ఆర్నబ్ తుఫాన్ కారణంగా పంటలు, ఇళ్లు, ఆస్తులు నష్టపోయిన ప్రతి ఒక్కరికీ న్యాయం చేస్తామని ఆంధ్రప్రదేశ్ ముఖ్యమంత్రి చంద్రబాబు నాయుడు స్పష్టం చేశారు. బుధవారం రాష్ట్ర సచివాలయంలోని రియల్ టైమ్ గవర్నెన్స్ సెంటర్‌ (RTGS) నుంచి మీడియాతో మాట్లాడిన ఆయన తుఫాన్ ప్రభావం, ప్రభుత్వం చేపట్టిన ముందస్తు చర్యలు, సహాయక కార్యక్రమాలపై వివరాలు వెల్లడించారు.
తుఫాన్ ఏర్పడిన మూడు రోజుల్లోనే ఏడు సమీక్షలు నిర్వహించి, పరిస్థితులకు అనుగుణంగా ముందస్తు చర్యలు చేపట్టామని సీఎం తెలిపారు. ఆర్టీజీఎస్‌ ద్వారా జిల్లా కలెక్టర్లు, క్షేత్రస్థాయి అధికారులకు ఎప్పటికప్పుడు సమాచారం అందిస్తూ నష్ట తీవ్రతను తగ్గించేందుకు చర్యలు తీసుకున్నామని చెప్పారు. ప్రాణ, ఆస్తి నష్టాన్ని సాధ్యమైనంత వరకు తగ్గించడమే లక్ష్యంగా ప్రభుత్వ యంత్రాంగం పనిచేసిందని పేర్కొన్నారు.
ప్రజలకు ప్రభుత్వం అండగా ఉందనే భరోసా కల్పించేలా ప్రభుత్వ ప్రధాన కార్యదర్శి నుంచి స్వర్ణ గ్రామ, స్వర్ణ వార్డు కార్యాలయాల వరకు అధికారులు, సిబ్బంది రాత్రింబవళ్లు పనిచేశారని చంద్రబాబు వెల్లడించారు. లోతట్టు ప్రాంతాల ప్రజలను ముందుగానే సురక్షిత ప్రాంతాల్లోని పునరావాస కేంద్రాలకు తరలించి, వారికి ఎలాంటి ఇబ్బందులు కలగకుండా చర్యలు తీసుకున్నామని తెలిపారు. తుఫాన్ కారణంగా పంటలు, ఇళ్లు, ఆస్తులు కోల్పోయిన బాధితులు తిరిగి కోలుకునేలా ప్రభుత్వం అండగా నిలుస్తుందని హామీ ఇచ్చారు.
గత మూడు రోజులుగా నిరంతరం శ్రమించిన అధికారులను, క్షేత్రస్థాయి సిబ్బందిని సీఎం అభినందించారు. గతంలో హుద్‌హుద్‌, తిత్లీ తుఫాన్ల సమయంలో ఎదురైన అనుభవాల నుంచి పాఠాలు నేర్చుకుంటూ విపత్తులను ఎదుర్కొంటున్నామని చెప్పారు. గతంలో ప్రస్తుత స్థాయిలో సాంకేతిక పరిజ్ఞానం అందుబాటులో లేకపోయినా, యుద్ధ ప్రాతిపదికన చర్యలు చేపట్టి సాధారణ పరిస్థితులు పునరుద్ధరించేందుకు కృషి చేశామని గుర్తుచేశారు.
తుఫాన్ కారణంగా పలువురు మృతి
ఆర్నబ్ తుఫాన్ ప్రభావంతో విశాఖపట్నంలో విద్యుత్‌ స్తంభం, చెట్టు కూలిన ఘటనల్లో ఇద్దరు, అనకాపల్లిలో ఒకరు, భీమవరంలో మరొకరు మృతి చెందినట్లు చంద్రబాబు తెలిపారు. మృతుల కుటుంబాలకు ప్రగాఢ సానుభూతి తెలియజేశారు. తుఫాన్ తీవ్రత కారణంగా వారి ప్రాణాలను కాపాడలేకపోయామని విచారం వ్యక్తం చేశారు.
రియల్ టైమ్ గవర్నెన్స్ సెంటర్‌ నుంచి తుఫాన్ కదలికలను నిరంతరం పర్యవేక్షించామని సీఎం వివరించారు. సాంకేతిక పరిజ్ఞానాన్ని వినియోగించి తుఫాన్ తీవ్రత ఎక్కువగా ఉండే ప్రాంతాలను ముందుగానే అంచనా వేశామని తెలిపారు. భారత వాతావరణ శాఖ (IMD) సమాచారంతో పాటు ఉపగ్రహ చిత్రాలను ఎప్పటికప్పుడు విశ్లేషిస్తూ సహాయక చర్యలను సమన్వయం చేశామని పేర్కొన్నారు.