
సాయుధ దళాల్లో ఖాళీలను భర్తీ చేయడంతో పాటు యువతకు సైన్యంలో పనిచేసే అవకాశం కల్పించే లక్ష్యంతో కేంద్ర ప్రభుత్వం నాలుగేళ్ల క్రితం అగ్నిపథ్ పథకాన్ని ప్రవేశపెట్టింది. ఈ పథకం కింద ఎంపికైన అగ్నివీరులు నాలుగేళ్ల పాటు సైన్యంలో సేవలందిస్తారు. వారి పనితీరు, ప్రతిభ ఆధారంగా 25 శాతం మందికి శాశ్వత సర్వీసులో కొనసాగే అవకాశం కల్పిస్తారు.
కాగా, తొలి బ్యాచ్ అగ్నివీరుల నాలుగేళ్ల సర్వీసు గడువు డిసెంబరు 31తో ముగియనున్న నేపథ్యంలో కేంద్ర ప్రభుత్వం కీలక నిర్ణయం తీసుకుంది. ఇటీవల జరిగిన కేంద్ర క్యాబినెట్ సమావేశంలో అగ్నిపథ్ పథకాన్ని మరో రెండేళ్ల పాటు పొడిగించాలని నిర్ణయించింది. కేంద్రం తీసుకున్న ఈ నిర్ణయంపై చీఫ్ ఆఫ్ డిఫెన్స్ స్టాఫ్ (CDS) హర్షం వ్యక్తం చేశారు.
అగ్నిపథ్ పథకానికి సంబంధించి కేంద్ర ప్రభుత్వం కీలక నిర్ణయం తీసుకుంది. బుధవారం నిర్వహించిన కేంద్ర క్యాబినెట్ సమావేశంలో నాలుగేళ్ల సర్వీసు పూర్తిచేసుకున్న అగ్నివీరుల్లో 75 శాతం మందికి మరో రెండేళ్లపాటు సేవలందించే అవకాశం కల్పించే ప్రతిపాదనకు ఆమోదం తెలిపినట్లు సమాచారం. పొడిగించిన గడువు పూర్తయిన తర్వాత కూడా సాయుధ దళాల్లో కొనసాగాలని ఆసక్తి చూపే అగ్నివీరులకు శాశ్వత ఉద్యోగులుగా చేరేందుకు మరో అవకాశం కల్పించనున్నట్లు ప్రభుత్వం వెల్లడించింది.
యువతను సాయుధ దళాల్లోకి ఆకర్షించడంతో పాటు సైన్యంలో నియామకాలను ప్రోత్సహించే లక్ష్యంతో కేంద్ర ప్రభుత్వం 2022లో అగ్నిపథ్ పథకాన్ని ప్రారంభించింది. ఈ పథకం ద్వారా ఎంపికైన వారిని అగ్నివీరులుగా పిలుస్తారు. వీరు నాలుగేళ్లపాటు సైన్యంలో సేవలందిస్తారు.
తొలి బ్యాచ్కు కీలక నిర్ణయం
దాదాపు 18 వేల మంది సభ్యులతో కూడిన తొలి బ్యాచ్ అగ్నివీరులు తమ నాలుగేళ్ల సర్వీసు గడువును పూర్తి చేసుకుని విధుల నుంచి వైదొలగడానికి కొన్ని వారాల సమయం మాత్రమే ఉన్న నేపథ్యంలో కేంద్రం ఈ నిర్ణయం తీసుకోవడం ప్రాధాన్యత సంతరించుకుంది. 2022-23లో సైన్యంలో చేరిన వారి ప్రస్తుత సర్వీసు గడువు డిసెంబరు 31తో ముగియనుంది.
ఈ నిర్ణయంపై చీఫ్ ఆఫ్ డిఫెన్స్ స్టాఫ్ (CDS) జనరల్ ఎన్.ఎస్. రాజా సుబ్రహ్మణి స్పందిస్తూ, అగ్నివీరులకు సాయుధ దళాల్లో కొనసాగేందుకు అవకాశం కల్పించే అంశాన్ని ప్రస్తావించారు. అయితే ఈ అవకాశం వారి పనితీరు, మూల్యాంకన ఫలితాల ఆధారంగానే ఉంటుందని స్పష్టం చేశారు.
అగ్నిపథ్ పథకాన్ని భవిష్యత్తులో సమీక్షిస్తామని గతంలోనే స్పష్టం చేశామని జనరల్ సుబ్రహ్మణి తెలిపారు. ప్రతి ఏడాది అగ్నివీరుల పనితీరును పరిశీలించిన అనంతరం, వారికి మరో రెండేళ్లపాటు సేవా కాలాన్ని పొడిగించాలని నిర్ణయించినట్లు వెల్లడించారు. అగ్నిపథ్ పథకంలోని నిబంధనలు శాశ్వతమైనవి కావని, అవసరాలకు అనుగుణంగా మార్పులు చేసే అవకాశం ఉందని వివరించారు.
ఈ సమీక్ష ప్రక్రియ ఒక్కరోజులో తీసుకున్న నిర్ణయం కాదని, గత మూడు నాలుగు నెలలుగా నిరంతరంగా చర్చలు, పరిశీలనలు జరిగాయని ఆయన పేర్కొన్నారు. సాయుధ దళాలు సమర్పించిన సిఫార్సులకు తాజాగా కేంద్ర క్యాబినెట్ ఆమోదం తెలిపిందని వెల్లడించారు. అయితే అగ్నిపథ్ పథకాన్ని రద్దు చేయడం లేదని, ప్రస్తుతం అమల్లో ఉన్న నాలుగేళ్ల సర్వీసు విధానంలో ఎలాంటి మార్పు ఉండదని జనరల్ సుబ్రహ్మణి స్పష్టం చేశారు.
అగ్నివీరులకు మరిన్ని అవకాశాలు
అగ్నిపథ్ పథకం యథాతథంగా కొనసాగుతుందని జనరల్ సుబ్రహ్మణి వివరించారు. తొలి నాలుగేళ్ల సర్వీసు అనంతరం శాశ్వత సైనికులుగా ఎంపిక కాని అగ్నివీరులకు అదనంగా రెండేళ్లపాటు సైన్యంలో పనిచేసే అవకాశం కల్పించడం ద్వారా వారి సేవా కాలం పొడిగించినట్లవుతుందని తెలిపారు.
మొదటి దశలో శాశ్వత సర్వీసుకు ఎంపిక కాకపోవడం వారి ప్రతిభలో లోపం ఉన్నట్లు కాదని, తీవ్ర పోటీ కారణంగానే కొందరికి అవకాశం దక్కలేదని పేర్కొన్నారు. అదనంగా లభించే రెండేళ్ల కాలంలో తమ ప్రతిభను నిరూపించుకోవడంతో పాటు, రెగ్యులర్ సైనికులుగా ఎంపికయ్యేందుకు మరో అవకాశం పొందుతారని వివరించారు. ఈ నిర్ణయం అగ్నివీరులతో పాటు సాయుధ దళాలకు కూడా ప్రయోజనకరంగా ఉంటుందని ఆయన అభిప్రాయపడ్డారు.
