ఇందిరమ్మ ఇళ్ల పథకానికి దరఖాస్తు ప్రక్రియను తెలంగాణ ప్రభుత్వం పూర్తిగా డిజిటల్ చేసింది. వాట్సాప్, మీ సేవ వెబ్సైట్, హెల్ప్డెస్క్ల ద్వారా సులభంగా దరఖాస్తు చేసుకునే అవకాశం కల్పించడంతో పాటు, అర్హతలు, చివరి తేదీ, హెల్ప్లైన్ నంబర్లను కూడా ప్రకటించింది. హైదరాబాద్ అర్బన్ అగ్లోమరేషన్ పరిధిలో దరఖాస్తులకు 2026 ఆగస్టు 10 వరకు గడువు ఉంది.
ఇందిరమ్మ ఇళ్ల పథకాన్ని అర్హులైన ప్రతి కుటుంబానికి చేరువ చేయాలనే లక్ష్యంతో తెలంగాణ ప్రభుత్వం సాంకేతికతను విస్తృతంగా వినియోగిస్తోంది.దరఖాస్తు ప్రక్రియను పూర్తిగా సరళీకృతం చేస్తూ, ప్రజలు ప్రభుత్వ కార్యాలయాల చుట్టూ తిరగకుండా మొబైల్ ఫోన్ ద్వారానే నమోదు చేసుకునేలా ఏర్పాట్లు చేసింది. అంతేకాదు, దరఖాస్తు విధానం నుంచి అర్హతలు, నిర్మాణ వివరాలు, సందేహాల నివృత్తి వరకు అన్ని అంశాలను సోషల్ మీడియా వేదికల ద్వారా ప్రజలకు చేరవేస్తోంది. గతంలో ప్రభుత్వ గృహ పథకాలకు దరఖాస్తు చేయాలంటే పలు ధ్రువీకరణ పత్రాలు, కార్యాలయాల సందర్శనలు తప్పనిసరిగా ఉండేవి. ప్రస్తుతం ఆ ఇబ్బందులను తగ్గిస్తూ, అర్హులు తమ మొబైల్ నుంచే దరఖాస్తు పూర్తి చేసుకునే సౌకర్యాన్ని ప్రభుత్వం కల్పించింది. స్మార్ట్ఫోన్ లేని వారి కోసం మీ సేవ కేంద్రాలు, కలెక్టరేట్లలో ప్రత్యేక హెల్ప్డెస్క్లు ఏర్పాటు చేశారు.
దరఖాస్తు చేసుకునే మార్గాలు
వాట్సాప్ ద్వారా 80969 58096 నంబర్కు అవసరమైన వివరాలు పంపించి దరఖాస్తు చేసుకోవచ్చు. meeseva.telangana.gov.in వెబ్సైట్ ద్వారా ఆన్లైన్లో నమోదు చేసుకునే అవకాశం ఉంది. దరఖాస్తు ప్రక్రియను దశలవారీగా వివరించే వీడియోలను అధికారిక సోషల్ మీడియా వేదికల్లో అందుబాటులో ఉంచారు. ఇల్లు నిర్మాణ విస్తీర్ణం, కార్పెట్ ఏరియా వంటి వివరాలను కూడా సోషల్ మీడియా ద్వారా ప్రజలకు తెలియజేస్తున్నారు. దరఖాస్తుదారుల సందేహాలను వెంటనే పరిష్కరించేందుకు ప్రభుత్వం ప్రత్యేక హెల్ప్లైన్లను అందుబాటులో ఉంచింది.
టోల్ ఫ్రీ నంబర్: 1800 599 5991, సాధారణ సమాచారం కోసం: 040-24603572 కాల్ చేయవచ్చు. ఫోన్ కాల్స్తో పాటు సోషల్ మీడియా ద్వారా వచ్చే ప్రశ్నలకు కూడా అధికారులు వీడియోల రూపంలో సమాధానాలు ఇస్తూ ప్రజల్లో అవగాహన పెంచుతున్నారు. ఇందిరమ్మ ఇళ్లు ఇప్పిస్తామని చెప్పి డబ్బులు వసూలు చేసే వ్యక్తులను నమ్మవద్దని ప్రభుత్వం హెచ్చరిస్తోంది. దరఖాస్తు ప్రక్రియ పూర్తిగా ప్రభుత్వ ఆధ్వర్యంలోనే జరుగుతుందని, ఎలాంటి మధ్యవర్తులకు డబ్బులు చెల్లించాల్సిన అవసరం లేదని స్పష్టం చేస్తోంది.
హైదరాబాద్ అర్బన్ అగ్లోమరేషన్ (HUA) పరిధిలో ఇందిరమ్మ ఇళ్ల కోసం దరఖాస్తులు సమర్పించేందుకు 2026 ఆగస్టు 10 చివరి తేదీగా నిర్ణయించారు. అర్హులైన వారు గడువు ముగిసేలోపు దరఖాస్తు చేసుకోవాలని అధికారులు సూచిస్తున్నారు. ఇందిరమ్మ ఇళ్లకు అర్హతలు విషయానికి వస్తే.. తెలంగాణ రాష్ట్రానికి శాశ్వత నివాసితులై ఉండాలి. సొంత పక్కా ఇల్లు లేని పేద లేదా ఆర్థికంగా వెనుకబడిన కుటుంబాలకు ప్రాధాన్యం ఉంటుంది. కుటుంబ సభ్యుల పేరుపై పక్కా ఇల్లు ఉండకూడదు. తెల్ల రేషన్ కార్డు కలిగి ఉండటం లేదా పేదరిక పరిస్థితిలో ఉండటం అవసరం. ప్రజాపాలన సర్వే లేదా స్థానిక ఇందిరమ్మ కమిటీ ద్వారా అర్హులుగా గుర్తింపు పొందిన వారికే ప్రాధాన్యం ఇవ్వబడుతుంది.
