అరటిపండు ఎప్పుడు తింటే ఎక్కువ ప్రయోజనం?
ఏ కాలంలోనైనా సులభంగా, తక్కువ ధరకే లభించే పండ్లలో అరటిపండుకు ప్రత్యేక స్థానం ఉంది. తక్షణ శక్తిని అందించే ఈ పండును చాలామంది ఇష్టంగా తింటుంటారు. అయితే అరటిపండును రోజులో ఏ సమయంలో తీసుకుంటే మంచిది? ఉదయం తినడం ప్రయోజనకరమా, మధ్యాహ్నం తీసుకోవడం మంచిదా, లేక రాత్రివేళ తింటే ఏమైనా ఇబ్బందులు కలుగుతాయా? దీనిపై ప్రముఖ డైటీషియన్ డాక్టర్ దీప్తి ఖటూజా పలు ఆసక్తికర విషయాలను వెల్లడించారు.
ఉదయం అరటిపండు తింటే..
రోజంతా ఉత్సాహంగా, చురుగ్గా ఉండాలనుకునేవారు ఉదయం వేళ అరటిపండును తీసుకోవచ్చు. ఉదయం శరీరానికి శక్తి అవసరమైన సమయంలో అరటిపండులోని సహజ చక్కెరలు, కార్బోహైడ్రేట్లు త్వరగా శక్తిని అందించడంలో సహాయపడతాయి. అల్పాహారంతో పాటు అరటిపండును తీసుకోవడం వల్ల కొంతసేపు శక్తి స్థాయిలు నిలకడగా ఉండటానికి, నీరసం తగ్గడానికి ఉపయోగపడవచ్చు.
మధ్యాహ్న సమయంలో శరీర జీవక్రియ చురుగ్గా పనిచేస్తుంది. ఈ సమయంలో లేదా లంచ్ తర్వాత స్నాక్గా అరటిపండును తీసుకోవచ్చు. ఇది పని వేళల్లో వచ్చే బద్ధకాన్ని తగ్గించడంతో పాటు, కడుపు నిండిన భావనను కలిగిస్తుంది. దీంతో అనవసరంగా జంక్ ఫుడ్ తినాలనే కోరికను కూడా కొంతవరకు నియంత్రించుకోవచ్చు.
రాత్రి వేళ అరటిపండు తినడంపై చాలామందిలో కొన్ని అపోహలు ఉన్నాయి. డాక్టర్ దీప్తి సూచనల ప్రకారం, జలుబు, దగ్గు లేదా కఫం వంటి సమస్యలు ఉన్నవారు రాత్రిపూట అరటిపండును తీసుకోకపోవడం మంచిది. రాత్రి సమయంలో జీర్ణవ్యవస్థ పనితీరు కొంత నెమ్మదించడంతో ఆహారం జీర్ణం కావడానికి ఎక్కువ సమయం పట్టవచ్చు. అయితే పూర్తిగా ఆరోగ్యంగా ఉన్నవారు సాయంత్రం లేదా రాత్రి ప్రారంభంలో అరటిపండును తీసుకోవచ్చు. కానీ నిద్రకు వెళ్లే ముందు మాత్రం తినకుండా ఉండటం మంచిది.
ఆరోగ్య పరంగా చూస్తే, అలసట, నీరసం లేదా బలహీనతగా అనిపించినప్పుడు అరటిపండు తక్షణ శక్తిని అందించడంలో సహాయపడుతుంది. ఇందులో ఉండే పీచు పదార్థం జీర్ణక్రియను మెరుగుపరచి మలబద్ధకం సమస్యను తగ్గించడంలో తోడ్పడుతుంది. అంతేకాకుండా, అరటిపండులోని పొటాషియం గుండె ఆరోగ్యానికి మేలు చేయడంతో పాటు రక్తపోటును నియంత్రించడంలో కూడా సహాయపడుతుంది.
అరటిపండు శారీరక ఆరోగ్యానికే కాకుండా మానసిక ప్రశాంతతకు కూడా ఉపయోగకరంగా ఉంటుంది. ఇందులోని కొన్ని పోషకాలు మెదడు పనితీరుకు తోడ్పడి, మూడ్ను మెరుగుపరచడంలో సహాయపడతాయి. అలాగే ఒత్తిడిని తగ్గించి ఉల్లాసంగా ఉండేందుకు దోహదం చేస్తాయి. రోజులో సరైన సమయంలో అరటిపండును పరిమితంగా ఆహారంలో చేర్చుకోవడం ద్వారా దాని పోషక ప్రయోజనాలను పొందవచ్చు.
