మాజీ ముఖ్యమంత్రి, వైఎస్సార్ కాంగ్రెస్ పార్టీ అధ్యక్షుడు వైఎస్ జగన్ మోహన్ రెడ్డి, వైసీపీ నాయకత్వంపై ఏపీ హోంమంత్రి వంగలపూడి అనిత తీవ్ర విమర్శలు గుప్పించారు. కూటమి ప్రభుత్వం రెండేళ్ల పాలనలో రాష్ట్రవ్యాప్తంగా అభివృద్ధి, సంక్షేమ కార్యక్రమాలు వేగంగా అమలవుతున్నాయని ఆమె పేర్కొన్నారు. ఎమ్మెల్యేలు తమ నియోజకవర్గాల్లో చేపట్టిన అభివృద్ధి పనులను ప్రజలకు వివరిస్తూ ప్రభుత్వ పనితీరును చేరవేస్తున్నారని తెలిపారు.
ముఖ్యమంత్రి చంద్రబాబు నాయుడు పెట్టుబడులు, పరిశ్రమలను ఆకర్షించేందుకు దేశ, విదేశాల్లో పర్యటిస్తూ రాష్ట్ర ప్రగతికి కృషి చేస్తున్నారని అనిత అన్నారు. అయితే ప్రతిపక్షం ప్రజా సమస్యలపై నిర్మాణాత్మక చర్చలు చేయకుండా, పరామర్శ యాత్రల పేరుతో ఉద్రిక్త పరిస్థితులు సృష్టించే ప్రయత్నం చేస్తోందని ఆరోపించారు. జగన్ ప్రతి పర్యటనలోనూ శాంతిభద్రతలకు విఘాతం కలిగే ఘటనలు చోటుచేసుకుంటున్నాయని ఆమె విమర్శించారు. మహిళలపై దాడులు, ప్రజలకు అసౌకర్యం కలిగించే సంఘటనలు కూడా పెరుగుతున్నాయని వ్యాఖ్యానించారు.
ప్రభుత్వ నిర్ణయాలపై బాధ్యతాయుతంగా ప్రశ్నిస్తే సమాధానం చెప్పేందుకు తాము సిద్ధంగా ఉన్నామని, అయితే బలప్రదర్శనలు, ఉద్రిక్తతలను రెచ్చగొట్టే రాజకీయాలకు తావు ఇవ్వకూడదని మంత్రి సూచించారు.
పోలీసులను బెదిరించేలా, ప్రజల్లో భయాందోళనలు సృష్టించేలా ప్రతిపక్ష నేతలు వ్యవహరిస్తున్నారని ఆమె ఆరోపించారు. కల్తీ మద్యం కేసులో నిందితులను పరామర్శించేందుకు ఆసక్తి చూపుతున్న ప్రతిపక్షం, బాధిత కుటుంబాలను మాత్రం పట్టించుకోవడం లేదని విమర్శించారు. మాజీ మంత్రి సిదిరి అప్పలరాజు కుమారుడు దానయ్య రోడ్డు ప్రమాదంలో మరణించినప్పటికీ, ఆ కుటుంబాన్ని జగన్ పరామర్శించలేదని గుర్తు చేశారు.
రాష్ట్రానికి ప్రస్తుతం అవసరమైనది అభివృద్ధి, సంక్షేమం, పెట్టుబడులేనని మంత్రి అనిత స్పష్టం చేశారు. విధ్వంసక రాజకీయాలను ప్రజలు తిరస్కరించాలని, రాష్ట్ర భవిష్యత్తు కోసం శాంతి, ప్రగతి, ఉపాధి అవకాశాలకు ప్రాధాన్యం ఇవ్వాలని ఆమె ప్రజలను కోరారు. ప్రజలు వాస్తవ పరిస్థితులను గమనించి సరైన నిర్ణయం తీసుకోవాలని మంత్రి అనిత విజ్ఞప్తి చేశారు.
