WhatsApp New Security Features Telugu: వాట్సాప్ యూజర్ల ఖాతాల భద్రతను మరింత బలోపేతం చేసేందుకు కొత్త ఫీచర్లను తీసుకొచ్చింది. ఇక ఒకటి కంటే ఎక్కువ పాస్కీలను యాడ్ చేసుకోవడంతో పాటు, సిక్స్ డిజిట్ పిన్కు బదులుగా బలమైన పాస్వర్డ్ను సెట్ చేసుకోవచ్చు. ఆండ్రాయిడ్ యూజర్లకు తెలియని నంబర్ల నుంచి వచ్చే కాల్స్పై అదనపు వివరాలు కూడా కనిపించనున్నాయి.
WhatsApp New Update Telugu: వాట్సాప్ వినియోగదారుల ఖాతాల భద్రతను మరింత బలోపేతం చేసేందుకు కొత్త సెక్యూరిటీ ఫీచర్లను తీసుకొచ్చింది. యూజర్లు తమ అకౌంట్లోకి సైన్ ఇన్ అయ్యే విధానంపై మరింత నియంత్రణ కల్పించడంతో పాటు, అనధికారిక యాక్సెస్ను అడ్డుకునేలా భద్రతా చర్యలను మెరుగుపరిచింది.
ఒకటి కంటే ఎక్కువ పాస్కీలకు అవకాశం
వాట్సాప్లో ఇప్పటికే పాస్కీ ఫీచర్ అందుబాటులో ఉంది. దీని ద్వారా వెరిఫికేషన్ కోడ్ నమోదు చేయకుండానే ఫింగర్ప్రింట్, ఫేస్ ఐడీ లేదా ఫోన్ స్క్రీన్ లాక్ ద్వారా అకౌంట్లోకి సైన్ ఇన్ కావచ్చు. ఇప్పటివరకు ఒక పాస్కీని ఉపయోగించే అవకాశం ఉండగా.. తాజాగా ఒకటి కంటే ఎక్కువ పాస్కీలను యాడ్ చేసుకునే సదుపాయాన్ని వాట్సాప్ అందిస్తోంది. ముఖ్యంగా ఆండ్రాయిడ్, ఐఓఎస్ వంటి రెండు వేర్వేరు డివైజ్లను ఉపయోగించే వారికి ఇది ఉపయోగకరంగా ఉంటుంది.
పాస్కీని సెటప్ చేసుకోవాలంటే Settings > Account > Passkeysలోకి వెళ్లాలి. ఇప్పటికే వాట్సాప్లో పాస్కీని ఒక బిలియన్కు పైగా మంది క్రియేట్ చేసుకున్నారని కంపెనీ తెలిపింది.
సిక్స్ డిజిట్ పిన్కు బదులుగా పూర్తి పాస్వర్డ్
టూ-స్టెప్ వెరిఫికేషన్ విషయంలోనూ వాట్సాప్ కీలక మార్పు చేసింది. ఇప్పటివరకు అదనపు భద్రత కోసం ఆరు అంకెల పిన్ను సెట్ చేసుకోవాల్సి ఉండేది. ఇకపై యూజర్లు పూర్తి పాస్వర్డ్ను కూడా ఉపయోగించుకోవచ్చు. ఇందులో అక్షరాలు, సంఖ్యలు, ప్రత్యేక గుర్తులను కలిపి పొడవైన పాస్వర్డ్ను రూపొందించుకోవచ్చు. దీంతో ఇతరులు సులభంగా ఊహించకుండా మరింత బలమైన భద్రతను కల్పించవచ్చు.
తెలియని నంబర్ల నుంచి కాల్స్ వస్తే మరిన్ని వివరాలు
తెలియని నంబర్ల నుంచి వచ్చే కాల్స్ విషయంలోనూ ఆండ్రాయిడ్ యూజర్లకు వాట్సాప్ అదనపు సమాచారాన్ని చూపించనుంది. కాంటాక్ట్స్లో సేవ్ చేయని వ్యక్తి కాల్ చేసినప్పుడు.. ఆ నంబర్ మరో దేశానికి చెందినదా, అలాగే ఆ వ్యక్తితో యూజర్కు ఏవైనా కామన్ వాట్సాప్ గ్రూపులు ఉన్నాయా వంటి వివరాలను చూపిస్తుంది. దీంతో కాల్ ఎత్తాలా? వద్దా? అనే నిర్ణయం తీసుకోవడం యూజర్లకు మరింత సులభం కానుంది.
మొత్తంగా ఈ కొత్త ఫీచర్ల ద్వారా వాట్సాప్ అకౌంట్ సెక్యూరిటీని మరింత బలోపేతం చేయడంతో పాటు, తెలియని వ్యక్తుల నుంచి వచ్చే కాల్స్పై యూజర్లకు మెరుగైన అవగాహన కల్పించనుంది.