ప్రస్తుత రోజుల్లో వ్యవసాయం రైతులకు మరింత భారంగా మారుతోంది. పెరుగుతున్న పెట్టుబడులు, వాతావరణ మార్పులు, అనూహ్య పరిస్థితులు రైతుల ఆదాయంపై తీవ్ర ప్రభావం చూపుతున్నాయి. భూమినే నమ్ముకుని సాగు చేస్తున్న అనేక మంది రైతులకు చివరికి నష్టాలే మిగులుతున్నాయి. అయితే, ఆధునిక సాగు పద్ధతులను అవలంబిస్తూ, తక్కువ విస్తీర్ణంలోనూ అధిక లాభాలను ఆర్జిస్తున్న రైతులు కూడా ఉన్నారు.
అలాంటి వారిలో మహారాష్ట్రకు చెందిన యువ రైతు అర్జున్ సబలే ఒకరు. అగ్రికల్చర్లో డిగ్రీ పూర్తి చేసిన అర్జున్ సబలే 2016లో పూల సాగుపై దృష్టి సారించారు. తనకున్న ఎకరం భూమిలో తొలుత కేవలం 25 సెట్లతో ప్రయోగాత్మకంగా పూల సాగును ప్రారంభించారు. ఆధునిక పద్ధతులతో చేపట్టిన ఈ ప్రయోగం విజయవంతం కావడంతో, పూల సాగు ద్వారా మంచి ఆదాయం పొందవచ్చని ఆయన నిరూపించారు.
ఒక్క ఎకరం భూమి ఉంటే చాలు.. పంట చేతికొచ్చే వరకు నెలల తరబడి ఎదురుచూడకుండా, ప్రతిరోజూ స్థిరమైన ఆదాయం పొందవచ్చంటే నమ్మగలరా? మహారాష్ట్రలోని అహల్యానగర్ జిల్లాకు చెందిన యువ రైతు అర్జున్ సబలే దీనిని ఆచరణలో చేసి చూపిస్తున్నారు. నేచురల్లీ వెంటిలేటెడ్ పాలీహౌస్లో గులాబీలు, జెర్బెరా పూలను సాగు చేస్తూ ఆయన రోజుకు రూ.12,000 నుంచి రూ.13,000 వరకు ఆదాయం పొందుతున్నారు. ప్రస్తుతం ఆయన విజయగాథ సోషల్ మీడియాలో వైరల్గా మారింది.
అర్జున్ సబలే నెలకు రూ.3.5 లక్షలకు పైగా టర్నోవర్ సాధిస్తుండగా, అన్ని ఖర్చులు పోగా సుమారు రూ.2.5 లక్షల వరకు నికర లాభం పొందుతున్నారు. తక్కువ విస్తీర్ణంలోనూ ఆధునిక వ్యవసాయ పద్ధతులను ఉపయోగిస్తే మంచి ఆదాయం సాధించవచ్చని ఆయన సాగు విధానం నిరూపిస్తోంది.
పావు ఎకరంతో మొదలైన పూల వ్యాపారం
బంతి, చామంతి వంటి పూలను సాగు చేసే రైతు కుటుంబం నుంచి వచ్చిన అర్జున్ సబలేకు వ్యవసాయం కొత్తేమీ కాదు. అయితే, సంప్రదాయ పూల సాగులో మార్కెట్ ధరలు తరచూ పడిపోవడం, ఒకేసారి భారీగా సరఫరా రావడం వంటి సమస్యలను ఆయన గమనించారు. దీంతో సాధారణ పంటలకు ప్రత్యామ్నాయంగా, అధిక ఆదాయం వచ్చే సాగు పద్ధతులపై దృష్టి పెట్టారు.
అగ్రికల్చర్ విద్య అభ్యసిస్తున్న సమయంలో వివిధ వ్యవసాయ క్షేత్రాలను సందర్శించిన సబలేకు రక్షిత సాగు విధానం (Protected Cultivation)పై ఆసక్తి పెరిగింది. ఈ పద్ధతిలో వాతావరణ పరిస్థితుల ప్రభావాన్ని కొంతవరకు నియంత్రిస్తూ నాణ్యమైన పూలను ఉత్పత్తి చేయవచ్చని తెలుసుకున్నారు.
దీంతో 2016లో తొలిసారిగా పావు ఎకరం విస్తీర్ణంలో గులాబీల సాగును ప్రారంభించారు. చిన్న స్థాయిలో మొదలైన ఈ ప్రయోగం క్రమంగా విజయవంతమవడంతో, ఆ తర్వాత సాగు విస్తీర్ణాన్ని పెంచుతూ గులాబీలు, జెర్బెరా వంటి పూలను పాలీహౌస్లో సాగు చేయడం ప్రారంభించారు.
తొలి ప్రయత్నంలోనే మంచి ఫలితం
అర్జున్ సబలే తొలిసారిగా గులాబీల సాగు చేపట్టినప్పుడు రోజుకు సుమారు 500 పూల దిగుబడి వచ్చింది. ఒక్కో గులాబీని సగటున రూ.5 చొప్పున విక్రయించడంతో, చిన్న విస్తీర్ణంలోని సాగు నుంచే రోజుకు దాదాపు రూ.2,500 ఆదాయం సమకూరింది. తొలి ప్రయత్నంలోనే వచ్చిన ఈ ఫలితం ఆయనకు మరింత ప్రోత్సాహాన్ని ఇచ్చింది. దీంతో సాగు విస్తీర్ణాన్ని పెంచడంతో పాటు, జెర్బెరా పూల సాగును కూడా ప్రారంభించారు.
ఒకే ఎకరంలో 32 వేల మొక్కలు
ప్రస్తుతం సబలే తనకున్న ఒక ఎకరం భూమిని గులాబీలు, జెర్బెరా సాగుకు సమానంగా కేటాయించారు. ఒక్కో రకానికి 16,000 మొక్కల చొప్పున మొత్తం 32,000 మొక్కలను సాగు చేస్తున్నారు.
ఈ తోట నుంచి ప్రతిరోజూ సుమారు 1,000 గులాబీలు, 2,000 జెర్బెరా పూలు దిగుబడి వస్తున్నాయని సబలే తెలిపారు. మార్కెట్లో ఒక్క గులాబీకి రూ.5, జెర్బెరా పువ్వుకు రూ.4 చొప్పున ధర లభిస్తే, రెండు పంటల ద్వారా రోజుకు సుమారు రూ.13,000 వరకు అమ్మకాలు జరిగే అవకాశం ఉంది. అయితే, ధరల్లో హెచ్చుతగ్గులను పరిగణనలోకి తీసుకుని తన రోజువారీ ఆదాయాన్ని సబలే సుమారు రూ.12,000గా లెక్కిస్తున్నారు.
ఈ సాగులో కూలీల ఖర్చుతో పాటు ఎరువులు, పురుగుమందులు, ప్యాకింగ్ తదితర వ్యయాలు ఉంటాయి. వీటన్నింటినీ కలిపి ఆయన నెలకు సుమారు రూ.1 లక్ష వరకు ఖర్చు చేస్తున్నట్లు తెలిపారు. ఖర్చులను మినహాయించిన తర్వాత కూడా పూల సాగు ద్వారా గణనీయమైన ఆదాయాన్ని పొందుతున్నారు.