
ఎన్నికల్లో విజయం సాధించాలంటే అభ్యర్థులు సాధారణంగా ఇంటింటికీ తిరిగి ప్రచారం చేస్తూ ఓటర్లను కలుస్తారు. కానీ ప్రకాశం జిల్లా ఒంగోలులో ఓ టీడీపీ అభ్యర్థి మాత్రం ఒక్కరోజు కూడా ప్రచారంలో పాల్గొనకుండానే భారీ మెజారిటీతో విజయం సాధించారు. రోడ్డు ప్రమాదంలో కాలికి గాయమై మంచానికే పరిమితమైనప్పటికీ ఓటర్లు ఆయనకు ఘన విజయాన్ని అందించారు. ఒంగోలు కార్పొరేషన్ 9వ డివిజన్ నుంచి పోటీ చేసిన దాచర్ల వెంకట రమణయ్య 2,728 ఓట్ల మెజారిటీతో గెలుపొందారు.
రోడ్డు ప్రమాదంతో నిలిచిన ఎన్నికల ప్రచారం
ఎన్నికల నోటిఫికేషన్ విడుదల కావడానికి ముందే వెంకట రమణయ్య రోడ్డు ప్రమాదానికి గురయ్యారు. ఈ ఘటనలో ఆయన కాలికి గాయమైంది. వైద్యులు చికిత్స అందించి, రెండు వారాల పాటు బయటకు వెళ్లవద్దని సూచించారు. ఇదే సమయంలో ఒంగోలు కార్పొరేషన్ ఎన్నికల ప్రక్రియ ప్రారంభం కావడంతో టీడీపీ ఆయనకు 9వ డివిజన్ నుంచి పోటీ చేసే అవకాశం కల్పించింది.
కాలికి గాయంతో నడవలేని పరిస్థితి ఉన్నప్పటికీ రమణయ్య నామినేషన్ దాఖలు చేయాలని నిర్ణయించుకున్నారు. దీంతో స్థానిక టీడీపీ నాయకులు, కార్యకర్తలు ఆయనను మోసుకుంటూ తీసుకెళ్లి నామినేషన్ వేయించారు. అయితే ఆరోగ్య పరిస్థితి కారణంగా ఎన్నికల ప్రచారానికి మాత్రం ఆయన పూర్తిగా దూరంగా ఉండాల్సి వచ్చింది.
ఫోన్లోనే ఓటర్లకు విజ్ఞప్తి
రమణయ్య ప్రచార బాధ్యతలను కుటుంబ సభ్యులు, బంధువులు, టీడీపీ కార్యకర్తలు చేపట్టారు. డివిజన్లో ఇంటింటికీ తిరుగుతూ ఆయన తరఫున ఓట్లు అభ్యర్థించారు. మంచానికే పరిమితమైన రమణయ్య సైతం ఫోన్ ద్వారా ఓటర్లను సంప్రదించి తనకు మద్దతు ఇవ్వాలని కోరారు.
ప్రత్యక్షంగా ప్రచారంలో పాల్గొనకపోయినా ఓటర్లు ఆయనకు అండగా నిలిచారు. ఓట్ల లెక్కింపు పూర్తయ్యేసరికి 2,728 ఓట్ల భారీ మెజారిటీతో రమణయ్య విజయం సాధించారు. దీంతో ఆయన గెలుపు స్థానికంగా ప్రత్యేక చర్చకు దారితీసింది.
ఒంగోలు సమీపంలోని రైజ్ ఇంజినీరింగ్ కాలేజీలో ఏర్పాటు చేసిన కౌంటింగ్ కేంద్రానికి బంధువులు, స్నేహితుల సహాయంతో చేరుకున్న రమణయ్య.. విజయానికి సంబంధించిన ధ్రువీకరణ పత్రాన్ని అందుకున్నారు.
For more: MPTC, ZPTC Elections Live Updates in DTV Digital
ఒంగోలు కార్పొరేషన్లో కూటమి హవా
మరోవైపు ఒంగోలు కార్పొరేషన్ ఎన్నికల్లో కూటమి స్పష్టమైన ఆధిక్యాన్ని ప్రదర్శించింది. టీడీపీ తరఫున మేయర్ అభ్యర్థిగా పోటీ చేసిన నల్లిమిల్లి శ్రీశిల్ప 37,626 ఓట్ల భారీ మెజారిటీతో విజయం సాధించారు.
మొత్తం 62 డివిజన్లలో కూటమి 48 స్థానాలను గెలుచుకోగా, వైఎస్సార్సీపీ 11 డివిజన్లకే పరిమితమైంది. మరో మూడు స్థానాల్లో స్వతంత్ర అభ్యర్థులు విజయం సాధించారు. వీరిలో కూటమి రెబల్స్గా బరిలోకి దిగిన వారు కూడా ఉన్నారు.
స్వతంత్ర అభ్యర్థిగా గెలిచిన అంకసాల రంగనాయకులు ఒంగోలు ఎమ్మెల్యే జనార్దన్ సమక్షంలో పార్టీలో చేరడంతో కూటమి బలం 49కి చేరింది.
మొత్తంగా ఒంగోలు కార్పొరేషన్పై కూటమి ఆధిపత్యం సాధించగా, ప్రచారానికి వెళ్లే పరిస్థితి లేకపోయినా 9వ డివిజన్లో దాచర్ల వెంకట రమణయ్య భారీ మెజారిటీతో గెలవడం ఈ ఎన్నికల్లో ప్రత్యేక ఆకర్షణగా నిలిచింది.
