చెప్రాసి అయినా సరే సర్కార్ నౌకరి ఉండాలని పెద్దలు అంటుంటారు. అందుక్కారణం ఉద్యోగ భద్రత, టైంకి వచ్చే జీతం. నిజమే.. ఈ స్వీపర్ నెల జీతం గురించి తెలిస్తే అటెండర్ ఉద్యోగం అయినా ఓకే అంటారు. ఎందుకంటే కలెక్టర్ జీతం కంటే ఎక్కువగా నెలకు రూ. 2 లక్షలు జీతం వస్తుంది మరి. ఈ విషయాన్ని సాక్షాత్తూ తెలంగాణ సీఎస్ వెల్లడించారు.
తెలంగాణలో నెల జీతం రూ.2 లక్షలు. అవును మీరు విన్నది అక్షరాల నిజం. స్వీపర్ జీతం జిల్లా కలెక్టర్ జీతం కంటే ఎక్కువ. పదేళ్ల సర్వీస్ పూర్తి చేసుకున్న సీనియర్ ఐఏఎస్ల జీతం రూ.1.5 లక్షల వరకు ఉంటే.. సీనియర్ స్వీపర్ జీతం మాత్రం రూ.2 లక్షలకు దగ్గరగా ఉంది. ఈ విషయాన్ని ఎవరో కాదు సాక్షాత్తు ప్రభుత్వ ప్రధాన కార్యదర్శి సీఎస్ రామకృష్ణారావు వెల్లడించారు. తెలంగాణ విద్యుత్ శాఖలో పనిచేస్తోన్న సీనియర్ స్వీపర్ జీతం రూ.2లక్షల వరకూ ఉందని సీఎస్ తెలిపారు. ఇలా జీతం ఉండటానికి కారణం వరుస పీఆర్సీలేనని అన్నారు. తెలంగాణలో ప్రభుత్వ ఉద్యోగుల జీతాలు, పెన్షన్ల కోసం ప్రతి నెలా రూ.6 వేల కోట్లు కేటాయిస్తున్నట్లు బుధవారం (ఫిబ్రవరి 25) జరిగిన రివ్యూ మీటింగ్లో తెలిపారు. 2014లో ఇది కేవలం 1500 కోట్లుగా ఉండేదని ఇప్పుడు రూ.6 వేల కోట్లకు చేరిందన్నారు.
