AP Barrier-Free Toll Plazas Soon: ఆగకుండా టోల్ చెల్లింపు.. ఏపీలో రెండు టోల్‌ప్లాజాల్లో కొత్త విధానం
జాతీయ రహదారులపై ప్రయాణించే వాహనాలు ప్రస్తుతం టోల్‌ప్లాజాల వద్ద తప్పనిసరిగా కొన్ని క్షణాలు ఆగాల్సి వస్తోంది. వాహనంపై అమర్చిన ఫాస్టాగ్‌ను స్కాన్ చేసిన తర్వాతే బారియర్ పైకి లేస్తుంది, ఆపై వాహనం ముందుకు సాగుతుంది. అయితే ఇప్పుడు National Highways Authority of India (NHAI) టోల్ వసూళ్లలో సరికొత్త మార్పులకు శ్రీకారం చుట్టింది. వాహనాలు పూర్తిగా ఆగకుండా టోల్ ఫీజు వసూలు చేసే ‘బారియర్‌లెస్‌ టోల్‌ప్లాజా’ విధానాన్ని అమలు చేయాలని నిర్ణయించింది. ఈ కొత్త వ్యవస్థను ఆంధ్రప్రదేశ్‌లోని రెండు కీలక టోల్‌ప్లాజాల్లో త్వరలోనే ప్రారంభించనున్నారు.
ప్రస్తుతం ఫాస్టాగ్ సదుపాయం ఉన్నప్పటికీ, వాహనాలు టోల్‌ప్లాజాల వద్ద వేచి ఉండాల్సిన పరిస్థితి కొనసాగుతోంది. ముఖ్యంగా పండుగలు, వారాంతాలు, రద్దీగా ఉండే హైవేలపై వాహనాల రద్దీ ఎక్కువగా కనిపిస్తోంది. ఫాస్టాగ్ ఉన్నా కూడా బారియర్ తెరుచుకునే వరకు ఆలస్యం అవుతోంది. ఈ సమస్యలను తగ్గించేందుకు NHAI ‘మల్టీ లేన్ ఫ్రీ ఫ్లో’ (MLFF) టెక్నాలజీని తీసుకొస్తోంది. ఈ విధానం అమలులోకి వస్తే, టోల్‌ప్లాజాల వద్ద వాహనాలు ఆగకుండా నేరుగా ప్రయాణం కొనసాగించవచ్చు.
ఈ ఆధునిక టోల్ విధానాన్ని కోల్‌కతా–చెన్నై నేషనల్ హైవే 16లోని విజయవాడ–గుంటూరు మధ్య ఉన్న కాజా టోల్‌ప్లాజా, అలాగే విజయవాడ బైపాస్‌లోని వెంకటపాలెం టోల్‌ప్లాజాల్లో అమలు చేయనున్నారు. ఈ టోల్‌ప్లాజాల్లో సాంప్రదాయ టోల్‌బూత్‌లు, బారియర్‌లు ఉండవు. వాటి స్థానంలో అధునాతన జీపీఎస్ వ్యవస్థ, ఆర్‌ఎఫ్‌ఐడీ ఫాస్టాగ్ రీడర్లు, ఏఎన్‌పీఆర్ (ఆటోమేటెడ్ నంబర్ ప్లేట్ రికగ్నిషన్) కెమెరాలు ఏర్పాటు చేస్తారు.
వాహనం టోల్‌ప్లాజా పరిధిలోకి ప్రవేశించగానే కెమెరాలు వాహన నంబర్ ప్లేట్‌ను గుర్తిస్తాయి. అదే సమయంలో ఫాస్టాగ్‌ను RFID రీడర్ స్కాన్ చేసి టోల్ ఫీజును ఆటోమేటిక్‌గా డెడక్ట్ చేస్తుంది. ఈ ప్రక్రియ మొత్తం వాహనం ఆగకుండానే పూర్తవుతుంది. దీని వల్ల ట్రాఫిక్ అంతరాయం తగ్గడంతో పాటు ప్రయాణ సమయం కూడా ఆదా అవుతుంది.
అయితే ఫాస్టాగ్ లేని వాహనాల కోసం ప్రత్యేకంగా ఒక లైన్‌ను ఏర్పాటు చేస్తారు. అక్కడ క్యూఆర్ కోడ్‌ను స్కాన్ చేసి యూపీఐ లేదా ఇతర డిజిటల్ చెల్లింపు విధానాల ద్వారా టోల్ ఫీజును చెల్లించవచ్చు. అయితే ఫాస్టాగ్ లేకుండా చెల్లించే వాహనాలకు అదనంగా 25 శాతం వరకు అదనపు ఛార్జీలు విధించే అవకాశం ఉంది.
ఇక మరోవైపు NHAI టోల్‌ప్లాజాల నిర్వహణలో ప్రజల భాగస్వామ్యాన్ని పెంచేందుకు కొత్త అవకాశాలను కూడా కల్పిస్తోంది. కోల్‌కతా–చెన్నై హైవేలోని విజయవాడ నుంచి చిలకలూరిపేట వరకు ఉన్న 69.4 కిలోమీటర్ల రహదారి విభాగంలో పెట్టుబడులు పెట్టేందుకు ప్రజలకు అవకాశం కల్పించింది. ‘టోల్ ఆపరేట్ అండ్ ట్రాన్స్‌ఫర్’ (TOT) విధానంలో భాగంగా ఆసక్తి ఉన్న సంస్థలు లేదా పెట్టుబడిదారులు ముందస్తుగా పెట్టుబడి పెట్టి నిర్దిష్ట కాలం పాటు టోల్ నిర్వహణ బాధ్యతలు చేపట్టవచ్చు.
ఇప్పటికే రాష్ట్రంలోని కొన్ని హైవే సెక్షన్లలో ఈ విధానం అమల్లో ఉంది. విజయవాడ–చిలకలూరిపేట సెక్షన్‌తో పాటు తమిళనాడులోని తడ–చెన్నై రహదారి విభాగంలో కూడా ఈ విధానాన్ని అమలు చేయాలని అధికారులు భావిస్తున్నారు. బారియర్‌లెస్‌ టోల్‌ప్లాజాల అమలుతో భవిష్యత్తులో హైవే ప్రయాణం మరింత వేగవంతంగా, సౌకర్యవంతంగా మారనుందని అధికారులు పేర్కొంటున్నారు.