
మహిళలు, వృద్ధులను లక్ష్యంగా చేసుకుని దొంగలు కొత్త తరహాలో చోరీలకు పాల్పడుతున్నారు. తాజాగా ముంబైలో డెలివరీ ఏజెంట్ వేషంలో వచ్చిన ఓ దుండగుడు ఇంటి ముందు ఉన్న వృద్ధురాలితో మాటలు కలిపి, ఆమె మెడలోని బంగారు గొలుసును లాక్కొని పరారయ్యాడు. ఈ ఘటనకు సంబంధించిన దృశ్యాలు సీసీటీవీ కెమెరాల్లో రికార్డయ్యాయి. ప్రస్తుతం ఈ వీడియో సోషల్ మీడియాలో వైరల్గా మారింది.
ఇంటి తలుపు తెరుస్తుండగా మాటలు కలిపి..
ముంబైలోని కాందివలీ వెస్ట్ ప్రాంతంలోని ఓ నివాస సముదాయంలో నవంబర్ 3వ తేదీ రాత్రి ఈ ఘటన చోటుచేసుకుంది. రాత్రి సుమారు 9:23 గంటల సమయంలో ఓ వృద్ధురాలు బయటకు వెళ్లి తిరిగి తన ఫ్లాట్కు చేరుకున్నారు. ఇంటి తలుపు తెరిచేందుకు ప్రయత్నిస్తుండగా డెలివరీ ఏజెంట్లా దుస్తులు ధరించిన ఓ గుర్తుతెలియని వ్యక్తి ఆమె వద్దకు వచ్చాడు.
ముందుగా పక్కింట్లో నివసించే వ్యక్తి గురించి అడుగుతూ ఆమెతో మాటలు కలిపాడు. అతడు ఏదో సాధారణ విషయం అడుగుతున్నాడని భావించిన వృద్ధురాలు అతడితో మాట్లాడారు.
ఒక్కసారిగా గొలుసు లాక్కొని పరారీ
వృద్ధురాలు ఏమాత్రం అప్రమత్తం అయ్యేలోపే ఆ వ్యక్తి ఒక్కసారిగా ఆమెపై దాడి చేశాడు. మెడలో ఉన్న బంగారు గొలుసును బలవంతంగా లాక్కొని అక్కడి నుంచి వేగంగా పరారయ్యాడు. ఈ పరిణామంతో బాధితురాలు షాక్కు గురయ్యారు.
సీసీటీవీలో రికార్డైన ఘటన
ఈ చోరీకి సంబంధించిన దృశ్యాలు నివాస సముదాయంలోని సీసీటీవీ కెమెరాల్లో రికార్డయ్యాయి. బాధితురాలి ఫిర్యాదు మేరకు పోలీసులు కేసు నమోదు చేసి నిందితుడి కోసం గాలిస్తున్నారు. సీసీటీవీ ఫుటేజీ ఆధారంగా దర్యాప్తు కొనసాగిస్తున్నారు.
డెలివరీ ఏజెంట్ వేషంలో వచ్చి వృద్ధురాలి గొలుసు దొంగిలించిన ఘటన స్థానికంగా కలకలం రేపింది. అపరిచితులు ఇంటి వద్దకు వచ్చినప్పుడు అప్రమత్తంగా ఉండాలని ఈ ఘటన మరోసారి హెచ్చరిస్తోంది.
