
కోలీవుడ్ స్టార్ హీరో సూర్యకు ఈ ఏడాది మంచి విజయాలు దక్కుతున్నాయి. ఇప్పటికే ‘వీరభద్రుడు’, ‘విశ్వనాథ్ అండ్ సన్స్’ సినిమాలతో ప్రేక్షకులను అలరించిన ఆయన.. ఇప్పుడు ‘సీన్’ (Scene) చిత్రంతో మరోసారి థియేటర్లలో సందడి చేస్తున్నారు. ‘రోమాంచం’, ‘ఆవేశం’ వంటి హిట్ చిత్రాలను తెరకెక్కించిన జీతూ మాధవన్ ఈ సినిమాకు దర్శకత్వం వహించారు. సూర్య, జ్యోతిక స్వయంగా నిర్మించడంతో పాటు మలయాళ నటులు నస్లేన్, టోవినో థామస్ కీలక పాత్రల్లో నటించడం సినిమాపై ఆసక్తిని పెంచింది. మరి ఈ క్రైమ్ కామెడీ థ్రిల్లర్ ప్రేక్షకులను ఎంతవరకు ఆకట్టుకుంది? సూర్య ఖాతాలో మరో హిట్ చేరిందా?
కథేంటంటే?
‘సీన్’ సినిమాలో ప్రేమ్రాజ్ (సూర్య) క్రైమ్ బ్రాంచ్లో డీఎస్పీగా పనిచేస్తుంటాడు. చూపు సరిగ్గా లేకపోయినా తన అసాధారణమైన తెలివితేటలతో ఎన్నో క్లిష్టమైన కేసులను పరిష్కరిస్తాడు. కేవలం ఐదేళ్లలోనే పోలీస్ శాఖలో మంచి గుర్తింపు సంపాదిస్తాడు. అయితే వ్యక్తిగత కారణాలతో ఉద్యోగానికి రాజీనామా చేయాలని నిర్ణయించుకుంటాడు.
అదే సమయంలో నగరంలో వరుస హత్యలు కలకలం సృష్టిస్తాయి. హత్యకు గురైన వారి మృతదేహాలను పరిశీలించిన పోలీసులు.. గతంలో ప్రేమ్రాజ్ విచారించిన పెర్ఫ్యూమ్ సీరియల్ కిల్లర్ విక్టర్ (టోవినో థామస్) కేసుతో పోలికలను గుర్తిస్తారు. అయితే విక్టర్ అప్పటికే జైలులో ఉండటంతో ఈ హత్యలు చేస్తున్నదెవరనే ప్రశ్న తలెత్తుతుంది.
ఈ కేసును ఛేదించేందుకు ప్రేమ్రాజ్ ప్రయత్నిస్తుండగా.. అతడికి సంబంధించిన ఓ కీలక విషయం పోలీసులకు తెలుస్తుంది. దీంతో క్రైమ్ బ్రాంచ్ చీఫ్ స్టీఫెన్ (లాల్) అతడిని విధుల నుంచి తొలగిస్తాడు. అయినప్పటికీ వెనక్కి తగ్గని ప్రేమ్రాజ్.. మాయ (నజ్రియా) సహాయంతో రహస్యంగా విచారణ కొనసాగిస్తాడు.
ఈ క్రమంలో ఈశ్వరన్ (నస్లేన్) అనే ప్రమాదకరమైన కాంట్రాక్ట్ సీరియల్ కిల్లర్తో అతడికి ఎదురుపడుతుంది. అసలు ఈశ్వరన్ ఎవరు? అతడిని ప్రేమ్రాజ్ ఎలా పట్టుకున్నాడు? ఈ కేసు వెనుక దాగి ఉన్న రహస్యాలేంటి? అన్నది తెరపై చూడాల్సిందే.
సినిమా ఎలా ఉందంటే?
చూపులేని పోలీస్ అధికారి, మూర్ఛ వ్యాధితో బాధపడే యువతి, మతిమరుపు సమస్య ఉన్న తండ్రి, మద్యానికి బానిసైన తల్లి.. ఇలాంటి విభిన్నమైన పాత్రలన్నీ ఒక ప్రమాదకరమైన సీరియల్ కిల్లర్ను పట్టుకునే ప్రయత్నం చేస్తే ఎలా ఉంటుందనే ఆసక్తికరమైన ఆలోచనతో ఈ సినిమాను రూపొందించారు.
ప్రారంభంలో కథనం సాధారణ క్రైమ్ థ్రిల్లర్లాగే అనిపించినా.. హీరో పాత్రకు సంబంధించిన అసలు విషయం బయటపడిన తర్వాత సినిమా కొత్త మలుపు తీసుకుంటుంది. ముఖ్యంగా మాయ పాత్ర ఎంట్రీతో కథలో వినోదం పెరుగుతుంది. ప్రేమ్రాజ్, మాయ కలిసి చేసే ఇన్వెస్టిగేషన్ సన్నివేశాలు ఒకవైపు నవ్విస్తూనే మరోవైపు ఉత్కంఠను కలిగిస్తాయి.
వీరికి హీరో తల్లిదండ్రులు కూడా తోడవడంతో కామెడీ మరింత ఆసక్తికరంగా మారుతుంది. పాత్రల మధ్య వచ్చే సంభాషణలు, అనూహ్యమైన పరిణామాలు ప్రేక్షకులను ఆకట్టుకుంటాయి. ఇంటర్వెల్ సన్నివేశాలు ఉత్కంఠభరితంగా ఉండటంతో ద్వితీయార్థంపై ఆసక్తి పెరుగుతుంది.
రెండో భాగం కూడా మంచి యాక్షన్ సీక్వెన్స్తో ప్రారంభమవుతుంది. అయితే కొంత సమయం తర్వాత కథనం నెమ్మదిస్తుంది. సూర్య, నజ్రియా మధ్య వచ్చే ప్రేమ సన్నివేశాలు కొత్తగా అనిపించినప్పటికీ కొన్ని చోట్ల సాగదీసిన భావన కలుగుతుంది. హీరో గతం, అతడికి ఎదురైన సమస్యల వెనుక కారణాలను పూర్తిస్థాయిలో వివరించకపోవడం కొంత అసంతృప్తిని కలిగిస్తుంది.
మరోవైపు హీరో సీరియల్ కిల్లర్ను గుర్తించే విధానం, ఇద్దరి మధ్య జరిగే మైండ్ గేమ్ ఆసక్తికరంగా ఉంటాయి. ప్రీ క్లైమాక్స్ నుంచి కథ మళ్లీ వేగం పుంజుకుంటుంది. చివరి ఘట్టాలు వినోదంతో పాటు థ్రిల్ను అందిస్తాయి. ముఖ్యంగా క్లైమాక్స్ యాక్షన్ సీక్వెన్స్ బాగుంది. చివర్లో రెండో భాగానికి సంబంధించి ఆసక్తికరమైన హింట్ ఇచ్చి సినిమాను ముగించారు.
నటీనటుల పనితీరు ఎలా ఉందంటే?
సూర్య ఈ సినిమాలో తన స్టార్ ఇమేజ్ను పక్కనపెట్టి ప్రేమ్రాజ్ పాత్రలో పూర్తిగా ఒదిగిపోయారు. పాత్రకు తగ్గ లుక్, బాడీ లాంగ్వేజ్, కామెడీ టైమింగ్తో పాటు యాక్షన్ సన్నివేశాల్లోనూ ఆకట్టుకున్నారు. నజ్రియా తన సహజమైన నటన, చలాకీదనంతో అలరించింది. ముఖ్యంగా యాక్షన్ సన్నివేశాల్లోనూ మెప్పించింది.
సీరియల్ కిల్లర్ ఈశ్వరన్గా నస్లేన్ తన నటనతో ప్రత్యేక ఆకర్షణగా నిలిచాడు. హీరో తండ్రి పాత్రలో ఆనంద్ రాజ్ నవ్వులు పూయించారు. టోవినో థామస్ కనిపించేది కొద్దిసేపే అయినప్పటికీ తన పాత్రతో ఆసక్తి పెంచారు. కథలోని కీలక మలుపులకు ఆయన పాత్ర ప్రాధాన్యత సంతరించుకుంటుంది.
సాంకేతిక విభాగం
దర్శకుడు జీతూ మాధవన్ విభిన్నమైన పాత్రలను ఎంచుకుని వాటి చుట్టూ క్రైమ్ కామెడీ కథను నడిపించిన తీరు బాగుంది. ముఖ్యంగా పాత్రల నేపథ్యాలను ఉపయోగించుకుని వినోదాన్ని పండించడంలో సఫలమయ్యారు. డార్క్ కామెడీ ఈ సినిమాకు ప్రధాన బలంగా నిలుస్తుంది.
సుశిన్ శ్యామ్ అందించిన నేపథ్య సంగీతం సన్నివేశాలకు మంచి బలాన్నిచ్చింది. విజువల్స్ ఆకట్టుకుంటాయి. పాటలు లేకపోవడం కథనం వేగానికి ఉపయోగపడింది. నిర్మాణ విలువలు కూడా బాగున్నాయి.
బలాలు
- సూర్య, నజ్రియా, నస్లేన్ నటన
- విభిన్నమైన పాత్రల రూపకల్పన
- కామెడీ, క్రైమ్ ట్విస్టులు
- ఆసక్తికరమైన ఇంటర్వెల్, క్లైమాక్స్
- నేపథ్య సంగీతం
బలహీనతలు
- ద్వితీయార్థంలో నెమ్మదించే కథనం
- కొన్ని సన్నివేశాల్లో సాగదీత
- హీరో గతానికి సంబంధించిన ప్రశ్నలకు సరైన వివరణ లేకపోవడం
చివరిగా..
‘సీన్’.. నవ్విస్తూ ఉత్కంఠకు గురిచేసే క్రైమ్ కామెడీ యాక్షన్ థ్రిల్లర్. సూర్య నటన, నజ్రియా కామెడీ టైమింగ్, నస్లేన్ పాత్ర సినిమాకు ప్రధాన ఆకర్షణలు. అక్కడక్కడా కథనం నెమ్మదించినా.. క్లైమాక్స్ మాత్రం మెప్పిస్తుంది. వైవిధ్యమైన క్రైమ్ థ్రిల్లర్లను ఇష్టపడేవారు ఈ సినిమాను ఒకసారి చూడొచ్చు.
