తమిళనాడు ముఖ్యమంత్రి జోసెఫ్ విజయ్ రెండు రోజుల క్రితం అసెంబ్లీలో కీలక ప్రకటన చేశారు. రాష్ట్రంలోని మొత్తం 234 మంది ఎమ్మెల్యేలకు ప్రభుత్వం ఉచితంగా కార్లు అందించనున్నట్లు ప్రకటించారు. ఈ నిర్ణయం అధికార, ప్రతిపక్షాల మధ్య తీవ్ర వాగ్వాదానికి దారితీసింది.
తాజాగా అసెంబ్లీలో ఈ అంశంపై స్పందించిన ప్రధాన ప్రతిపక్ష నేత ఉదయనిధి స్టాలిన్.. తమ పార్టీకి చెందిన ఎమ్మెల్యేలు ఎవరూ ప్రభుత్వ ఉచిత కార్లను స్వీకరించకూడదని నిర్ణయించినట్లు తెలిపారు. రాష్ట్ర ఆర్థిక పరిస్థితి ప్రస్తుతం అంతంతమాత్రంగానే ఉన్న నేపథ్యంలో, ప్రజాధనాన్ని ఈ విధంగా ఖర్చు చేయడం సరికాదని భావించి ఈ ఆఫర్ను తిరస్కరించాలని తమ పార్టీ ఎమ్మెల్యేలు నిర్ణయించుకున్నట్లు ఆయన వెల్లడించారు.
తమిళనాడు ముఖ్యమంత్రి జోసెఫ్ విజయ్ ఎమ్మెల్యేలకు ఉచిత అధికారిక కార్లు అందించాలన్న ప్రతిపాదన రాష్ట్ర రాజకీయాల్లో తీవ్ర చర్చకు దారితీసింది. రాష్ట్రం ఆర్థిక ఇబ్బందుల్లో ఉన్న సమయంలో ఇలాంటి ప్రతిపాదన చేయడాన్ని ప్రతిపక్ష డీఎంకే తీవ్రంగా వ్యతిరేకించింది.
ఈ అంశంపై శుక్రవారం అసెంబ్లీలో అధికార, ప్రతిపక్ష సభ్యుల మధ్య వాడివేడి చర్చ జరిగింది. ఎమ్మెల్యేలకు ఉచిత కార్ల ప్రతిపాదనను డీఎంకేకు చెందిన 59 మంది ఎమ్మెల్యేలు తిరస్కరించాలని నిర్ణయించుకున్నట్లు ప్రతిపక్ష నేత ఉదయనిధి స్టాలిన్ ప్రకటించారు.
అధికారంలోకి వచ్చినప్పటి నుంచి రాష్ట్ర ఆర్థిక పరిస్థితి బలహీనంగా ఉందని ప్రభుత్వం పదేపదే చెబుతున్న నేపథ్యంలో, ప్రజాధనాన్ని వినియోగించి ఎమ్మెల్యేలకు ఉచిత వాహనాలు అందించాలనే నిర్ణయాన్ని ఆయన ప్రశ్నించారు. ఈ నేపథ్యంలో టీవీకే నేతృత్వంలోని ప్రభుత్వ ఆర్థిక విధానాలు, పాలనా స్థిరత్వంపై డీఎంకే విమర్శలు గుప్పించింది.
అధికారంలోకి వచ్చిన మొదటి రోజు నుంచే ప్రభుత్వం అప్పుల భారంలో ఉందని టీవీకే చెబుతున్న నేపథ్యంలో, డీఎంకేకు చెందిన 59 మంది ఎమ్మెల్యేలు ప్రభుత్వ ప్రతిపాదనను వినియోగించుకోకూడదని నిర్ణయించుకున్నట్లు ఉదయనిధి స్టాలిన్ తెలిపారు. ఎమ్మెల్యేల ఎన్నికల అఫిడవిట్లతో పాటు, వారికి ఇప్పటికే సొంత వాహనాలు ఉన్నాయా, వారి ఆర్థిక పరిస్థితి ఎలా ఉంది అనే అంశాలను పరిశీలించిన తర్వాతే ప్రభుత్వం ఉచిత కార్లను అందించాలని ఆయన సూచించారు.
టీవీకే సిద్ధాంతాలపై కూడా ఉదయనిధి విమర్శలు చేశారు. టీవీకే ఒకవైపు ఉచిత పథకాలను వ్యతిరేకిస్తూ, మరోవైపు ప్రభుత్వం అప్పుల్లో ఉందని చెబుతోందని ఆయన అన్నారు. ఈ నేపథ్యంలో ప్రభుత్వ రుణ భారాన్ని మరింత పెంచేలా ఉన్న ఈ ప్రతిపాదనను తాము అంగీకరించకూడదని నిర్ణయించుకున్నామని పేర్కొన్నారు.
అయితే, ఉదయనిధి వ్యాఖ్యలపై మంత్రి అధవ్ అర్జున తీవ్రంగా స్పందిస్తూ ప్రభుత్వ నిర్ణయాన్ని సమర్థించారు. ఎమ్మెల్యేలందరినీ సమానంగా చూడాలన్నదే ముఖ్యమంత్రి ఉద్దేశమని ఆయన తెలిపారు. ముఖ్యంగా వీసీకే, కమ్యూనిస్ట్ పార్టీలకు చెందిన పలువురు ఎమ్మెల్యేల ఆర్థిక పరిస్థితి అంతంతమాత్రంగానే ఉందని వివరించారు. తమ నియోజకవర్గాల్లోని అన్ని ప్రాంతాలను సందర్శించి ప్రజలకు అందుబాటులో ఉండేందుకు కార్లు వారికి అవసరమని, అవి విలాస వస్తువులు కాకుండా ప్రజాప్రతినిధుల ప్రాథమిక అవసరమని ఆయన స్పష్టం చేశారు.
