దీపావళి పండుగను కుటుంబ సభ్యులు బంధువుల మధ్య సొంతూళ్లలో జరుపుకునేందుకు నగరవాసులు పెద్ద ఎత్తున పయనమయ్యారు. గురువారం ఒక్కరోజే సుమారు రెండు లక్షల మంది చెన్నై నగరం నుంచి తమ స్వస్థలాలకు తరలివెళ్లారు. దీంతో ప్రభుత్వ, ప్రైవేటు బస్సులు, రైళ్లు, విమానాలు ప్రయాణికులతో కిక్కిరిసిపోయాయి.

పండుగ రద్దీని దృష్టిలో పెట్టుకుని విమానయాన సంస్థలు టికెట్ ధరలను భారీగా పెంచడంతో ప్రయాణికులపై అదనపు భారం పడింది. సాధారణ ధరలతో పోలిస్తే విమాన చార్జీలు ఏకంగా నాలుగు రెట్లు పెరిగినట్లు తెలుస్తోంది. మరోవైపు ప్రయాణికుల రద్దీని నియంత్రించేందుకు తమిళనాడు రాష్ట్ర రవాణా సంస్థ ప్రత్యేక ఏర్పాట్లు చేసింది. దీపావళి కోసం సాధారణ సర్వీసులతో పాటు అదనపు బస్సులను అందుబాటులోకి తీసుకొచ్చింది.

చెన్నై నుంచి వివిధ జిల్లాలకు సాధారణ రోజుల్లో నడిపే 2,191 బస్సులకు అదనంగా 2,870 ప్రత్యేక బస్సులను నడపాలని ప్రణాళిక రూపొందించింది. ఇందులో భాగంగా గురువారం 2,191 రెగ్యులర్ బస్సులతో పాటు 1,018 ప్రత్యేక బస్సులను కలిపి మొత్తం 3,209 బస్సులను నడిపారు. వీటి ద్వారా ఒక్కరోజే సుమారు 1.40 లక్షల మంది ప్రయాణికులు తమ స్వస్థలాలకు చేరుకున్నారు.

ఇదిలా ఉండగా విమాన టికెట్ ధరలు నాలుగు రెట్లు పెరగడంతో ప్రయాణికులు తీవ్ర అసంతృప్తి వ్యక్తం చేశారు. మరోవైపు ప్రయాణికులకు ఎలాంటి ఇబ్బందులు కలగకుండా రవాణా శాఖ మంత్రి విజయ్ తమిళన్ పార్థిబన్ కీలాంబాక్కం బస్టాండ్‌లో స్వయంగా ఏర్పాట్లను పర్యవేక్షించారు. మరైమలై నగర్ నుంచి కూడా ప్రత్యేక బస్సులను అందుబాటులోకి తీసుకొచ్చారు.

ముఖ్యంగా రవాణా సౌకర్యాలు తక్కువగా ఉన్న గ్రామీణ ప్రాంతాల ప్రజలకు ఇబ్బందులు కలగకుండా ఆయా గ్రామాలకు సమీప ప్రాంతాల వరకు బస్సులు వెళ్లేలా తొమ్మిది ప్రత్యేక సర్వీసులను ఏర్పాటు చేశారు. దీంతో దీపావళి పండుగ కోసం సొంతూళ్లకు వెళ్లే ప్రయాణికులకు అదనపు రవాణా సౌకర్యం కల్పించారు.

By Rajini