ఎస్సై రామ్మోహన్ ఆధ్వర్యంలో డంపులను సీజ్ చేశారు.
జీడీనెల్లూరు, ఎన్ఆర్పేట ప్రాంతాల నుంచి ఇసుకను తరలించి సీఎం కండ్రిగలోని తాటికుంట చెరువు వద్ద డంపింగ్ చేస్తున్నట్లు గుర్తించినట్లు అధికారులు తెలిపారు. ఈ వ్యవహారంలో ఉమాపతి, టిప్పర్ డ్రైవర్లు అజిత్కుమార్, అంబారసుపై కేసులు నమోదు చేసినట్లు ఎస్సై వెల్లడించారు.
నిఘా పెంచాలని డిమాండ్
రామాపురం–కమ్మతిమ్మాపురం–చామంతిపురం, వల్లిమలై మార్గాల్లో రాత్రి వేళల్లో ప్రత్యేక తనిఖీలు నిర్వహించాలని స్థానికులు కోరుతున్నారు. ఇసుక ఎక్కడి నుంచి తవ్వుతున్నారు, ఎక్కడ డంపింగ్ చేస్తున్నారు, ఏ వాహనాల్లో తరలిస్తున్నారు అనే అంశాలపై సమగ్ర దర్యాప్తు చేయాలని డిమాండ్ చేస్తున్నారు.
అక్రమ రవాణా ఆరోపణలపై పోలీసు, రెవెన్యూ, గనుల శాఖలు సంయుక్తంగా విచారణ చేపట్టి వాస్తవాలను వెలుగులోకి తీసుకురావాలని స్థానికులు కోరుతున్నారు. సహజ వనరులకు నష్టం కలగకుండా, ప్రభుత్వ ఆదాయానికి నష్టం వాటిల్లకుండా కఠిన చర్యలు తీసుకోవాలని విజ్ఞప్తి చేస్తున్నారు.
