కూర్చుని చేసే ఉద్యోగాలు, ఎక్కువసేపు శారీరక శ్రమ లేకుండా ఉండే జీవనశైలి ఆరోగ్యంపై ప్రభావం చూపొచ్చు. అయితే రోజువారీ రొటీన్‌లో ఒత్తిడి కలిగించని తేలికపాటి వర్కవుట్లు, నడక వంటి శారీరక కార్యకలాపాలను చేర్చుకోవడం ద్వారా ఆరోగ్య సమస్యల ముప్పును తగ్గించుకోవచ్చని నిపుణులు సూచిస్తున్నారు. ముఖ్యంగా ఎక్కువసేపు కూర్చునే వారు మధ్య మధ్యలో లేచి కదలడం, చిన్నపాటి వ్యాయామాలు చేయడం అలవాటు చేసుకోవడం మంచిదని చెబుతున్నారు.
ప్రస్తుతం చాలామంది ఉద్యోగరీత్యా గంటల తరబడి కూర్చునే జీవనశైలికి అలవాటు పడుతున్నారు. దీంతో రోజువారీ శారీరక శ్రమ తగ్గిపోవడంతో పాటు వ్యాయామానికి ప్రత్యేకంగా సమయం కేటాయించడం కూడా కష్టమవుతోంది. ఇలాంటి వారికి ‘జోన్ జీరో ఎక్సర్‌సైజ్‌’ ఒక సులభమైన మార్గంగా ఉపయోగపడుతుందని నిపుణులు చెబుతున్నారు. జిమ్‌లో కఠినమైన వర్కవుట్లు చేయాల్సిన అవసరం లేకుండా, శరీరంపై అధిక ఒత్తిడి పడకుండా తక్కువ తీవ్రతతో చేసే చిన్నచిన్న కదలికలే వీటిలో ప్రధానంగా ఉంటాయి.
అసలేంటీ జోన్ జీరో?
జోన్ జీరో ఎక్సర్‌సైజ్‌ అంటే చాలా తక్కువ తీవ్రతతో చేసే శారీరక కదలికలు. వీటిలో అధికంగా ఆయాసపడాల్సిన అవసరం ఉండదు. నెమ్మదిగా నడవడం, భోజనం తర్వాత కాసేపు వాకింగ్ చేయడం, ఎక్కువసేపు కూర్చోకుండా మధ్య మధ్యలో లేచి తిరగడం, తేలికపాటి స్ట్రెచింగ్, ట్విస్టింగ్ వంటి కదలికలను రోజువారీ జీవితంలో భాగం చేసుకోవచ్చు. ముఖ్యంగా ఎక్కువసేపు కూర్చునే ఉద్యోగాలు చేసేవారికి ఇవి శారీరక చురుకుదనాన్ని పెంచడంలో ఉపయోగపడతాయి.
వృద్ధులు, వ్యాయామానికి కొత్తగా ప్రారంభించేవారు, కీళ్లపై అధిక ఒత్తిడి పడకూడదనుకునేవారు లేదా ఎక్కువసేపు కూర్చునే జీవనశైలి ఉన్నవారు తమ సామర్థ్యానికి అనుగుణంగా ఇలాంటి తేలికపాటి కదలికలను ఎంచుకోవచ్చు.
ఎలాంటి ప్రయోజనాలు ఉండొచ్చు?
జోన్ జీరో తరహా తక్కువ తీవ్రత కలిగిన కదలికలను రోజువారీ జీవితంలో క్రమం తప్పకుండా చేయడం వల్ల శారీరక చురుకుదనం పెరగడంతో పాటు కొన్ని ఆరోగ్య ప్రయోజనాలు పొందే అవకాశం ఉంటుంది.
- రోజులో ఎక్కువసేపు కూర్చోకుండా తరచూ కదలడం వల్ల మొత్తం శారీరక చలనం పెరుగుతుంది.
- భోజనం తర్వాత కొద్దిసేపు నడవడం రక్తంలో గ్లూకోజ్‌ పెరుగుదలను నియంత్రించడంలో సహాయపడవచ్చని అధ్యయనాలు సూచిస్తున్నాయి.
- తేలికపాటి నడక, స్ట్రెచింగ్ వంటి కార్యకలాపాలు కండరాలు, కీళ్లను కదిలిస్తూ శరీరాన్ని చురుగ్గా ఉంచడంలో సహాయపడతాయి.
- రోజులో చిన్న విరామాలు తీసుకుని కదలడం వల్ల ఎక్కువసేపు ఒకే భంగిమలో కూర్చోవడం వల్ల కలిగే అసౌకర్యాన్ని తగ్గించుకోవచ్చు.
- తేలికపాటి శారీరక కార్యకలాపాలు ఒత్తిడిని తగ్గించుకోవడానికి, మానసికంగా రిలాక్స్‌ అవ్వడానికి కూడా ఉపయోగపడవచ్చు.
- రోజువారీ శారీరక శ్రమ పెరగడం వల్ల మొత్తం క్యాలరీ వినియోగం పెరుగుతుంది. అయితే బరువు తగ్గడానికి ఆహారం, నిద్ర, ఇతర వ్యాయామాలు కూడా కీలకమే.
ఎలా ప్రారంభించాలి?
జోన్ జీరో తరహా కదలికలకు ప్రత్యేకంగా ఎక్కువ సమయం కేటాయించాల్సిన అవసరం లేకుండా రోజువారీ పనుల్లోనే వాటిని భాగం చేసుకోవచ్చు. టీ లేదా కాఫీ బ్రేక్ సమయంలో కొద్దిసేపు నడవడం, లిఫ్ట్‌కు బదులుగా వీలైనప్పుడు మెట్లు ఉపయోగించడం, దగ్గర్లోని ప్రదేశాలకు నడుచుకుంటూ వెళ్లడం, ఎక్కువసేపు కూర్చున్నప్పుడు మధ్య మధ్యలో లేచి కాసేపు నడవడం, తేలికపాటి స్ట్రెచింగ్ చేయడం వంటి అలవాట్లతో ప్రారంభించవచ్చు.
అయితే తక్కువ తీవ్రతతో చేసే ఈ కదలికలు ప్రతి ఒక్కరి ఫిట్‌నెస్ అవసరాలను పూర్తిగా భర్తీ చేయవు. ప్రత్యేక ఫిట్‌నెస్ లక్ష్యాలు ఉన్నవారు లేదా ఆరోగ్య సమస్యలు ఉన్నవారు తమ పరిస్థితికి అనుగుణంగా నడక, కార్డియో, స్ట్రెంత్ ట్రైనింగ్ వంటి వ్యాయామాలను నిపుణుల సలహాతో ఎంచుకోవడం మంచిది.