ఢిల్లీలోని తిలక్ నగర్‌లో మాజీ ముఖ్యమంత్రి, ఆమ్ ఆద్మీ పార్టీ (ఆప్) నేత అర్వింద్ కేజ్రీవాల్ పర్యటన సందర్భంగా తీవ్ర ఉద్రిక్తత చోటుచేసుకుంది. కార్యక్రమానికి సంబంధించిన దృశ్యాలను సెల్‌ఫోన్‌లో రికార్డ్ చేస్తున్న సివిల్ డ్రెస్‌లో ఉన్న ఓ పోలీసు హెడ్ కానిస్టేబుల్‌ను కొంతమంది ఆప్ కార్యకర్తలు చుట్టుముట్టారు. ఈ క్రమంలో ఆయనను నెట్టివేయడంతో పాటు దాడికి పాల్పడినట్లు ఆరోపణలు ఉన్నాయి.
పరిస్థితి ఉద్రిక్తంగా మారడంతో యూనిఫాంలో ఉన్న పోలీసులు వెంటనే అక్కడికి చేరుకుని జోక్యం చేసుకున్నారు. హెడ్ కానిస్టేబుల్‌ను కార్యకర్తల నుంచి రక్షించి అక్కడి నుంచి తీసుకెళ్లారు. విధి నిర్వహణలో ఉన్న పోలీసు అధికారిపై దాడి జరిగిన ఘటనపై పోలీసులు కేసు నమోదు చేసేందుకు చర్యలు చేపడుతున్నట్లు సమాచారం.
ఈ ఘటనకు సంబంధించిన పూర్తి వివరాలు, అక్కడ చోటుచేసుకున్న పరిణామాలు, పోలీసులు తీసుకుంటున్న చర్యలపై ఇప్పుడు చూద్దాం.
దేశ రాజధాని ఢిల్లీలోని వెస్ట్ ఢిల్లీ తిలక్ నగర్ ప్రాంతంలో ఉద్రిక్త పరిస్థితులు నెలకొన్నాయి. ఆమ్ ఆద్మీ పార్టీ (ఆప్) జాతీయ కన్వీనర్, మాజీ ముఖ్యమంత్రి అర్వింద్ కేజ్రీవాల్ పర్యటన సందర్భంగా అనూహ్య ఘటన చోటుచేసుకుంది. సాదాసీదా దుస్తుల్లో విధుల్లో ఉన్న ఢిల్లీ పోలీసు హెడ్ కానిస్టేబుల్‌పై కొందరు ఆప్ కార్యకర్తలు దాడికి పాల్పడినట్లు సమాచారం. ఈ ఘటనకు సంబంధించిన దృశ్యాలు కెమెరాకు చిక్కగా, ప్రస్తుతం సోషల్ మీడియాలో వైరల్‌గా మారాయి. ఘటనపై పోలీసులు దర్యాప్తు చేపట్టినట్లు తెలుస్తోంది.
పోలీసులు తెలిపిన వివరాల ప్రకారం, అరవింద్ కేజ్రీవాల్ తిలక్ నగర్ పర్యటనలో ఉన్న సమయంలో విధుల్లో భాగంగా ఓ హెడ్ కానిస్టేబుల్ సివిల్ డ్రెస్‌లో మొబైల్ ఫోన్‌తో దృశ్యాలను రికార్డు చేస్తున్నారు. దీనిని గమనించిన ఆప్ కార్యకర్తలు ఒక్కసారిగా ఆయనను చుట్టుముట్టారు. పోలీసు అధికారిని నెట్టివేస్తూ, హేళన చేస్తూ గొడవకు దిగినట్లు పోలీసులు తెలిపారు. అనంతరం అతడిని ఫ్లైఓవర్ కిందకు తీసుకెళ్లి బయటకు వెళ్లకుండా అడ్డుకున్నారని పేర్కొన్నారు.
పరిస్థితి ఉద్రిక్తంగా మారడంతో యూనిఫాంలో ఉన్న ఇతర పోలీసు సిబ్బంది వెంటనే అక్కడికి చేరుకుని, పెరుగుతున్న జనసమూహం మధ్య నుంచి తమ సహచరుడిని బయటకు తీసుకువచ్చారు. హెడ్ కానిస్టేబుల్‌కు గాయాలయ్యాయా అనే విషయాన్ని నిర్ధారించేందుకు వైద్య పరీక్షలు నిర్వహించినట్లు ఉన్నతాధికారులు తెలిపారు. విధి నిర్వహణలో ఉన్న పోలీసు అధికారిపై దాడి జరిగిన నేపథ్యంలో సంబంధిత వ్యక్తులపై ఎఫ్‌ఐఆర్ నమోదు చేసే అంశాన్ని పరిశీలిస్తున్నట్లు వెల్లడించారు.
ఇదిలా ఉండగా, ఢిల్లీ మంత్రి పర్వేష్ వర్మ రోడ్డు తనిఖీ సందర్భంగా ఓ వ్యక్తిపై చేయి చేసుకున్న ఘటనకు మరుసటి రోజే కేజ్రీవాల్ తిలక్ నగర్‌లో పర్యటించారు. ఎంపీ సంజయ్ సింగ్, స్థానిక ఎమ్మెల్యే జర్నైల్ సింగ్‌లతో కలిసి ఆయన అక్కడ నిర్మించిన కొత్త రోడ్డును పరిశీలించారు. నిర్మించిన కొద్ది రోజులకే రోడ్డు చేతితోనే పెకిలిపోతుందని ఆరోపిస్తూ, బీజేపీ పాలనలో నిర్మాణాల నాణ్యతపై కేజ్రీవాల్ తీవ్ర విమర్శలు చేశారు. ఆప్ హయాంలో నిర్మించిన రోడ్లకు ఐదేళ్ల గ్యారెంటీ ఉండేదని ఆయన గుర్తుచేశారు.
అయితే, పర్వేష్ వర్మతో వివాదానికి దిగిన అనంతరం దెబ్బలు తిన్న 22 ఏళ్ల సాహిబ్ సింగ్‌పై గతంలో మున్సిపల్ కార్పొరేషన్ (ఎంసీడీ) చెత్త సేకరణ కార్మికుడిపై దాడికి సంబంధించిన కేసులో ఎఫ్‌ఐఆర్ నమోదై ఉన్న విషయం తర్వాత వెలుగులోకి వచ్చింది.