‘గ్లోబల్ సౌత్’ నిర్ణయాలు తీసుకునే స్థాయికి ఎదగాలి.. నాయకత్వం వహించడానికి భారత్ సిద్ధం.. బ్రిక్స్ సదస్సులో ప్రధాని మోదీ

బ్రిక్స్ దేశాల కూటమి 20వ శిఖరాగ్ర సదస్సు శనివారం న్యూఢిల్లీలోని భారత మండపంలో ఘనంగా ప్రారంభమైంది. ప్రధానమంత్రి నరేంద్ర మోదీ సదస్సును లాంఛనంగా ప్రారంభించి, వివిధ దేశాల అధినేతలను ఉద్దేశించి ప్రసంగించారు.

ఈ సందర్భంగా మోదీ కీలక వ్యాఖ్యలు చేశారు. అభివృద్ధి చెందుతున్న, పేద దేశాలు ఇకపై ఇతర దేశాలు తీసుకునే నిర్ణయాలను అనుసరించే స్థితిలో ఉండకూడదని ఆయన అన్నారు. ప్రపంచ వ్యవహారాల్లో నిర్ణయాలు తీసుకునే స్థాయికి ఈ దేశాలు ఎదగాల్సిన అవసరం ఉందని పిలుపునిచ్చారు.

అభివృద్ధి చెందుతున్న దేశాలకు బలమైన నాయకత్వం, సమాన ప్రాతినిధ్యం అవసరమని పేర్కొన్న మోదీ.. ఈ దిశగా భారత్ నాయకత్వం వహించేందుకు సిద్ధంగా ఉందని స్పష్టం చేశారు.

రెండు రోజుల పాటు జరగనున్న బ్రిక్స్ శిఖరాగ్ర సదస్సు 2026ను భారత ప్రధాన మంత్రి నరేంద్ర మోదీ శనివారం అధికారికంగా ప్రారంభించారు. ఈ సందర్భంగా రష్యా అధ్యక్షుడు వ్లాదిమిర్ పుతిన్, చైనా అధ్యక్షుడు షీ జిన్‌పింగ్ సహా వివిధ దేశాల నుంచి హాజరైన ప్రపంచ నేతలకు ప్రధాని ఘన స్వాగతం పలికారు. అనంతరం ప్రారంభోపన్యాసం చేస్తూ బ్రిక్స్ దేశాల నాయకులను ఉద్దేశించి కీలక వ్యాఖ్యలు చేశారు.

భారత్ బ్రిక్స్ అధ్యక్ష బాధ్యతలను ప్రజలే కేంద్రంగా, మానవత్వమే ప్రధాన లక్ష్యంగా నిర్వర్తించిందని ప్రధాని మోదీ పేర్కొన్నారు. ఈ క్రమంలో స్థిరత్వం, ఆవిష్కరణలు, సహకారం, సుస్థిర అభివృద్ధికి అత్యధిక ప్రాధాన్యత ఇచ్చినట్లు తెలిపారు. ప్రపంచ దక్షిణ దేశాలు (గ్లోబల్ సౌత్) అంతర్జాతీయ నిర్ణయ ప్రక్రియలో మరింత కీలక పాత్ర పోషించే స్థాయికి ఎదగాల్సిన అవసరం ఉందని ఆయన అన్నారు. ఈ దిశగా నాయకత్వం వహించేందుకు భారత్ సిద్ధంగా ఉందని స్పష్టం చేశారు.

ప్రధాని మోదీ ప్రసంగంలోని కీలక అంశాలు

బ్రిక్స్ 20వ వార్షికోత్సవాన్ని జరుపుకుంటున్న ఈ సమయంలో 2026 సదస్సు చారిత్రక ప్రాధాన్యతను సంతరించుకుందని ప్రధాని మోదీ అన్నారు. 20 ఏళ్ల వయస్సు మానవ జీవితంలో పరిపక్వత, బాధ్యతలతో కూడిన కొత్త దశకు నాంది పలికినట్లే, బ్రిక్స్ కూడా తన 20 ఏళ్ల ప్రయాణంలో కొత్త బాధ్యతలు, కొత్త అవకాశాలతో ముందుకు సాగాల్సిన సమయం ఆసన్నమైందని పేర్కొన్నారు.

‘‘20 ఏళ్ల వయస్సు అనేది కలలకు బాధ్యతలు జతకలిసే దశ. సామర్థ్యాలకు కొత్త దిశ లభించే సమయం. బ్రిక్స్ కూడా ఇప్పుడు అదే తరహాలో మరింత బాధ్యతాయుతంగా, సమర్థవంతంగా ముందుకు సాగాల్సిన అవసరం ఉంది’’ అని ప్రధాని మోదీ తన ప్రసంగంలో పేర్కొన్నారు.

భారత్ చేపట్టిన బ్రిక్స్ అధ్యక్షత ప్రజల ప్రయోజనాలు, మానవత్వానికి అత్యంత ప్రాధాన్యత ఇచ్చే విధానంపై ఆధారపడి ఉందని ప్రధాని నరేంద్ర మోదీ తెలిపారు. స్థిరత్వం, వినూత్నత, సహకారం, సుస్థిరతలను ప్రధాన ప్రాధాన్యతలుగా నిర్ణయించుకుని బ్రిక్స్ కార్యక్రమాలను సామాన్య ప్రజలతో అనుసంధానించేందుకు ప్రత్యేకంగా కృషి చేసినట్లు పేర్కొన్నారు.

ఈ లక్ష్యంతో భారత్ ఆధ్వర్యంలో 350కి పైగా సమావేశాలను నిర్వహించినట్లు మోదీ వెల్లడించారు. అలాగే దాదాపు 30 నగరాల్లో వివిధ దేశాల నుంచి వచ్చిన ప్రతినిధి బృందాలకు ఆతిథ్యం ఇచ్చే అవకాశం లభించిందని తెలిపారు. బ్రిక్స్‌ను కేవలం ప్రభుత్వాల స్థాయిలోనే కాకుండా ప్రజలకు చేరువ చేసే దిశగా భారత్ తన అధ్యక్ష బాధ్యతలను నిర్వహించిందని వివరించారు.

బ్రిక్స్ ఇప్పుడు తన 20 ఏళ్ల ప్రస్థానంలో పరిణతి చెందిన దశకు చేరుకుందని ప్రధాని మోదీ అన్నారు. గత రెండు దశాబ్దాల్లో ప్రపంచ వేదికపై బ్రిక్స్ తనకంటూ ప్రత్యేకమైన గుర్తింపును, ప్రాధాన్యతను సంపాదించుకుందని పేర్కొన్నారు.

బ్రిక్స్ దేశాలు పరస్పరం ఒకరి అభిప్రాయాలు, దృక్పథాలను గౌరవించుకుంటూ ఏకాభిప్రాయంతో ముందుకు సాగుతున్నాయని మోదీ తెలిపారు. బ్రిక్స్ ఏ ఒక్క దేశానికి లేదా వర్గానికి వ్యతిరేకంగా పనిచేసే వేదిక కాదని, అన్ని దేశాలను కలుపుకొని సమష్టిగా ముందుకు సాగడమే దాని ప్రాథమిక లక్ష్యమని స్పష్టం చేశారు.