80వ స్వాతంత్ర్య దినోత్సవం సందర్భంగా ఎర్రకోట నుంచి దేశ ప్రజలను ఉద్దేశించి ప్రధాని నరేంద్ర మోదీ ప్రసంగించారు. 2047 నాటికి భారత్‌ను అభివృద్ధి చెందిన దేశంగా తీర్చిదిద్దే ‘వికసిత్‌ భారత్‌@2047’ లక్ష్యాన్ని ఆయన మరోసారి స్పష్టం చేశారు.
భారత్‌ భవిష్యత్‌ అభివృద్ధికి యువశక్తి, స్వావలంబన, తయారీ రంగం, సాంకేతికత, మౌలిక వసతులు, రక్షణ, హరిత ఆర్థిక వ్యవస్థ కీలకమని ప్రధాని పేర్కొన్నారు. దేశ సమగ్ర అభివృద్ధి కోసం ‘శక్తి కీ సప్తధారా’ అనే ఏడు కీలక రంగాలపై దృష్టి పెట్టాలని వివరించారు.
యువతను భవిష్యత్‌ భారత నిర్మాణంలో ప్రధాన శక్తిగా నిలబెట్టేలా వచ్చే ఏడాదిలో కోటి మంది యువతకు AI శిక్షణ అందించే కార్యక్రమాన్ని ప్రకటించారు. అలాగే పోటీ పరీక్షలకు సిద్ధమయ్యే వారికి ఉచిత ఆన్‌లైన్‌ కోచింగ్‌ అందించే చర్యలను వెల్లడించారు.
సెమీకండక్టర్లు, అణుశక్తి, దేశీయ తయారీ, రక్షణ రంగంలో స్వావలంబన వంటి అంశాలకు ప్రాధాన్యత ఇస్తూ.. ప్రపంచ స్థాయిలో భారత్‌ మరింత బలమైన పాత్ర పోషించేలా ముందుకు సాగాలని ప్రధాని పిలుపునిచ్చారు.
