Palm Oil Health Effects: ఉదయం అల్పాహారంగా తీసుకునే టిఫిన్ల నుంచి సాయంత్రం టీతో పాటు తినే బిస్కెట్లు, చిప్స్ వరకు.. మనకు తెలియకుండానే పామాయిల్ రోజువారీ ఆహారంలో భాగమైపోయింది. ముఖ్యంగా ప్యాకేజ్డ్ ఫుడ్స్, ప్రాసెస్డ్ ఆహార పదార్థాల తయారీలో పామాయిల్‌ను విస్తృతంగా ఉపయోగిస్తున్నారు. దీంతో పామాయిల్ తీసుకోవడం వల్ల గుండె ఆరోగ్యానికి ముప్పు కలుగుతుందా? అనే సందేహాలు చాలామందిలో వ్యక్తమవుతున్నాయి. అయితే, పామాయిల్‌ను పూర్తిగా ప్రమాదకరమైనదిగా భావించాల్సిన అవసరం లేదని ఆరోగ్య నిపుణులు చెబుతున్నారు. ఇందులో సంతృప్త కొవ్వులు అధికంగా ఉండటంతో, మోతాదుకు మించి తీసుకుంటే ఎల్‌డీఎల్‌ (చెడు) కొలెస్ట్రాల్ పెరిగే అవకాశం ఉంది. ముఖ్యంగా పామాయిల్‌తో తయారైన ప్రాసెస్డ్ ఆహారాలను తరచూ తినడం ఆరోగ్యంపై ప్రతికూల ప్రభావం చూపవచ్చు. అందుకే పామాయిల్ ఎంత పరిమాణంలో తీసుకుంటున్నాం, మన మొత్తం ఆహారపు అలవాట్లు ఎలా ఉన్నాయి అనే అంశాలపై దృష్టి పెట్టడం ముఖ్యం. సమతుల్య ఆహారం తీసుకుంటూ, సంతృప్త కొవ్వులు అధికంగా ఉండే పదార్థాలను పరిమితంగా తీసుకోవడం గుండె ఆరోగ్యానికి మేలు చేస్తుంది.
Palm Oil Health Effects: పామాయిల్ రకాలు, గుండె ఆరోగ్యం & తీసుకోవాల్సిన జాగ్రత్తలు
పామాయిల్‌లోని పోషకాలు.. ఆరోగ్యంపై ఎలాంటి ప్రభావం?
ఆయిల్ పామ్ పండ్ల నుంచి తీసే పామాయిల్‌లో పాల్మిటిక్, ఒలియిక్, లినోలియిక్ వంటి కొవ్వు ఆమ్లాలతో పాటు విటమిన్-ఈ, కెరోటినాయిడ్లు ఉంటాయి. అయితే, పామాయిల్‌లోని పోషకాలు దాని రకం, శుద్ధి చేసే విధానాన్ని బట్టి మారుతాయి.
పామాయిల్‌లో ప్రధానంగా మూడు రకాలు ఉన్నాయి:
- రెడ్ పామాయిల్: శుద్ధి చేయని ఈ నూనెలో కెరోటినాయిడ్లు, విటమిన్-ఈ అధికంగా ఉంటాయి.
- రిఫైన్డ్ పామాయిల్: శుద్ధి చేసే ప్రక్రియలో కెరోటినాయిడ్ల వంటి కొన్ని పోషకాలు గణనీయంగా తగ్గుతాయి.
- పామ్ కెర్నల్ ఆయిల్: ఆయిల్ పామ్ పండు విత్తనం నుంచి తీసే ఈ నూనెలో శాచురేటెడ్ ఫ్యాట్స్ ఎక్కువగా ఉంటాయి.
గుండె ఆరోగ్యానికి పామాయిల్ ప్రమాదకరమా?
పామాయిల్‌లో కొలెస్ట్రాల్ ఉండదు. అయితే, 100 గ్రాముల పామాయిల్‌లో సుమారు 50 గ్రాముల వరకు శాచురేటెడ్ ఫ్యాట్స్ ఉంటాయి. వీటిని అధికంగా తీసుకోవడం వల్ల రక్తంలో చెడు కొలెస్ట్రాల్ (LDL) పెరిగే అవకాశం ఉంది. ఇది దీర్ఘకాలంలో గుండె జబ్బుల ముప్పును పెంచవచ్చు. అందుకే పామాయిల్‌ను పరిమితంగా ఉపయోగించడం మంచిది.
పామాయిల్‌తో ప్రయోజనాలు కూడా ఉన్నాయా?
అవును. ముఖ్యంగా రెడ్ పామాయిల్‌లో ఉండే కెరోటినాయిడ్లు శరీరంలో విటమిన్-ఏగా మారడానికి సహాయపడతాయి. ఇందులోని విటమిన్-ఈ సమ్మేళనాలు, ముఖ్యంగా టోకోట్రియనాల్స్, యాంటీఆక్సిడెంట్ లక్షణాలను కలిగి ఉంటాయి. అయితే, పామాయిల్ తీసుకోవడం వల్లే అన్ని పోషక లోపాలు తగ్గుతాయని లేదా గుండె ఆరోగ్యం మెరుగుపడుతుందని భావించకూడదు.
ఆరోగ్యానికి అసలు సమస్య ఎక్కడుంది?
పామాయిల్ ఒక్కటే ఆరోగ్య సమస్యలకు కారణం కాదు. మొత్తం ఆహారపు అలవాట్లు, తీసుకునే కొవ్వుల పరిమాణం, శారీరక శ్రమ వంటి అంశాలు కూడా ప్రభావం చూపుతాయి. ఒకే నూనెను పదేపదే అధిక ఉష్ణోగ్రత వద్ద వేడి చేసి ఉపయోగించడం వల్ల హానికర సమ్మేళనాలు ఏర్పడవచ్చు. అలాగే, పామాయిల్ ఎక్కువగా ఉండే బిస్కెట్లు, చిప్స్, ఇతర ప్యాకేజ్డ్ ఆహారాలను తరచూ అధికంగా తీసుకోవడం వల్ల అదనపు కేలరీలు శరీరంలో చేరవచ్చు.
WHO సూచనల ప్రకారం..
ప్రపంచ ఆరోగ్య సంస్థ (WHO) సూచనల ప్రకారం, రోజువారీ మొత్తం కేలరీల్లో శాచురేటెడ్ ఫ్యాట్స్ వాటా 10 శాతానికి మించకూడదు. పామాయిల్ వినియోగాన్ని పరిమితం చేస్తూ, వేరుశెనగ, నువ్వులు, ఇతర నట్స్, సీడ్స్‌తో పాటు అసంతృప్త కొవ్వులు ఎక్కువగా ఉండే నూనెలను ఆహారంలో సమతుల్యంగా చేర్చుకోవడం మంచిది.
మొత్తానికి, పామాయిల్ పేరు వినగానే భయపడాల్సిన అవసరం లేదు. అయితే, దాన్ని అధికంగా ఉపయోగించడం, పదేపదే వేడి చేసిన నూనెతో వండిన ఆహారాలు తినడం, ప్రాసెస్ చేసిన ఆహారాలపై ఎక్కువగా ఆధారపడటం మంచిది కాదు. నూనె ఏదైనా సరే.. మోతాదును నియంత్రించడం, సమతుల్య ఆహారం తీసుకోవడమే ఆరోగ్యానికి కీలకం.