Wipro Buy Olam: మార్కెట్లు కుదేలైనా విప్రో జోరు.. ₹3500 కోట్ల డీల్తో షేర్ ర్యాలీ
భారత స్టాక్ మార్కెట్లు వరుసగా ఒత్తిడిని ఎదుర్కొంటున్నాయి. గత వారం నుంచి ప్రారంభమైన పతనం ఈ వారం కూడా కొనసాగుతోంది. అంతర్జాతీయ ఉద్రిక్తతలు, క్రూడ్ ఆయిల్ ధరల పెరుగుదల కారణంగా ఇన్వెస్టర్లు జాగ్రత్తగా వ్యవహరిస్తున్నారు. అయితే ఈ పరిస్థితుల్లో కూడా ఐటీ స్టాక్స్ మాత్రం మెరుగైన ప్రదర్శనతో ఆకట్టుకుంటున్నాయి.
ఈ నేపథ్యంలో ఐటీ దిగ్గజం విప్రో షేర్ ప్రత్యేకంగా నిలిచింది. ఇంట్రాడే ట్రేడింగ్లో ఈ స్టాక్ 3 శాతానికి పైగా పెరిగి ఇన్వెస్టర్ల దృష్టిని ఆకర్షించింది. సింగపూర్కు చెందిన ఓలమ్ గ్రూప్ ఐటీ విభాగం మైండ్స్ప్రింట్ను కొనుగోలు చేయనున్నట్లు కంపెనీ ప్రకటించడంతో ఈ ర్యాలీకి బలమైన ఊతం లభించింది.
ఏప్రిల్ 6 ఉదయం 10 గంటల సమయానికి బీఎస్ఈ సెన్సెక్స్ సుమారు 350 పాయింట్ల నష్టంతో 72,960 స్థాయిలో ట్రేడ్ అవుతుండగా, ఎన్ఎస్ఈ నిఫ్టీ 95 పాయింట్లు పడిపోయి 22,610 వద్ద కొనసాగుతోంది. ఒక దశలో సెన్సెక్స్ 500 పాయింట్లకు పైగా పడిపోయినా, తర్వాత కొంత పుంజుకుంది.
మరోవైపు రిలయన్స్, ఎస్బీఐ, హెచ్డీఎఫ్సీ బ్యాంక్ వంటి హెవీ వెయిట్ స్టాక్స్ ఒత్తిడిలో ఉన్నప్పటికీ, ఐటీ రంగం మాత్రం గ్రీన్లో ట్రేడ్ అవుతోంది. టీసీఎస్, ఇన్ఫోసిస్, హెచ్సీఎల్ టెక్నాలజీస్, టెక్ మహీంద్రా వంటి కంపెనీల షేర్లు ఒక శాతానికి పైగా లాభాల్లో ఉన్నాయి.
విప్రో షేర్ గత సెషన్లో రూ. 194.91 వద్ద ముగిసింది. ఈ రోజు ట్రేడింగ్ను రూ. 197 వద్ద ప్రారంభించి, ఇంట్రాడేలో రూ. 201.18 వరకు చేరి 3 శాతానికి పైగా లాభాన్ని నమోదు చేసింది. ప్రస్తుతం ఇది సుమారు 2 శాతం లాభంతో ట్రేడ్ అవుతోంది. కంపెనీ మార్కెట్ క్యాప్ రూ. 2.07 లక్షల కోట్లుగా ఉంది. 52 వారాల గరిష్ఠం రూ. 273.10 కాగా, కనిష్ఠం రూ. 186.50గా నమోదైంది.
ఇటీవల ఐటీ స్టాక్స్పై అమ్మకాల ఒత్తిడి పెరగడంతో విప్రో షేర్ కూడా గణనీయంగా పడిపోయింది. అయితే తాజా అక్విజిషన్ ప్రకటనతో మళ్లీ పెట్టుబడిదారుల ఆసక్తి పెరిగింది.
విప్రో సంస్థ సింగపూర్ కేంద్రంగా పనిచేసే ఓలమ్ గ్రూప్కు చెందిన ఐటీ యూనిట్ ‘మైండ్స్ప్రింట్’ను సుమారు 375 మిలియన్ డాలర్లకు కొనుగోలు చేయనున్నట్లు ప్రకటించింది. భారత కరెన్సీలో దీని విలువ సుమారు ₹3500 కోట్లుగా ఉంటుంది. ఈ సంస్థకు భారత్, సింగపూర్లలో కలిపి దాదాపు 3200 మంది ఉద్యోగులు ఉన్నారు. ఈ డీల్ 2026 జూన్ నాటికి పూర్తి కావచ్చని అంచనా.
