హైదరాబాద్‌లోని ఉస్మానియా యూనివర్సిటీ క్యాంపస్‌లో గంజాయి మొక్క కనిపించడం కలకలం రేపింది. ఈ మొక్క సహజంగానే మొలిచిందా? లేక ఎవరైనా ఉద్దేశపూర్వకంగా నాటారా? అనే సందేహాలు వ్యక్తమవుతున్నాయి. ఘటనపై పూర్తి స్థాయిలో విచారణ చేపట్టాలని విద్యార్థి నాయకులు డిమాండ్ చేస్తున్నారు. క్యాంపస్‌లోని ఇతర ప్రాంతాల్లోనూ తనిఖీలు నిర్వహించి, మొక్క అక్కడికి ఎలా వచ్చిందనే విషయంతో పాటు దీని వెనుక ఉన్న కారణాలను వెలుగులోకి తీసుకురావాలని కోరుతున్నారు. ఈ ఘటనతో విద్యార్థుల భద్రత, క్యాంపస్‌లోని పరిస్థితులపై చర్చ మొదలైంది.
హైదరాబాద్‌లోని ఉస్మానియా యూనివర్సిటీ క్యాంపస్‌లో గంజాయి మొక్క కనిపించడం చర్చనీయాంశంగా మారింది. విద్యార్థులు, అధ్యాపకులు, సిబ్బంది రాకపోకలు ఉండే ప్రాంగణంలో ఈ మొక్క ఎలా పెరిగిందనే దానిపై పలు అనుమానాలు వ్యక్తమవుతున్నాయి. ఇది సహజంగా మొలిచిందా? లేక ఎవరైనా ఉద్దేశపూర్వకంగా నాటారా? అనే ప్రశ్నలు తలెత్తుతున్నాయి.
క్యాంపస్‌లోని ఓ ప్రాంతంలో విద్యార్థులు గంజాయి మొక్కను గుర్తించారు. దీంతో యూనివర్సిటీ ప్రాంగణంలోని ఇతర ప్రాంతాల్లోనూ ఇలాంటి మొక్కలు ఉన్నాయా? అనే చర్చ మొదలైంది. గంజాయి విత్తనం అనుకోకుండా అక్కడ పడటం వల్ల మొక్క మొలిచి ఉండొచ్చా? లేదా ఎవరైనా ఉద్దేశపూర్వకంగా విత్తనాలను అక్కడ పడేశారా? అనే సందేహాలు వ్యక్తమవుతున్నాయి. అయితే అసలు మొక్క అక్కడికి ఎలా వచ్చిందనే విషయం అధికారుల దర్యాప్తులోనే స్పష్టమయ్యే అవకాశం ఉంది.
ఈ ఘటన నేపథ్యంలో క్యాంపస్‌లో పూర్తిస్థాయిలో తనిఖీలు నిర్వహించాలని విద్యార్థి నాయకుడు సైదులు యాదవ్ డిమాండ్ చేశారు. కేవలం గుర్తించిన మొక్కను తొలగించడంతో సరిపెట్టకుండా యూనివర్సిటీ పరిధిలోని ఇతర ప్రాంతాలను కూడా పరిశీలించాలని కోరారు.
అదే సమయంలో మొక్క అక్కడికి ఎలా వచ్చిందనే అంశంపై యూనివర్సిటీ అధికారులు, పోలీసులు దర్యాప్తు చేయాల్సిన అవసరం ఉందని పేర్కొన్నారు. మొక్కను శాస్త్రీయంగా పరిశీలించి, దాని మూలం, అక్కడ పెరిగిన పరిస్థితులపై స్పష్టత తీసుకురావాల్సి ఉంది. ఈ ఘటనపై అధికారులు ఎలాంటి చర్యలు తీసుకుంటారనేది ప్రస్తుతం ఆసక్తికరంగా మారింది.